ކޯވިޑާ ގުޅިގެން ދެވޭ ފްރަންޓްލައިން އެލަވަންސް ދޭން ފަށައިފި

‏ކޯވިޑް-19 އާއިގުޅިގެން ދެވޭ ފްރަންޓްލައިން އެލަވަންސް މިއަދު ދޭން ފަށާފައިވާކަމަށް ފިނޭންސް މިނިސްޓްރީން ބުނެފިއެވެ.

އެ މިނިސްޓްރީން ބުނެފައިވާގޮތުގައި އެގޮތުން މިހާތަނަށް 220 ފަރާތަކަށް 2.9 މިލިއަން  ރުފިޔާ ވަނީ ދެވިފައެވެ. މިއީ ރާއްޖެއިން ފުރަތަމަ ކޯވިޑް ފެނުނު ދުވަސްކަމަށްވާ 2020 މާރިޗް 7ން ފެށިގެން ޖޫންމަހުގެ ނިޔަލަށް އެ ފަރާތްތަކަށް ލިބެންވާ ފައިސާ ކަމުގައި އެ މިނިސްޓްރީން ބުނެއެވެ.

އިތުރަށް ބުނެފައިވަނީ އިތުރު ފަރާތްތަކަށް އެލަވަންސް ދިނުމުގެ މަސައްކަތް ވަރަށް ހަލުވިކަމާއެކު ކުރިއަށް އެބަދާކަމަށާއި އެގޮތުން ޑޭޓާ ވެރިފިކޭޝަން އާއި އެޕްރޫވަލްގެ މަސައްކަތް މިހާރު ދަނީ ކުރެވެމުން ކަމަށެވެ. މި މަސައްކަތް ނިމުމާއެކު އިތުރު ފަރާތްތަކަށް އެލަވަންސް ދެވޭނެ ކަމުގައިވެސް ބުނެފައިވެއެވެ.