އެޕްރީލް މަހުގެ 4 ވަނަ ދުވަހު ބޭއްވުމަށް ކަނޑައަޅާފައިވާ އިންތިޚާބުތަކަށް ބޭނުންވާ ލޮޖިސްޓިކްސް ތަކެތި ރަށްރަށަށް ފޮނުވުމުގެ އޮޕަރޭޝަން އިލެކްޝަންސް ކޮމިޝަން (އީސީ) އިން ފަށައިފިއެވެ. 

މި އިންތިޚާބުގައި އަތޮޅުތެރޭގައި ޖުމްލަ 347 ވޯޓުލާ މަރުކަޒު ގާއިމުކުރުމަށް ވަނީ ހަމަޖެހިފައެވެ.

Advertisement

އިލެކްޝަންސް ކޮމިޝަނުން ހާމަކުރި ގޮތުގައި، ކައުންސިލް އިންތިޚާބާއި، އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބުގެ އިތުރުން ރައްޔިތުންގެ ފެންނަ ނުފެންނަ ވޯޓަށް ބޭނުންވާ ސާމާނު ވައިގެ މަގުންނާއި ކަނޑުމަގުން ފޮނުވުމުގެ މަސައްކަތް ދަނީ ކުރަމުންނެވެ. މީގެ ތެރޭގައި ވޯޓު ފޮށިތަކާއި، ވޯޓު ކަރުދާހުގެ އިތުރުން މަރުކަޒުތަކުގައި މަސައްކަތްކުރާ އޮފިޝަލުންނަށް ބޭނުންވާނެ އެންމެހާ ތަކެތި ހިމެނެއެވެ.

ތަކެތި ފޮނުވުމުގެ ތާވަލަށް ބަލާއިރު، މިއަދު ވައިގެ މަގުން ތަކެތި ފޮނުވަނީ ހއ، ރ، ތ، ލ، ގއ، ގދ، ސ އަތޮޅުގެ އިތުރުން ފުވައްމުލަކާއި އައްޑޫ ސިޓީއަށެވެ. އަދި ކަނޑުމަގުން ތަކެތި ފޮނުވަނީ ހދ، ށ، ނ، ބ، ޅ، އއ، އދ، ވ، މ، ފ އަދި ދ އަތޮޅަށެވެ. މި މަސައްކަތް އެކި ބައިބަޔަށް ބަހާލައިގެން ކުރިއަށްގެންދާއިރު، މިރޭގެ ނިޔަލަށް މި ހުރިހާ އަތޮޅަކަށް ތަކެތި ފޮނުވާ ނިންމާލެވޭނެ ކަމަށް އީސީން ލަފާކުރެއެވެ. ނަމަވެސް ކ. އަތޮޅުގެ ރަށްރަށަށް ތަކެތި ފޮނުވުމަށް ހަމަޖެހިފައިވަނީ މި މަހުގެ 30 އާއި 31 ގައެވެ. މި މަރުކަޒުތަކަށް ތަކެތި ފޮނުވުމުގައި ދިވެހި ފުލުހުންގެ އެހީތެރިކަން ދަނީ ހޯދަމުންނެވެ.

ކުރިއަށް އޮތް ހޮނިހިރު ދުވަހުގެ އިންތިޚާބުގައި ވޯޓުލުމުގެ ހައްޤު ޖުމްލަ 294,876 މީހުންނަށް ލިބިފައިވެއެވެ. މި އިންތިޚާބުގައި ލޯކަލް ކައުންސިލްތަކަށް 1,592 ކެންޑިޑޭޓުން އަދި އަންހެނުންގެ ކޮމިޓީތަކަށް 1,368 ކެންޑިޑޭޓުން ވާދަކުރެއެވެ. މީގެ އިތުރުން، އެކި އިންތިޚާބުތައް އެއް ދުވަހެއްގައި ބޭއްވުމާ މެދު ރައްޔިތުންގެ ޚިޔާލު ހޯދުމުގެ ވޯޓުގެ ކެމްޕޭން ހަރަކާތްތައްވެސް މިހާރު ވަނީ ވަރަށް ބޮޑަށް ފޯރިގަދަވެފައެވެ.