ފުވައްމުލަކު ސިިޓީގައި ކާފިއު ހިންގާ މުއްދަތު އިތުރު ކޮށްފި

ފުވައްމުލަކު ސިޓީގައި ރޭގަނޑު ކާފިއު ހިންގާ މުއްދަތު އިތުރު ކޮށްފި އެވެ.

ޑިރެކްޓާ ޖެނެރަލް އޮފް ޕަބްލިކް ހެލްތް މައިމޫނާ އަބޫބަކުރު ސޮއި ކުރައްވާ ނެރުއްވާފައިވާ އެންގުމަކުން ކޯވިޑް-19 އިން ރައްކާތެރިވުމަށް އެ ސިޓީގައި އަޅާފައިވާ ފިޔަވަޅުތަކުގެ މުއްދަތު އިތުރު ކޮށްފައިވަނީ ހަތް ދުވަހަށެވެ. މުވައްމުލަކުގައި ކާފިއު ހިންގަން ފެށީ މިމަހުގެ13 ވަނަ ދުވަހު އެވެ.

ފުވައްމުލަކުގައި ކާފިއު ހިންގަނީ ރޭގަނޑު 8:00 ން ފަތިހު 4:00 އަށެވެ. އެ ވަގުތުތަކުގައި އެއްގަމު އުޅަނދު ދުއްވުމާއި އާންމު ތަންތަނަށް މީހުން ނުކުމެ އުޅުމަކީ މަނާ ކަމެއް ކެވެ. އަދި އެ ސިޓީގައި ޕާޓީ ތަކާއި ހަފްލާތަކާއި ރަސްމިއްޔާތުތައް ބޭއްވުމަކީ މަނާ ކަމެކެވެ.

ކާފިއު ނުހިންގާ ވަގުތުތަކުގައި އާންމުތަންތަނުގައި ތިން މީހުންނަށްވުރެ ގިނަ މީހުން އެއްކޮށް އުޅުން ވަނީ މަނާކޮށްފައި އެވެ. ސިއްހީ ފަރުވާ އާއި ޒަރޫރީ ބޭނުމެއްގައި ނުނީ އެއްގެއިން އަނެއް ގެޔަށް ދިއުމާއި މަގުމައްޗަށް ނުކުމެ ނޫޅުމަށް އަންގާފައިވެއެވެ.

އަދި އެއް އަވަށުން އަނެއް އަވަށަށް ދިޔުން ވަނީ މަނާކޮށްފައި އެވެ.

މީގެ އިތުރުން ޔުނިވާސިޓީ، ކޮލެޖު އަދި ސްކޫލްތަކަށް ދަރިވަރުން ހާޒިރު ކޮށްގެން ކިޔަވައިދިނުން ހުއްޓާލުމަށް އަންގާފައިވެ އެވެ. އެޗްޕީއޭގެ އެންގުމާއި އެކު މާދަމާއިން ފެށިގެން އެ ސިޓީގެ ސެލޫންތަކާއި ބޯކޮށާ ތަންތަނާއި ޖިމްތައް ބަންދުކޮށް ކުޅިވަރު ހަރާކާތްތަކާއި ކަސްރަތު ހަރަކާތްތައް ހިންގުން ވަނީ މަނާކޮށްފައި އެވެ.

ކެފޭ ރެސްޓޯރެންޓުތަކުގައި ހިދުމަތް ދިނުން ހުއްޓާލައި ހަމައެކަނި ޑެލިވެރީގެ ހިދުމަތް އެތަންތަނުން ދިނުމަށް އަންގާފައިވެ އެވެ. އެޗްޕީއޭގެ އެންގުމުގައި ބުނެފައިވާ ގޮތުގައި އާންމު ދަތުރުފަތުރުގެ ދަތުރުފަތުރާއި ޓެކްސީގެ ހިދުމަތް ދޭންވާނީ އެޗްޕީއޭގެ ގައިޑްލައިނާއި އެއްގޮތަށެވެ.

މި ފިޔަވަޅު އަޅާފައިވަނީ އާންމު ސިއްހަތު ރައްކާތެރިކުރުމުގެ ގާނޫނުގެ ދަށުން ޑިރެކްޓާ ޖެނެރަލް އޮފް ޕަބްލިކް ހެލްތަށް ލިބިދޭ ބާރުގެ ދަށުންނެވެ.

މި ފިޔަވަޅުތައް ތަންފީޒު ކުރުމަށް ފުލުހުންނާއި ކަމާ ގުޅޭ އިދާރާތަކަށް އެޗްޕީއޭއިން ވަނީ އަންގާފައި އެވެ.