ވޯލްޑް ކަޕް 2026ގެ އޯޕެނިން މެޗުން ފެށި، ތިން ޤައުމުގެ މެޗުތަކުން ނިމޭ ގްރޫޕް A ގައި ހިމެނެނީ، ހޯސްޓް މެކްސިކޯ، ސައުތު އެފްރިކާ، ދެކުނު ކޮރެއާ އަދި ޗެކް ރިޕަބްލިކްއެވެ. މި ގްރޫޕުގެ އެންމެ ފާހަގަކޮށްލެވޭ ކަމަކީ، 2010 ވަނަ އަހަރުގެ ވޯލްޑް ކަޕުގެ އޯޕެނިން މެޗެކޭ އެއް ފަދައިން، މި ފަހަރުގެ ވޯލްޑް ކަޕުގެ އޯޕެނިން މެޗުގައި ވެސް މެކްސިކޯ އާއި ސައުތު އެފްރިކާ ބައްދަލުކުރުމެވެ.

ގްރޫޕުގެ ފަސް މެޗު ކުޅޭނީ މެކްސިކޯގައެވެ. އެއީ، މެކްސިކޯ ސިޓީގައި ދެ މެޗު، ގުއަޑަލަހާރާގައި ދެ މެޗު އަދި މޮންޓަރޭގައި އެއް މެޗެވެ. މެކްސިކޯ ނޫން ޤައުމެއްގައި ކުޅޭ ހަމައެކަނި މެޗަކީ، ޖޫން 18 ވަނަ ދުވަހު އެޓްލާންޓާގައި ޗެކް ރިޕަބްލިކް އާއި ސައުތު އެފްރިކާ ބައްދަލުކުރާ މެޗެވެ.

ފީފާ ރޭންކިން: 15

ހޯސްޓް ޤައުމެއްގެ ހައިސިއްޔަތުން ވޯލްޑް ކަޕުގައި ބައިވެރިވާ މެކްސިކޯ، ތާރީޚުގައި ތިންވަނަ ފަހަރަށް ވޯލްޑް ކަޕް ހޯސްޓްކުރާ ފުރަތަމަ ޤައުމެވެ. ކުރިން މެކްސިކޯ ވޯލްޑް ކަޕް ހޯސްޓްކޮށްފައިވަނީ 1970 އަދި 1986ގައެވެ.

މެކްސިކޯގެ ޓީމާ ހަވާލުވެވަޑައިގެން ހުންނެވީ، 67 އަހަރުގެ ޚާވިއޭ އަގީރޭއެވެ. "އެލް ވާސްކޯ"ގެ ނަމުން މަޝްހޫރުވެފައިވާ އަގީރޭ، މެކްސިކޯއާ ހަވާލުވެވަޑައިގަންނަވާ މިއީ ތިންވަނަ ފަހަރެވެ. ކުރިން 2002 އަދި 2010ގެ ވޯލްޑް ކަޕުގައި ވެސް ޓީމާ ހަވާލުވެވަޑައިގެންނެވި އޭނާ، ދެ ފަހަރުވެސް ޓީމު ގެންދެވީ ރައުންޑް އޮފް 16 އަށެވެ.

ޓީމުގެ ކެޕްޓަންކަން ހާއްޞަކޮށްފައި ވަނީ، 28 އަހަރުގެ މިޑްފީލްޑަރ އެޑްސަން އަލްވަރޭޒް އަށެވެ. ވެސްޓު ހޭމްގެ ކުޅުންތެރިޔެއް ކަމުގައި ވިޔަސް، މި ފަހުން ތުރުކީގެ ފެނާބަޚޭއަށް ލޯނުގައި ކުޅޭ އަލްވަރޭޒް ދޭތެރެއަކުން އަނިޔާވެފައި ވުމުން، ވޯލްޑް ކަޕަށް ފިޓުވޭތޯ މިހާރު ދަނީ ބަލަމުންނެވެ.

ޓީމުގެ ކީ ޕްލެޔަރުންގެ ތެރޭގައި ހިމެނެނީ ފުލެމްގެ ފޯވާޑު ރައުލް ހިމެނޭޒް (ސަތޭކައަށްވުރެ ގިނަ ކެޕް)، އޭސީ މިލާންގެ ފޯވާޑު ސަންޓިއާގޯ ހިމެނޭޒް، އަދި އެތްލެޓިކޯ މެޑްރިޑުގެ މިޑްފީލްޑަރ އޮބެޑު ވާގަސް އެވެ.

ވޯލްޑް ކަޕް ތާރީޚް: 17 ފަހަރު ބައިވެރިވެފައި. އެންމެ ރަނގަޅު ނަތީޖާ — ދެ ފަހަރު ކުއާޓާ ފައިނަލް (1970، 1986).

ފީފާ ރޭންކިން: 60

2010ގެ ފަހުން ފުރަތަމަ ފަހަރަށް ވޯލްޑް ކަޕުގައި ބައިވެރިވާ ބަފާނާ ބަފާނާ، 2010ގެ ހޯސްޓު ޤައުމެއްގެ ގޮތުގައި ފުރަތަމަ ބުރުން ކަޓައިފައި ވިޔަސް، އެ ވޯލްޑް ކަޕުގައި ފްރާންސް ބަލިކޮށްފައިވެއެވެ.

ކޯޗަކީ ބެލްޖިއަމްގެ 73 އަހަރުގެ ހޫގޯ ބްރޫސްއެވެ. 2017ގައި ކެމެރޫން ގޮވައިގެން އެފްރިކާ ކަޕް ނެގި ބްރޫސް، 2021ގެ މެއި މަހު ސައުތު އެފްރިކާއާ ހަވާލުވެ ޓީމު ގެންދިޔައީ ވޯލްޑް ކަޕަށެވެ. ވޯލްޑް ކަޕް ފެށޭ އިރު 74 އަހަރުގެ ބްރޫސް ވާނީ، މި މުބާރާތުގެ އެންމެ ދޮށީ ކޯޗަށެވެ.

ކެޕްޓަންކަން ކުރައްވަނީ ގޯލްކީޕަރ ރޮނުވެން ވިލިއަމްސްއެވެ. 2023ގެ އެފްރިކާ ކަޕުގައި ކޭޕް ވާޑޭއާ ދެކޮޅަށް ހަތަރު ޕެނެލްޓީ ދިފާޢުކޮށް ބަފާނާ ބަފާނާ ތިންވަނައަށް ގެންދިޔައީ ވިލިއަމްސްއެވެ.

ކީ ޕްލެޔަރުން: ޕްރިމިއާ ލީގުގެ ބާންލީގެ ފޯވާޑު ލައިލް ފޮސްޓަރ (30 މެޗުގައި 10 ގޯލް)، ރޫމޭނިއާގެ އެފްސީއެސްބީގެ މިޑްފީލްޑަރ ސިޔަބޮންގަ ނގެޒާނާ، އަދި އޮރްލަންޑޯ ޕައިރަޓްސްގެ ފޯވާޑު ރެލެބޮހިލެ މޮފޮކެންގ.

ވޯލްޑް ކަޕް ތާރީޚް: ހަތަރު ފަހަރު ބައިވެރިވި. އެންމެ ރަނގަޅު ނަތީޖާ — ގްރޫޕް ސްޓޭޖު (1998، 2002، 2010).

ފީފާ ރޭންކިން: 25

ޖެހިޖެހިގެން 11 ވަނަ ވޯލްޑް ކަޕުގައި ބައިވެރިވާ ދެކުނު ކޮރެއާއަކީ، 2002ގައި ހޯސްޓު ޤައުމެއްގެ ގޮތުގައި ސެމީ ފައިނަލާ ހަމައަށް ދިޔަ ޓީމެކެވެ. އޭޝިއާގެ ޤައުމުތަކުގެ ތެރެއިން ވޯލްޑް ކަޕަށް އެންމެ ގިނައިން ޕާފޯމުކުރި ޤައުމަކީ ވެސް ދެކުނު ކޮރެއާއެވެ.

ކޯޗު: ހޮންގް މިއޮންގް-ބޯ، 56 އަހަރު. 2002ގައި ކޮރެއާ ޓީމުގެ ކެޕްޓަންކަން ކުރި ހޮންގް، އެ ވޯލްޑް ކަޕުގައި ތިންވަނައަށް އެންމެ މޮޅު ކުޅުންތެރިޔާގެ ބްރޮންޒް ބޯލް ހޯދިއެވެ. 2014ގައި ވެސް ޓީމު ވޯލްޑް ކަޕަށް ގެންދިޔަ ހޮންގް، 2024ގައި އަލުން ޓީމާ ހަވާލުވިއެވެ.

ޓީމުގެ ކެޕްޓަން އަދި ތަރިއަކީ ސޮން ހިއުންގް-މިން (33 އަހަރު) އެވެ. ޓޮޓެންހަމްއާ އެކު ޕްރިމިއާ ލީގުގައި ކުޅުނު ދިހަ ސީޒަންގައި 173 ގޯލް ޖެހި ސޮން، 2024 ވަނަ އަހަރުގެ އޮގަސްޓުގައި އެމެރިކާގެ އެމްއެލްއެސް ކްލަބު ލޮސް އެންޖެލްސް އެފްސީ (އެލްއޭއެފްސީ) އަށް ބަދަލުވިއެވެ. ކޮރެއާގެ ތާރީޚުގައި އެންމެ ގިނަ ކެޕް ހޯދައިފައިވާ ކުޅުންތެރިޔަކީ ވެސް ސޮންއެވެ.

އިތުރު ކީ ޕްލެޔަރުން: ޕީއެސްޖީގެ މިޑްފީލްޑަރ ލީ ކަންގް-އިން، އަދި ބަޔާން މިއުނިކްގެ ޑިފެންޑަރ ކިމް މިން-ޖޭ.

ވޯލްޑް ކަޕް ތާރީޚް: 11 ވަނަ ވޯލްޑް ކަޕް. އެންމެ ރަނގަޅު ނަތީޖާ — ސެމީ ފައިނަލް (2002).

ފީފާ ރޭންކިން: 41

ޗެކް ރިޕަބްލިކް އަށް ޔޫރޯ ޕްލޭއޮފް މަރުޙަލާއިން ވޯލްޑް ކަޕުގެ ޖާގަ ކަށަވަރުވިއެވެ. ސެމީ ފައިނަލުގައި އަޔަލެންޑު ބަލިކުރީ، ޕެނެލްޓީގައެވެ. އަދި ފައިނަލުގައި ޑެންމާކު ބަލިކުރީ ވެސް ޕެނެލްޓީގައެވެ.

2006ގެ ފަހުން ފުރަތަމަ ފަހަރަށް ވޯލްޑް ކަޕުގައި ބައިވެރިވާ ޗެކް ރިޕަބްލިކް އަކީ، ކުރީގެ ޗެކޮސްލޮވާކިއާ ޓީމުގެ ގޮތުގައި 1934 އަދި 1962ގެ ވޯލްޑް ކަޕުގެ ފައިނަލް ކުޅުނު ޓީމެކެވެ.

ކޯޗަކީ 74 އަހަރުގެ މިރޮސްލާވް ކޫބެކްއެވެ. ކުރީގެ ކޯޗު އިވާން ހާޝެކް، ފެރޯ އައިލެންޑްސްއަށް 2-1 ން ބަލިވުމުން މި ވޭތުވެދިޔަ އަހަރުގެ ޑިސެމްބަރުގައި ވަކިވުމާ އެކު، ކޫބެކް ޓީމާ ހަވާލުވިއެވެ.

ޓީމުގެ ކެޕްޓަންކަން ކުރައްވަނީ، ވުލްވާހެމްޓަންގެ ޑިފެންޑަރ ލެޑިސްލާވް ކްރޭޔިޗީއެވެ. ޕްލޭއޮފް ސެމީ ފައިނަލުގައި އަޔަލެންޑު ކޮޅަށް 86 ވަނަ މިނެޓުގައި އިކުއަލައިޒަރ ޖަހައި، ޝޫޓްއައުޓުގައި ވިނާ ޕެނެލްޓީ ވެސް ޖެހީ ކްރޭޔިޗީއެވެ.

ކީ ޕްލެޔަރުން: ބަޔާ ލެވަކޫޒަންގެ ފޯވާޑު ޕެޓްރިކް ޝިކް (މައި ފޯވާޑު)، ވެސްޓު ހޭމްގެ މިޑްފީލްޑަރ ޓޮމާޝް ސޫޗެކް. ކުރީގެ ކެޕްޓަން 35 އަހަރުގެ ވްލަޑިމީރް ޑަރިޑާ ވެސް، ޓީމު ކޮލިފައިކޮށްދިނުމަށް އިންޓަނޭޝަނަލް ފުޓުބޯޅައިން ރިޓަޔަރ ކޮށްގެން ހުއްޓައި އަލުން ޓީމަށް އައެވެ.

ވޯލްޑް ކަޕް ތާރީޚް: ޗެކް ރިޕަބްލިކްގެ ނަމުގައި ދެ ފަހަރު (2006، 2026). ޗެކޮސްލޮވާކިއާގެ ނަމުގައި އަށް ފަހަރު — ދެ ފަހަރު ފައިނަލް (1934، 1962).

މެކްސިކޯ vs ސައުތު އެފްރިކާ — ޖޫން 12، ދަންވަރު 12:00 (އޯޕެނިން މެޗު)

މިއީ ވޯލްޑް ކަޕް 2026ގެ އޯޕެނިން މެޗެވެ. 2010ގެ އޯޕެނިން މެޗު ވެސް ހަމަ މި ދެ ޓީމު ބައްދަލުކޮށް 1-1 ން އެއްވަރުވެގެން ނިމުނެވެ. އެ މެޗުގައި ސިޕިވޭ ޝަބަލާލާ ޖެހި ގޯލަކީ ވޯލްޑް ކަޕް ތާރީޚުގެ އެންމެ ހަނދާން ހުންނަ ގޯލްތަކުގެ ތެރޭގައި ހިމެނޭ ގޯލެކެވެ.

މި މެޗު ކުޅޭނީ، ތިން ވޯލްޑް ކަޕް ހޯސްޓްކުރާ ފުރަތަމަ ސްޓޭޑިއަމަށް ވާ، 87،523 ގެ ކެޕޭސިޓީގެ އެސްޓާޑިއޯ އަޒްޓެކާގައެވެ.

ޖޫން 12 (ހުކުރު): މެކްސިކޯ vs ސައުތު އެފްރިކާ — ދަންވަރު 12:00 — އެސްޓާޑިއޯ އަޒްޓެކާ، މެކްސިކޯ ސިޓީ ޖޫން 12 (ހުކުރު): ދެކުނު ކޮރެއާ vs ޗެކް ރިޕަބްލިކް — ހެނދުނު 7:00 — އެސްޓާޑިއޯ ގުއަޑަލަހާރާ ޖޫން 18 (ބުރާސްފަތި): ޗެކް ރިޕަބްލިކް vs ސައުތު އެފްރިކާ — ހެނދުނު 11:00 — އެޓްލާންޓާ ސްޓޭޑިއަމް ޖޫން 18 (ބުރާސްފަތި): މެކްސިކޯ vs ދެކުނު ކޮރެއާ — ހެނދުނު 5:00 — އެސްޓާޑިއޯ އަޒްޓެކާ، މެކްސިކޯ ސިޓީ ޖޫން 24 (ބުދަ): ދެކުނު ކޮރެއާ vs ސައުތު އެފްރިކާ — ހެނދުނު 5:00 — އެސްޓާޑިއޯ ގުއަޑަލަހާރާ ޖޫން 24 (ބުދަ): ޗެކް ރިޕަބްލިކް vs މެކްސިކޯ — ހެނދުނު 8:00 — އެސްޓާޑިއޯ މޮންޓަރޭ

ކޮލިފައިވުމުގެ ފޭވަރިޓުން: މެކްސިކޯ، ދެކުނު ކޮރެއާ

ހޯސްޓު ޤައުމެއްގެ ހައިސިއްޔަތާއި، ފީފާ ރޭންކިންގެ 15 ވަނައިގައި އޮތް މެކްސިކޯ، ދެ ވަނަ ބުރަށް ދިއުމުގެ ޤާބިލުކަން ހުންނަން ވާނެއެވެ. ދެކުނު ކޮރެއާގެ ތަޖުރިބާ އާއި ސޮން ހިއުންގް-މިންގެ ފޯމަށް ބަލާއިރު، ދެވަނަ ޖާގަ ހޯދުމުގެ ފުރުޞަތު އެންމެ ބޮޑީ އެ ޓީމަށެވެ. ނަމަވެސް 2010ގައި ހޯސްޓުކޮށްގެން ވެސް ފުރަތަމަ ބުރުން ކަޓައި ދިޔަ ސައުތު އެފްރިކާގެ މިސާލު ހަނދާން ކުރަން ޖެހެއެވެ.