ޓީމޫ، ޝީއިން ފަދަ ބައިނަލްއަޤުވާމީ ރީޓެއިލް ވިޔަފާރި ސައިޓްތަކުން ޑޮލަރު އެކައުންޓާ ގުޅިފައިވާ ކާޑު ބޭނުންކޮށްގެން، ކަސްޓަމަރު ބޭނުންވާ އަދަދަކަށް ވިޔަފާރިކުރެވޭނެ ކަމަށާއި، އެކަމަށް ބޭންކުން އެއްވެސް ލިމިޓެއް ކަނޑައަޅާފައި ނުވާނެ ކަމަށް ބޭންކް އޮފް މޯލްޑިވްސް (ބީއެމްއެލް) އިން ބުނެފިއެވެ.

ބީއެމްއެލްގެ ތަރުޖަމާނު މުހައްމަދު ސައީދު ރޭ ކުރެއްވި ޕޯސްޓެއްގައި ވިދާޅުވީ، ބޭންކުން ހަމައެކަނި އަޅާފައިވާ ފިޔަވަޅަކީ އެފަދަ ސައިޓްތަކުގައި ރުފިޔާ ކާޑުން ކުރާ މުޢާމަލާތަށް ޑޮލަރު ވިއްކާ އަދަދު ވަކި ލިމިޓަކަށް ހަމަޖެއްސުން ކަމަށެވެ.

Advertisement

ބީއެމްއެލް އިން މި ކަން ސާފުކޮށްދީފައި މި ވަނީ، ބޭރުގެ އީ-ކޮމާސް ސައިޓްތަކުގައި ކާޑު ބޭނުންކުރުމާ ގުޅޭ ގޮތުން ބޭންކުން ދާދި ފަހުން އެޅި ފިޔަވަޅުތަކާ ގުޅިގެން ޢާންމުންގެ މެދުގައި ކަންބޮޑުވުންތަކެއް އުފެދިފައިވާ ދަނޑިވަޅެއްގައެވެ. ބީއެމްއެލް އިން މި މަހުގެ ދެ ވަނަ ދުވަހު ބޭއްވި ނޫސްވެރިންގެ ބައްދަލުވުމުގައި ވަނީ ރުފިޔާ ކާޑުތަކުން އީ-ކޮމާސް މުޢާމަލާތް މަހަކު 30 އަށް ލިމިޓް ކުރުމާއި، ޓީމޫ އާއި ޝީއިން ފަދަ ސައިޓްތަކަށް ދުވާލެއްގެ ބަޖެޓެއް ކަނޑައެޅުން ފަދަ ފިޔަވަޅުތައް އިޢުލާނުކޮށްފައެވެ.