ހޯމް މިނިސްޓަރ އިމްރާން އަބްދު ﷲ މަގާމުން ވަކިކުރަން އުޅޭ ކަމުގެ އިޝާރާތެއް ވެއްޖެއެވެ.
އަދާލަތު ޕާޓީގެ ރައީސް، މިނިސްޓަރ އިމްރާން ކުރެއްވި ޓްވީޓަކުން މި ފަދަ ކަމެއް ވާން އުޅޭކަން ދޭހަވެއެވެ.
އިމްރާން ކުރެއްވި ޓްވީޓެއްގައި ވިދާޅުވީ، ކާމިޔާބީ ލިބުމަކީ ބޮޑާކަން ދައްކައި އަނެއްކުން ނިކަމެތިކޮށް ހައްގުތަކުން މަހުރޫމް ކުރަންވީ ސަބަބެއް ނޫން ކަމަށެވެ. އަދި ނާކާމިޔާބީ އެއް ލިބުމަކީ ތިމާގެ ޖަމާއަތްތައް ހަލާކުގެ ތެރެއަށް އެއްލާލަންވީ ސަބަބެއް ނޫން ކަމަށް އިމްރާން ވިދާޅުވިއެވެ.
މި މޭރުމުން މިނިސްޓަރ ޓްވީޓް ކުރެއްވި އިރު، ރައީސް އިބްރާހިމް މުހައްމަދު ޞާލިޙްގެ ކެބިނެޓަށް ބަދަލު ގެންނަން އުޅޭކަމަށް ބުނެ ވާހަކަތަކެއް ދެކެވެން ދާ ދަނޑިވަޅެއްގަ އެވެ.
ރައީސް އޮފީހުގެ ޗީފް އޮފް ސްޓާފް، އަލީ ޒާހިރު ސޮއިކުރައްވައި ކޯލިޝަން ޕާޓީތަކުގެ ލީޑަރުންނަށް ފޮނުއްވި ސިޓީގައި ބުނެފައިވަނީ ބައެއް މިނިސްޓްރީތަކުގެ ހިންގުމަށް މުހިއްމު ބަދަލުތަކެއް ގެންނަނީ ސަރުކާރުން ރައްޔިތުންނަށް ވެފައިވާ ވައުދުތައް ވީހާ ވެސް އަވަހަކަށް ފުއްދައި ރައްޔިތުން ބަލައިގަންނަ ފަދަ މަސައްކަތްތަކަށް ހެދުމަށް ކަމަށެވެ. މިކަމުގެ އިތުރު ތަފްސީލެއް އަދި ނުލިބެ އެވެ.
ބައެއް މީޑިއާ ރިޕޯޓުތައް ބުނާގޮތުގައި ވަކި ކުރާ މިނިސްޓަރުންގެ ތެރޭގައި ފިޝަރީޒް މިނިސްޓަރު ޒަހާ ވަހީދު ހިމެނިވަޑައިގެންނަވަ އެވެ. އަދި ކެބިނެޓްގެ ބައެއް މިނިސްޓަރުން އެހެން ވުޒާރާތަކަށް ބަދަލު ކުރަން ހަމަޖެހިފައިވާ ކަމަށްވެ އެވެ.
ކެބިނެޓަށް ބަދަލު ގެންނަން އުޅޭ ވާހަކަ ކޯލިޝަން ޕާޓީތަކުން ދަނީ ދޮގު ކުރަމުންނެވެ. އެގޮތުން ބައެއް ސިޔާސީ ޕާޓީތަކުން ބުނީ އަލީ ޒާހިރު ސޮއި ކުރައްވާ ލީޑަރުންނަށް ފޮނުއްވި ސިޓީގައި ކެބިނެޓަށް ބަދަލު ގެންނަން ވާހަކަ ވިދާޅުވެފައި ނުވާ ކަމަށާއި އޭގައި އޮތީ ސިޔާސީ މަގާމުތަކަށް ބަދަލު ގެންނަ ވާހަކަ ކަމަށެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް