ފެށިގެން މިދާ 2026 ވަނަ އަހަރު ނިމޭއިރު ދައުލަތުގެ ރިޒާވް 904 މިލިޔަން ޑޮލަރަށް އަރާނެކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ލަފާކޮށްފިއެވެ.

އެމްއެމްއޭގެ ތަފާސްހިސާބުތަކުން އެނގޭގޮތުގައި ނިމުނު 2025 ވަނަ އަހަރު ރިޒާވްގައި 849 މިލިޔަން ޑޮލަރު ހުންނާނެ ކަމަށް ލަފާކުރިއެވެ. 2024 ވަނަ އަހަރު ނިމުނު އިރު ރިޒާވްގައި ހުރީ 674 މިލިޔަން ޑޮލަރެވެ. ނިމިދިޔަ 2025 ވަނަ އަހަރު ރިޒާވް ރަނގަޅުވީ ފަތުރުވެރިކަމުގެ ދާއިރާއިން ބޭންކުތަކަށް ޑޮލަރު މާރުކުރާވަރު އިތުރުވުމާއި ކަރެންސީ ސްވޮޕް ފެސިލިޓީގެ ސަބަބުންނެވެ. މީރާއިން ޑޮލަރުގެ ގޮތުގައި ލިބުނު އާމްދަނީ އިތުރުވިކަންވެސް ފާހަގަކުރެވުނެވެ.

Advertisement

ރާއްޖޭގެ އިގްތިސާދު ފަތުރުވެރިކަމަށް ބަރޯސާވެފައިވާއިރު ބޭރުގެ އިގްތިސާދީ ނިންމުންތަކާއި ހަރަކާތްތަކުގެ އަސަރު ރާއްޖެއަށް ކުރުމުގެ ފުރުސަތު އޮންނަކަން އެމްއެމްއޭއިން ފާހަގަކުރެއެވެ.

އެމްއެމްއޭ އިން ލަފާކުރާ ގޮތުން މިދިޔަ އަހަރު ރާއްޖޭގެ އިގްތިސާދު 5.4 ޕަސެންޓާ ދެމެދުގައި ކުރިއަރާފައިވެ އެވެ. އިގްތިސާދު ކުރިއެރީ ޓޫރިޒަމް ދާއިރާ އާއި ދަތުރުފަތުރާއި މުއާސަލާތީ ހިދުމަތްތައް ކުރިއެރުމުގެ ސަބަބުންނެވެ.

މި އަހަރު ރާއްޖޭގެ އިގްތިސާދު ކުރިއަރާނެ ކަމަށް އެމްއެމްއޭ އިން ލަފާކުރަނީ 4.8 ޕަސެންޓާއި 5.3 ޕަސެންޓާ ދެމެދުގަ އެވެ.