ފެބުރުވަރީ 2026 ގައި މީރާއިން ބަލައިގަނެފައިވާ ޖުމުލަ އާމްދަނީއަކީ 2.80 ބިލިއަން ރުފިޔާ ކަމަށް މީރާއިން ހާމަކޮށްފިއެވެ. މި އަދަދަކީ ވޭތުވެދިޔަ އަހަރުގެ މި މުއްދަތުގައި ލިބުނު އާމްދަނީއަށްވުރެ %0.8 ދަށް އަދި ފެބުރުވަރީ 2026 ގައި ލިބޭނެ ކަމަށް އަންދާޒާކޮށްފައިވާ އަދަދަށްވުރެ %11.6 ދަށް އަދަދެކެވެ.

މީރާއިން ބުނީ، ފެބުރުވަރީ 2025 އާ އަޅައިބަލާއިރު އާމްދަނީ ދަށްވުމުގެ މައިގަނޑު ސަބަބަކީ ރިޒޯޓުތަކުގެ ކުލީގެ މުއްދަތު އިތުރުކުރުމުގެ ފީ، އެއާރޕޯޓް ޑިވެލޮޕްމަންޓް ފީ އަދި ރިޒޯޓުތަކުގެ ކުލިން ލިބުނު އާމްދަނީ ދަށްވުން ކަމަށެވެ. މީގެ އިތުރުން ފެބުރުވަރީ މަހުގެ ޓެކުހުގެ ސުންގަޑިތައް ރަސްމީ ބަންދު ދުވަސްތަކަކާ ދިމާވުމުން މާރިޗު މަހުގެ ދުވަސްތަކަކަށް މުއްދަތު އިތުރުކޮށްފައިވާ ކަމަށް މީރާއިން ބުންޏެވެ. ނަމަވެސް، ފެބުރުވަރީ 2026 ގައި އެޑްވާންސްކޮށް ދައްކާފައިވާ ޕޭމަންޓްތައް ވަނީ ފެބުރުވަރީ 2025 އާ އަޅައިބަލާއިރު އިތުރުވެފައެވެ.

Advertisement

އާމްދަނީގެ އެންމެ ބޮޑު ބައެއް ހިއްސާކުރަނީ ޖީ.އެސް.ޓީއެވެ. އެއީ 1.4 ބިލިއަން ރުފިޔާ (%52.3) އެވެ. ދެން އެންމެ ބޮޑު އާމްދަނީއެއް ލިބިފައިވަނީ އާމްދަނީން ނަގާ ޓެކުހުންނެވެ. އެއީ 599.2 މިލިއަން ރުފިޔާ (%21.4) އެވެ. މީގެ އިތުރުން ގްރީން ޓެކުހުގެ ގޮތުގައި 200.36 މިލިއަން ރުފިޔާ، ޑިޕާޗަރ ޓެކުހުގެ ގޮތުގައި 134.33 މިލިއަން ރުފިޔާ، އެއާރޕޯޓް ޑިވެލޮޕްމަންޓް ފީގެ ގޮތުގައި 122.56 މިލިއަން ރުފިޔާ އަދި ރިޒޯޓުތަކުގެ ކުލީގެ މުއްދަތު އިތުރުކުރުމުގެ ފީގެ ގޮތުގައި 196.34 މިލިއަން ރުފިޔާ ލިބިފައިވެއެވެ.

ފެބުރުވަރީ 2026 ގައި ނުލިބިހުރި ފައިސާ ހޯދުމަށް ކުރި މަސައްކަތުން ޖުމުލަ 666 މިލިއަން ރުފިޔާ ވަނީ ހޯދައިފައެވެ. މީގެ ތެރޭގައި ނޯޓިސް ފޮނުވައިގެން 399 މިލިއަން ރުފިޔާ، ޑިއުސް ކްލިއަރެންސްގެ ތެރެއިން 156 މިލިއަން ރުފިޔާ، އިންސްޓޯލްމަންޓް އެއްބަސްވުމުގެ ދަށުން 61 މިލިއަން ރުފިޔާ، ފޯނު ކޯލުތަކުގެ ޒަރީއާއިން 34 މިލިއަން ރުފިޔާ އަދި ބޭންކް އެކައުންޓްތައް ހިފަހައްޓައިގެން 5 މިލިއަން ރުފިޔާ ހިމެނެއެވެ. ފެބުރުވަރީ 2026 ގައި ބަލައިގަތް އާމްދަނީގެ ތެރޭގައި 126.85 މިލިއަން އެމެރިކާ ޑޮލަރު ހިމެނެއެވެ.