ބައިނަލްއަޤުވާމީ މާދަރީ ބަހުގެ ދުވަސް ފާހަގަކުރުމުގެ ގޮތުން، ދިވެހިރާއްޖޭގައި ހުންނަ ބަންގްލަދޭޝްގެ ހައިކޮމިޝަނާއި ދިވެހިރާއްޖޭގެ ޤައުމީ ޔުނިވަރސިޓީ (އެމްއެންޔޫ) ގެ ފެކަލްޓީ އޮފް އާޓްސް ގުޅިގެން ޚާއްޞަ ރަސްމިއްޔާތެއް ބާއްވައިފިއެވެ.

އެމްއެންޔޫ ބިޒްނަސް ސްކޫލް އޮޑިޓޯރިއަމްގައި ބޭއްވި މި ރަސްމިއްޔާތުގެ ބޭނުމަކީ މާދަރީ ބަސް ހިމާޔަތްކުރުމުގެ މުހިންމުކަމާ މެދު ޒުވާނުންގެ ހޭލުންތެރިކަން އިތުރުކުރުމާއި، މި އަހަރުގެ ޝިޢާރު ކަމަށްވާ "ގިނަ ބަހަށް ތަޢުލީމުގައި ޒުވާނުންގެ ދައުރު" މި މައުޟޫޢާ މެދު ފުންކޮށް މަޝްވަރާކުރުމެވެ.

Advertisement

މި ރަސްމިއްޔާތުގައި ބަންގްލަދޭޝުން ދިވެހިރާއްޖެއަށް ކަނޑައަޅުއްވާފައި ހުންނަވާ ހައިކޮމިޝަނަރު ޑރ. އެމް.ޑީ ނަޒްމުލް އިސްލާމް ވާހަކަފުޅު ދެއްކެވިއެވެ. އެމަނިކުފާނުގެ ވާހަކަފުޅުގައި ބައިނަލްއަޤުވާމީ މާދަރީ ބަހުގެ ދުވަހާއި ބަންގްލަދޭޝް އުފެދުމާ އޮތް ގުޅުމުގެ މައްޗަށް ބައްލަވައިލައްވައި، މާދަރީ ބަސްތައް ރައްކާތެރިކުރުމަށް ބައިނަލްއަޤުވާމީ ފެންވަރުގައި ކުރެވޭ މަސައްކަތްތަކުގެ މައްޗަށް ވާހަކަފުޅު ދެއްކެވިއެވެ.

ރަސްމިއްޔާތުގެ އެންމެ މުހިންމު ބައެއްގެ ގޮތުގައި އޮތީ "މާދަރީ ބަސް ހިމާޔަތްކުރުމުގައި ޒުވާނުންގެ ދައުރު" މި މައުޟޫޢަށް ބޭއްވި ޕެނަލް ޑިސްކަޝަނެވެ. ތަޖުރިބާކާރު ހަތަރު ޕެނަލިސްޓުންނާ އެކު މި ސެޝަން ހުށަހަޅުއްވައިދެއްވީ ފެކަލްޓީ އޮފް އާޓްސްގެ ސީނިއަރ ލެކްޗަރަރު ޢާއިދާ ޙައްމާދެވެ. ޕެނަލިސްޓުންގެ ގޮތުގައި ބައިވެރިވެވަޑައިގެންނެވީ ދިވެހިބަހުގެ އެކެޑަމީގެ ނާއިބުރައީސް ޒުލްފާ އިބްރާހީމާއި، އެމްއެންޔޫގެ ދެ ސީނިއަރ ލެކްޗަރަރުން ކަމަށްވާ ޑރ. އާމިނަތު ޒާހިރާއި އަންވަރު އިބްރާހީމް، އަދި ބަންގްލަދޭޝްގެ ޑރ. ސާދިއާ ހައްގެވެ.

މީގެ އިތުރުން، ޤައުމީ ތަރައްޤީއާއި އިޖުތިމާޢީ އެއްބައިވަންތަކަމުގައި ބަހުގެ ދައުރާ ގުޅޭގޮތުން ރަސްމިއްޔާތުގެ ޝަރަފުވެރި މެހުމާނު، ދިވެހިބަހުގެ އެކެޑަމީގެ ރައީސް ތަޤުރީރެއް ދެއްވެވިއެވެ. ދެ މުއައްސަސާ ގުޅިގެން ބަހަވީ އަދި ސަގާފީ ހޭލުންތެރިކަން އިތުރުކުރުމަށް ކުރިއަށް އޮތް ތަނުގައި ވެސް މަސައްކަތްކުރައްވާނެ ކަމަށް ދެ މުއައްސަސާގެ އިސް ބޭފުޅުން ފާހަގަކުރެއްވިއެވެ.