އާދީއްތަ ދުވަހުގެރޭ ހުރިހާ ރަށެއްގައި ކޭތަ ނަމާދު ކުރުމަށް އިސްލާމިކް މިނިސްޓްރީން އަންގައިފިއެވެ.

އެ މިނިސްޓްރީން އެކަން އަންގާފައިވަނީ ކައުންސިލްތަކަށް މިއަދު ފޮނުވި ސާކިއުލާއެއްގައެވެ.

Advertisement

މިނިސްޓްރީގެ އެ ސާކިއުލާގައި ބުނެފައިވަނީ ސެޕްޓެމްބަރު 07 ވާ އާދިއްތަ ދުވަހުގެ ރޭ ހަނދުކޭތައެއް ހިފާނެ ކަމަށާއި މި ހަނދުކޭތަ ހިފަން ފަށާނީ ރާއްޖޭގެ ގަޑިން އެ ރޭ 08:28ގައި ކަމަށާއި އަދި ކޭތަ އެންމެ ބޮޑަށް ހިފާފައި ހުންނާނީ އެރޭގެ 11:11ގައިކަން ފާހަގަކުރާ ކަމަށެވެ.

"ހަނދުކޭތަ ވީއްލާނީ ރާއްޖޭގެ ގަޑިން އެރޭގެ މެންދަމުން އަލިވެ 01:55 ގައި" މިނިސްޓްރީން ބުނެފައިވެއެވެ.

ރާއްޖޭގައި މީހުން ދިރިއުޅޭ ހުރިހާ ރަށެއްގައި ހުންނަ އެންމެ ބޮޑު މިސްކިތުގައި 2025 ސެޕްޓެމްބަރު 07 ވާ، އާދީއްތަ ދުވަހުގެ ރޭގަނޑު 11:12ގައި ކޭތަނަމާދު ކުރެވޭނެ އިންތިޒާމު ކައުންސިލު އިދާރާއިން ހަމަޖެއްސުމަށް އިސްލާމިކް މިނިސްޓްރީން އެދިފައިވެއެވެ.  ކޭތަ ނަމާދުގެ ޚުޠުބާ 2025 ސެޕްޓެމްބަރު 07 ވާ، އާދީއްތަ ދުވަހު މި މިނިސްޓްރީގެ ވެބްސައިޓްގައި އަޕްލޯޑްކުރާނެކަމަށްވެސް ބުނެފައިވެއެވެ.