ދިވެހިރާއްޖޭގެ ޤައުމީ ޔުނިވަރސިޓީގެ ފެކަލްޓީ އޮފް އާޓްސްއިން އިންތިޒާމުކޮށްގެން "އޯޝަން ގަވަރނަންސް ސިމްޕޯޒިއަމް 2026" ގެ ނަމުގައި ކަނޑުފަޅުގެ ނިޒާމުތައް ބެލެހެއްޓުމާ ބެހޭ މަހާސިންތާއެއް މިއަދު އެ ޔުނިވަރސިޓީގައި ބާއްވައިފިއެވެ.

މި މަހާސިންތާގެ ބޭނުމަކީ ކަނޑުފަޅުގެ ނިޒާމުތައް ބެލެހެއްޓުމުގައި ސަރަހައްދީ ފެންވަރެއްގައި ގުޅިގެން މަސައްކަތްކުރުމަށް ބާރުއެޅުމާއި، މި ދާއިރާގައި ކުރިމަތިވަމުންދާ ގޮންޖެހުންތަކަށް ހައްލު ހޯދުމެވެ. މިއީ ޖަޕާނު އެމްބަސީގެ އެހީތެރިކަމާ އެކު ބޭއްވުނު މި ފަދަ ދެވަނަ މަހާސިންތާއެވެ.

Advertisement

މަހާސިންތާ އިފްތިތާހުކޮށްދެއްވީ ސްޓޭޓް މިނިސްޓަރ އޮފް ފިޝަރީޒް އެންޑް އޯޝަން ރިސޯސަސް ޑރ. އަމްޒަތު އަޙުމަދުއެވެ. ޤައުމީ ޔުނިވަރސިޓީގެ ވައިސް ޗާންސެލަރު ޑރ. ޢާއިޝަތު ޝެހެނާޒް އާދަމް އަދި ޖަޕާނުން ރާއްޖެއަށް ކަނޑައަޅުއްވާފައި ހުންނަވާ ސަފީރު އިޝިގާމީ ރުމީކޯ ވެސް ޖަލްސާގައި ވާހަކަފުޅު ދެއްކެވިއެވެ. ކީނޯޓް ހުށަހަޅުއްވައިދެއްވީ ސަސަކާވާ ޕީސް ފައުންޑޭޝަންގެ އޯޝަން ޕޮލިސީ ރިސަރޗް އިންސްޓިޓިއުޓްގެ ސީނިއަރ ރިސަރޗް ފެލޯ ޑރ. މަސަނޯރީ ކޮބަޔާޝީއެވެ.

މި މަހާސިންތާގައި ޤައުމީ ޔުނިވަރސިޓީގެ ފެކަލްޓީތަކާއި ސެންޓަރުތަކުގެ އިތުރުން، މިނިސްޓްރީ އޮފް ފިޝަރީޒް އެންޑް އޯޝަން ރިސޯސަސް، މިނިސްޓްރީ އޮފް އެންވަޔަރަންމަންޓް އެންޑް ޓޫރިޒަމް، މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަން، މިނިސްޓްރީ އޮފް ފޮރިން އެފެއާޒް، ބަންޑާރަނައިބުގެ އޮފީސް އަދި ކޯސްޓް ގާޑުން ކަރުދާސް ހުށަހެޅުއްވިއެވެ. އިންޑިއާ ކަނޑުގެ އައްސޭރިފަށުގެ ހަތަރު ޤައުމެއް ކަމަށްވާ ބަންގްލަދޭޝް، އިންޑިއާ، ޕާކިސްތާނު އަދި ސްރީލަންކާގެ މަންދޫބުންނާއި ޕާލޭ މޯލްޑިވްސްގެ ފަރާތުން ވެސް ދިރާސާ ކަރުދާސް ހުށަހެޅުއްވިއެވެ.

ކަނޑުފަޅުގެ ނިޒާމުތައް ބެލެހެއްޓުމާ ގުޅޭ ގޮތުން އެކަށީގެންވާ ޤައުމީ ޤާނޫނީ އޮނިގަނޑެއް ނެތުމާއި ވަށައިޖެހޭ ޕްލޭނެއް ނުވަތަ މިކަމަށް ޚާއްޞަ މުއައްސަސީ ނިޒާމެއް ނެތުމުން، މި ދާއިރާގެ ދިރާސާތައް ރާއްޖޭގައި އިތުރުކޮށް ފުޅާކުރާން ޖެހޭ ކަމަށް ފާހަގަކުރެވިފައިވެއެވެ. މި ސީރީސްގެ ފުރަތަމަ މަހާސިންތާ ބޭއްވުނީ 2023 ވަނަ އަހަރުގައެވެ.