ދިވެހިރާއްޖޭގެ ޤައުމީ ޔުނިވަރސިޓީ (އެމްއެންޔޫ) ގެ ކެމްޕަހެއް ބ. އޭދަފުށީގައި ބިނާކުރުމުގެ ޢަމަލީ މަސައްކަތް ފައްޓަވައި، ބިންގާ އެޅުމުގެ ރަސްމިއްޔާތު ބާއްވައިފިއެވެ.

މި މަޝްރޫޢުގެ ޢަމަލީ މަސައްކަތް ރަސްމީކޮށް ފައްޓަވައިދެއްވީ މިނިސްޓަރ އޮފް ހަޔަރ އެޑިޔުކޭޝަން، ލޭބަރ އެންޑް ސްކިލްސް ޑިވެލޮޕްމަންޓް ޑރ. ޢަލީ ހައިދަރު އަޙްމަދެވެ. މި ރަސްމިއްޔާތުގައި އޭދަފުށީ ދާއިރާގެ ރައްޔިތުންގެ މަޖިލީހުގެ މެންބަރު އަޙްމަދު ސަލީމާއި، އެމް.ޓީ.ސީ.ސީގެ މެނޭޖިންގ ޑިރެކްޓަރ އަޙްމަދު ސައުދީއާއި، އެމްއެންޔޫގެ ވައިސް ޗާންސެލަރ ޑރ. ޢާއިޝަތު ޝެހެނާޒް އާދަމާއި ބ. އޭދަފުށީ ކައުންސިލްގެ ރައީސް މުޙައްމަދު ފާތިޙް ބައިވެރިވެވަޑައިގެންނެވިއެވެ.

Advertisement

މި މަޝްރޫޢުގެ ދަށުން އޭދަފުށީގައި ބިނާކުރެވެނީ ތަޢުލީމީ، އިދާރީ އަދި ދަރިވަރުންގެ އެކޮމޮޑޭޝަން ފެސިލިޓީތައް ހިމެނޭ މަލްޓި-ބްލޮކް ކެމްޕަހެކެވެ. ޖުމްލަ 80.79 މިލިއަން ރުފިޔާ ޚަރަދުކޮށްގެން ކުރިއަށްގެންދާ މި މަޝްރޫޢު ނިންމުމަށް ތާވަލުކޮށްފައިވަނީ 720 ދުވަހުގެ ތެރޭގައެވެ.

ބ. އަތޮޅުގެ ވެރިކަން ކުރާ ރަށް އޭދަފުއްޓަކީ ގާތްގަނޑަކަށް 3,500 މީހުންގެ އާބާދީއެއް އޮތް ރަށެކެވެ. އެ ރަށުގައި އެމްއެންޔޫގެ ކެމްޕަހެއް ޤާއިމުވުމަކީ ބ. އަތޮޅުގެ ދަރިވަރުންނަށް އަމިއްލަ އަތޮޅުގައި ތިބެގެން މަތީ ތަޢުލީމު ޙާޞިލުކުރުމުގެ ފުރުޞަތު ފަހިވެ، ތަޢުލީމު ޙާޞިލުކުރުމަށް މާލެއަށް ހިޖުރަކުރުމަށް ކުރަންޖެހޭ ބޮޑެތި ޚަރަދުތަކަށް ލިބިގެންދާނެ ބޮޑު ލުޔެކެވެ.