ބެޑްމިންޓަން އެސޯސިއޭޝަން އޮފް މޯލްޑިވްސް (ބީއޭއެމް) އިން އިންތިޒާމުކޮށްގެން ބާއްވާ "ބެޑްމިންޓަން އެސޯސިއޭޝަން ޗެމްޕިއަންޝިޕް 2026" ގައި ބައިވެރިވުމުގެ ފުރުޞަތު މިއަދު ހުޅުވާލައިފިއެވެ.

މި ޗެމްޕިއަންޝިޕް ބޭއްވުމަށް ހަމަޖެހިފައިވަނީ އަންނަ މޭ މަހުގެ ހައެއް އިން 12 ވަނަ ދުވަހާ ހަމައަށް، މާލޭ ކުޅިވަރު އެކުވެނީގައެވެ. މިއީ ޤައުމީ ރޭންކިންގ ޕޮއިންޓު ދެވޭ، ޖޫނިއަރ އަދި ސީނިއަރ ދެ ފެންވަރަށް ބެހިފައިވާ މުބާރާތެކެވެ.

Advertisement

ބީއޭއެމް އިން ކުރި އިޢުލާންގައި ބުނެފައިވަނީ، މި ޗެމްޕިއަންޝިޕްގައި ބައިވެރިވުމަށް އެދޭ ފޯމު ހުށަހެޅުމުގެ އެންމެ ފަހު ތާރީޚަކީ އަންނަ މޭ މަހުގެ އެކެއް ވާ ހުކުރު ދުވަހުގެ ހަވީރު 16:00 ކަމަށެވެ. ފޯމު ހުށަހަޅަންވާނީ ބީއޭއެމް ގެ އޮފީހަށް ނުވަތަ [email protected] އަށެވެ.

މި ޗެމްޕިއަންޝިޕްގައި ނުވަ އަހަރުން ދަށުން ފެށިގެން 19 އަހަރުން ދަށާ ހަމައަށް އުމުރު ފުރާތަކަށް އަދި އޯޕަން ކެޓަގަރީއަށް އިވެންޓުތައް ކުޅެވޭނެއެވެ. ކުޅެވޭ އިވެންޓުތަކުގެ ތެރޭގައި ސިންގަލްސް، ޑަބަލްސް އަދި މިކްސްޑް ޑަބަލްސް ހިމެނެއެވެ. 15 އަހަރުން ދަށް، 17 އަހަރުން ދަށް އަދި 19 އަހަރުން ދަށުގެ ކުޅުންތެރިންނަށް އޯޕަން ކެޓަގަރީގައި ވެސް ބައިވެރިވުމުގެ ފުރުޞަތު ލިބޭނެ ކަމަށް ބީއޭއެމް އިން ބުނެފައިވެއެވެ.

ބައިވެރިވާ ކޮންމެ އިވެންޓަކަށް ފީއެއްގެ ގޮތުގައި 100 ރުފިޔާ ދައްކަން ޖެހޭނެއެވެ. މި ފައިސާ ދައްކަންވާނީ ބެޑްމިންޓަން އެސޯސިއޭޝަންގެ އެކައުންޓު ނަންބަރު 7701172490001 އަށް ޓްރާންސްފާ ކޮށްގެންނެވެ.

ޗެމްޕިއަންޝިޕްގެ ކޮންމެ އުމުރު ފުރާއެއްގެ އެއް ވަނައަށް ދާ ކުޅުންތެރިއަކަށް ތައްޓާއި، ރަން މެޑެއްޔާއި، ސެޓްފިކެޓު ދެވޭނެ ކަމަށާއި، ދެވަނައަށް ސިލްވަރ މެޑެއްޔާއި ސެޓްފިކެޓު، އަދި ތިން ވަނައަށް ބްރޯންޒް މެޑެއްޔާއި ސެޓްފިކެޓު ދެވޭނެ ކަމަށް އިޢުލާންގައި ވެއެވެ. އޯޕަން ކެޓަގަރީގެ ތިން ވަނައާ ހަމައަށް ފައިސާގެ އިނާމު ވެސް ހުށަހެޅިފައިވެއެވެ.

މުބާރާތުގެ އެންޓްރީ ލިސްޓު ޢާންމުކުރުމަށް ހަމަޖެހިފައިވަނީ މޭ ދޭއް ވަނަ ދުވަހުއެވެ. އަދި މެނޭޖަރުންގެ ބައްދަލުވުން އޮންނާނީ މޭ ހަތަރެއް ވާ ހޯމަ ދުވަހުގެ ރޭ 20:30 ގައެވެ. މުބާރާތުގެ ރެފްރީއަކަށް ހަމަޖައްސާފައިވަނީ ޢަލީ ޢަބްދުލް ކަރީމްއެވެ.