ދިވެހިރާއްޖޭގެ ޤައުމީ ޔުނިވަރސިޓީ (އެމް.އެން.ޔޫ) އާއި އެންޓި-ކޮރަޕްޝަން ކޮމިޝަން (އޭ.ސީ.ސީ) އާ ދެމެދު، ދެ މުއައްސަސާ ގުޅިގެން މަސައްކަތްކުރާނެ ދާއިރާތައް ކަނޑައެޅުމަށާއި އެއް ފަރާތުން އަނެއް ފަރާތަށް އެހީތެރިކަން ފޯރުކޮށްދިނުމަށް މިއަދު ފަހުމުނާމާއެއްގައި ސޮއިކޮށްފިއެވެ.

މި ފަހުމުނާމާއަކީ ޔުނިވަރސިޓީގެ ތަޢުލީމީ އަދި ފަންނީ ދާއިރާގެ ބޭނުން ހިފައިގެން، ރާއްޖޭގައި ކޮރަޕްޝަން ހުއްޓުވުމަށް ކުރެވޭ މަސައްކަތްތަކަށް އެހީތެރިވުމަށާއި، ދެ މުއައްސަސާގެ ދެމެދުގައި އޮންނަ ގުޅުން އިތުރަށް ހަރުދަނާކުރުމަށް އެޅުނު މުހިންމު ފިޔަވަޅެކެވެ.

Advertisement

މި އެއްބަސްވުމުގެ ދަށުން، ކޮރަޕްޝަން ވިޔަނުދިނުމަށްޓަކައި ޔުނިވަރސިޓީގެ ފަރާތުން ކުރެވޭނެ މަސައްކަތްތައް ދެނެގަނެ، އެކަމަށް ބޭނުންވާ ފަންނީ އެހީތެރިކަން ފޯރުކޮށްދިނުމަށް ވަނީ ހަމަޖެހިފައެވެ. އަދި އޭ.ސީ.ސީ އިން ދޭ ލަފަޔާއި އިރުޝާދުތައް ޔުނިވަރސިޓީގެ ނިޒާމުގެ ތެރޭގައި ތަންފީޒުކުރުމުގައި ގުޅިގެން މަސައްކަތްކުރުމަށްވެސް ވަނީ އެއްބަސްވެފައެވެ. މީގެ އިތުރުން، ދެ ފަރާތުގެ ދެމެދުގައި ފަންނީ އެހީތެރިކަން ބަދަލުކުރުމުގައި ހަރުދަނާ ފީޑްބެކް ނިޒާމެއް ޤާއިމްކޮށް، މަސައްކަތްތައް ކުރިއަށްދާ ގޮތް ގަވާއިދުން މުރާޖަޢާ ކުރެވޭނެއެވެ.

ޤައުމީ ޔުނިވަރސިޓީން ގަބޫލުކުރާ ގޮތުގައި، މިފަދަ ގުޅުމެއްގެ ސަބަބުން ޔުނިވަރސިޓީގެ ދަރިވަރުންނާއި މުވައްޒަފުންގެ މެދުގައި ނަޒާހަތްތެރިކަމުގެ ސިފަ އަށަގަނުވައި، ދައުލަތުގެ މުއައްސަސާތަކަކީ ކޮރަޕްޝަނުން ސަލާމަތްވެފައިވާ ތަންތަނަށް ހެދުމަށް ކުރާ މަސައްކަތަށް އިތުރު ބާރެއް ލިބިގެންދާނެއެވެ.