ދިވެހިރާއްޖޭގެ ޤައުމީ ޔުނިވަރސިޓީ (އެމް.އެން.ޔޫ) އިން އިންތިޒާމުކުރާ "އެމް.އެން.ޔޫ މެރަތަން 2026" ގައި ބައިވެރިވުމަށް ހުޅުވާލާފައިވާ ފުރުސަތު މިރޭ 23:59 އަށް ހަމަވާނެ ކަމަށް އެ ޔުނިވަރސިޓީން ބުނެފިއެވެ.

ދުޅަހެޔޮކަމާއި އެއްބައިވަންތަކަން ކުރިއެރުވުމަށް މުޅި ރާއްޖެއަށް ހުޅުވާލައިގެން ބާއްވާ މި މެރަތަންއަކީ ތަފާތު ދުވުންތަކުގެ ކެޓަގަރީތަކާއެކު، ހުރިހާ އުމުރުފުރައެއްގެ މީހުންނަށް ބައިވެރިވެވޭ ގޮތަށް ފަރުމާކޮށްފައިވާ ހަރަކާތެކެވެ. މި މެރަތަންގެ މައިގަނޑު މަޤްޞަދަކީ ހަމައެކަނި ވާދަވެރި ދުވުމެއް ބޭއްވުމެއް ނޫން ކަމަށާއި، މިއީ އެމް.އެން.ޔޫގެ މުޖުތަމަޢާއި މުޅި ރާއްޖޭގައި ދުޅަހެޔޮ އަދި ހަރަކާތްތެރި ދިރިއުޅުމުގެ ސަގާފަތެއް ބިނާކޮށް އާލާކުރުމަށް ކުރިއަށްގެންދާ މުހިންމު އިސްނެގުމެއް ކަމަށް އެ ޔުނިވަރސިޓީން ބުނެއެވެ.

Advertisement

އެމް.އެން.ޔޫ އިން ބުނީ މި މެރަތަން މެދުވެރިކޮށް ހަމަހަމަ ދިރިއުޅުމުގެ ވައްޓަފާޅިއެއް ކުރިއަރުވައި، މުޅި މުޖުތަމައުން ސިއްހީ ދުޅަހެޔޮކަމަށް އިސްކަންދިނުމަށް ބާރުއަޅައި ނަމޫނާ ދެއްކުމަށް އުންމީދުކުރާ ކަމަށެވެ.

މި ހަރަކާތަކީ އެމް.އެން.ޔޫގެ "ފަހި ސިއްހަތު" ޕްރޮގްރާމުގެ ދަށުން ކުރިއަށްގެންދާ ހަރަކާތެކެވެ. އެ ޕްރޮގްރާމަކީ ގައިންގަޔަށް ނާރާ ބަލިތަކަށް ހޭލުންތެރިކަން އިތުރުކުރުމަށާއި، މުޅި ރާއްޖޭގައި ދުޅަހެޔޮ ދިރިއުޅުމަކަށް ވަކާލާތު ކުރުމަށް އެ ޔުނިވަރސިޓީން ހިންގާ ގައުމީ ކެމްޕޭނެކެވެ.