އިނގިރޭސިވިލާތުގެ ކައުންޓީ ދުރްހަމަށް ނިސްބަތްވާ ފަތުރުވެރިއަކު ރާއްޖޭގައި ޗުއްޓީ ހޭދަކުރަމުންދަނިކޮށް ހާޓް އެޓޭކެއް ޖެހި އެޑްމިޓްކޮށްފައިވާއިރު ހޮސްޕިޓަލުން ޑިސްޗާޖް ކުރަން ބިލަށް ވާ ފައިސާ ހޯދަން އެހީއަށް އެދެމުންއެބަދެއެވެ.

އިނގިރޭސިވިލާތުގެ ނޫހެއްގެ މިއަދުގެ ޢަދަދުގައި ރިޕޯޓްކޮށްފައިވާގޮތުގައި ޕޯލް ޖޯޖް އަދި ލީސާ ސްލެޓާ ރާއްޖެ އައީ މިދިޔަ ހޯމަ ދުވަހުގައެވެ. ރިސޯޓުގައި ޗުއްޓީ ހޭދަކުރަމުންދަނިކޮށް، އުމުރުން މިހާރު 57 އަހަރުގެ ޕޯލް އަށް ދެ ހާޓް އެޓޭކެއް ޖެހުނުކަމަށް ދައްކާކަމަށާއި މިހާރު ހޮސްޕިޓަލެއްގައި އެޑްމިޓްކޮށް ފަރުވާދެމުން އަންނައިރު ޑިސްޗާޖް ކުރަންވެސް ހޮސްޕިޓަލުން ބުނެފައިވާކަމަށާއި ނަމަވެސް ހޮސްޕިޓަލް ބިލަށް މިހާރުވެސް 15،000 ޕައުންޑް އަރާފައިވާއިރު ބިލު އިތުރަށް ބޮޑުވަމުން އަންނަކަމަށް ލީސާ ބުނެފައިވެއެވެ.

Advertisement

ޕޯލް، ހޮސްޕިޓަލުގައި އެޑްމިޓްކޮށްފައި 

ލީސާ ބުނެފައިވަނީ އެ ދެމަފިރިން ނިސްބަތްވާ ޤައުމުކަމުގައިވާ އިނގިރޭސިވިލާތުގެ އިންސުއަރަންސް ކަންކަމާގުޅޭ ފަރާތްތަކަށް ލިޔެކިޔުންތައް ފޮނުވާ އެކަމުގެ މަރުހަލާތައްވެސް ފަށާފައިވާކަމަށާއި ނަމަވެސް އެކަމުގެ އަލިމަގެއް ސީދާ ފެންނާނެ ދުވަހެއް ނޭނގޭއިރު ފުރަން އޮތް ފްލައިޓްވެސް މިހާރު ކެންސަލް ކުރަންޖެހި ޚަރަދުތައް އިތުރުވަމުން އަންނަ ކަމަށެވެ.

ޕޯލް ހޮސްޕިޓަލު ބިލު އަވަހަށް ދައްކައި، އެނބުރި އަވަހަށް ޤައުމަށް ދެވޭތޯ ލީސާ ވަނީ "ގޯ ފަންޑް މީ" ކެމްޕޭނެއްވެސް ފަށާފައެވެ. 3،500 ޕައުންޑްގެ އިނީޝިއަލް ޓާގެޓެއް ކަނޑައަޅާފައިވާ އެ ކެމްޕޭނަށް މިހާތަނަށް ގާތްގަނޑަކަށް 1،500 ޕައުންޑް ލިބިފައިވާކަމަށް ދައްކައެވެ.