އެޗްޑީސީން އިސްނަގައިގެން މި ރޯދަ މަހު ބާއްވާ ތިންވަނަ "އަވައްޓެރި ރޯދަ ވީއްލުން" މިއަދު ހަވީރު 18:00 ގައި ހުޅުމާލޭ ފޭސް 2 ގެ ހިޔާ ޕާކުގައި ބޭއްވުމަށް ތައްޔާރުވެއްޖެއެވެ.

އެޗްޑީސީން ބުނީ މި ހަރަކާތް ކުރިއަށް ގެންދަނީ ހުޅުމާލޭގެ ރައްޔިތުންނާއި އެޗްޑީސީ އަދި ނެއިބަހުޑް ޕޮލިސް ގުޅިގެން ކަމަށެވެ. މި އަހަރުގެ ފުރަތަމަ ރޯދަ ވީއްލުން ބޭއްވީ އެޗްޑީސީ އަދި އެފްޑީސީ ގުޅިގެން، ހުޅުމާލޭ ފޭސް 2 ގައި ތަރައްޤީކޮށްފައިވާ އެފްޑީސީ ފްލެޓުތަކުގައި ދިރިއުޅޭ ފަރާތްތަކަށް ޚާއްޞަކޮށްގެންނެވެ. ދެވަނަ ރޯދަ ވީއްލުން ބޭއްވީ ހުޅުމާލޭ ފޭސް 1 ގެ ހުރަވީ ސްކޫލް ކުރިމަތީގައެވެ.

Advertisement

އެ ކޯޕަރޭޝަނުން ބުނީ މި ހަރަކާތުގެ މަޤުޞަދަކީ ދިވެހިންގެ މެދުގައި ޒަމާނުއްސުރެ އޮންނަ އެކުވެރިކަމާއި އެއްބައިވަންތަކަން އާލާކޮށް ދިރުވުން ކަމަށެވެ. މިދިޔަ އަހަރު ވެސް ހުޅުމާލޭގެ އެކި ސަރަޙައްދުތަކުގައި މިފަދަ ރޯދަ ވީއްލުންތައް ބާއްވާފައިވާ ކަމަށް އެޗްޑީސީން ބުންޏެވެ. އެޗްޑީސީގެ އަމާޒަކީ ކުރިއަށް އޮތް ތަނުގައި ވެސް ހުޅުމާލޭގެ ރައްޔިތުންނާ ގުޅިގެން މިފަދަ ގިނަ ހަރަކާތްތަކެއް ކުރިއަށް ގެންދިއުން ކަމަށް އެ ކޯޕަރޭޝަނުން ބުންޏެވެ.