ރާއްޖެއަށް ސިއްރުން ރަން އެތެރެކުރިކަމުގެ ތުހުމަތުގައި ސްރީލަންކާ ރައްޔިތަކަށް އެއް އަހަރު ދުވަހުގެ ޖަލު ހުކުމެއް އިއްވައިފިއެވެ.

މި ހުކުމް އިއްވާފައިވަނީ މުޙައްމަދު މުޙައްމަދު ސުލައިމްޚާން ނަމަކަށްކިޔާ ލަންކާ ރައްޔިތެއްގެ މައްޗަށެވެ.

Advertisement

މިދިޔަ އަންގާރަ ދުވަހު އިއްވި އެ ހުކުމުގައި ބުނެފައިވަނީ ރާއްޖެއަށް ސިއްރުން މުދާ އެތެރެކުރުމުގެ ކުށުގެ ދައުވާ، ޝަރީއަތުން ބެލި ބެލުމުން، އޭނާ އިންކާރު ކުރި ނަމަވެސް ހެކިތަކަށް ރިއާޔަތްކޮށް ޝައްކެއް ނެތް މިންވަރަށް ސާބިތުވާކަމަށެވެ.

ކުށް ސާބިތުވުމުން އޭނާގެ މައްޗަށް އެއް އަހަރުގެ ޖަލު ހުކުމެއްގެ އިތުރުން އެ މުދާ (ރަން) ކަސްޓަމްސް އަށް ނެގުމަށްވެސް އެ ހުކުމުގައި އަންގާފައިވެއެވެ.

އެ މައްސަލައަކީ 20 ޑިސެމްބަރު 2023 ގައި ހުށަހަޅާފައިވާ މައްސަލައެކެވެ. އެ މައްސަލައިގެ ޝަރީޢަތް ނިމުނުގޮތުގެ ރިޕޯޓަށް ބަލާއިރު އެ މައްސަލައަކީ އެ އަހަރުގެ ސެޕްޓެމްބަރު މަހު ދުބާއީ އިން ރާއްޖެ އައި އިރު އޭނާ ބަލާ ފާސްކުރި އިރު އޭނާ ލައިގެން ހުރި ޖީންސްގެ ދެ ޖީބަކުންނާއި ބޮކްސާގެ ތެރެއިން ފެނުނު ޕެކެޓުތަކެއްގައި 2282 ގްރާމް ރަން ޕޭސްޓް ސިއްރުން ރާއްޖެއަށް އެތެރެކުރަން އުޅުނު މައްސަލައެކެވެ.