އިންޑޮނީޝިޔާގެ ޔޮގްޔަކާޓާގެ ތާރީޚީ ޕަކުއާލަމަން ގަނޑުވަރުގައި 60 އަހަރު ޚިދުމަތް ކުރި ޚާދިމު ޓަރޫނޯ ޓަނޯޔޯ (84)، ދުވާލަކު 5,000 އާއި 10,000 ރުޕީސް އާ ދެމެދުގެ މިންވަރެއް ރައްކާކޮށް، ގެންގުޅުނު 14 ބަކަރި ވިއްކައިގެން އަނބިމީހާ ސުމާނީ (56) އާ އެކު ޙައްޖުގެ އަޅުކަން އަދާކުރުމަށް މައްކާ އަށް ދަތުރުކޮށްފިއެވެ.

1941 ގެ ޑިސެމްބަރު އަށެއްގައި ކުލޮންޕްރޮގޯ އަށް އުފަންވި ޓަރޫނޯ، ޕަކުއާލަމަން ގަނޑުވަރުގެ "އަބްދީ ދާލެމް" ނުވަތަ ރަސްމީ ޚާދިމެއްގެ ގޮތުގައި ޚިދުމަތް ފެށީ 1965 ގައި އުމުރުން 24 އަހަރުގައެވެ. ލިބޭ އާމްދަނީ ކުޑަ ނަމަވެސް ޙައްޖަށް ދިއުމުގެ ހުވަފެން ދޫކޮށެއް ނުލައެވެ. "ޙައްޖަށް ރައްކާކުރީ ތިން މަހުން ތިން މަހުން، ބައެއް ދުވަސް ދުވަހު 10,000 ރުޕީސް، ބައެއް ފަހަރު 5,000 ރުޕީސް" ކަމަށް ޓަރޫނޯ ކިޔައިދިނެވެ. މި ގޮތުގައި 10 އަހަރު ރައްކާކުރީއެވެ.

Advertisement

ޙައްޖަށް ފައިސާ ދައްކަން ޖެހުނުއިރު،  ރައްކާކުރި ފައިސާ އެކަނި ނުފުދުނެވެ. އެ ހިސާބުން ދެމަފިރިން ނިންމީ ދިރިއުޅުމުގެ އެންމެ އަގުބޮޑު މުދާ ޤުރުބާން ކުރާށެވެ. ގެންގުޅުނު ބަކަރިތަކުގެ ތެރެއިން 14 ބަކަރި ވިއްކައިލީއެވެ. "ކުރިން ބަކަރިތައް ގިނަ، 14 ބަކަރި ވިއްކީ ޙައްޖަށާއި އިތުރު ޚަރަދުތަކަށް" ކަމަށް ސުމާނީ ބުންޏެވެ. ބާކީ ބައެއް ބަކަރި ދަރީންނަށް ބެހި އިރު، ބައެއް ދެމަފިރީންގެ ޢަޤީޤާ އަށް ވެސް ބޭނުންކުރިއެވެ.

ދެމަފިރިން 2018 ގައި ޢުމްރާ ވެފައިވެއެވެ. އެ ދަތުރަށް ފަހު ގެފުޅަށް ދިއުމުގެ ޝައުޤުވެރިކަން އިތުރުވީއެވެ. ބާކީ ހުރި ފައިސާ އިން ދެ މީހުން ޙައްޖަށް ރަޖިސްޓްރީ ކުރީއެވެ. ސުމާނީ ވެސް ޙައްޖުގެ ޚަރަދަށް އެހީވުމުގައި މިސާލު ދެއްކިއެވެ. ކުލޮންޕްރޮގޯގެ ޕެންޓައި ގްލަގާ ގޮނޑުދޮށުގައި ބަންދު ދުވަސްތަކާއި ހަފުތާ ބަންދުގައި ކާ އެއްޗެހި ވިއްކައިގެން ޢާއިލާގެ ޚަރަދުތައް ބެލެހެއްޓުމާ އެކު ޙައްޖު ފައިސާ ވެސް ޖަމާކުރިއެވެ.