ދޯދިޔާ ސިޔާސަތުތަކުގެ ސަބަބުން އިންވެސްޓަރުންގެ އިތުބާރު ގެއްލިއްޖެ: ޝާހިދު

ދިވެހިރާއްޖޭގެ އިގްތިސާދީ ހާލަތާއި އިންވެސްޓްކުރުމަށް އޮތް މާހައުލާ ގުޅޭގޮތުން ކަންބޮޑުވުން ފާޅުކުރައްވައި، ސަރުކާރުގެ ސިޔާސަތުތަކަށް އެމްޑީޕީގެ ކުރީގެ ރައީސް އަދި ކުރީގެ ފޮރިން މިނިސްޓަރު އަބްދުالله ޝާހިދު ވަރަށް ބޮޑަށް ފާޑުވިދާޅުވެއްޖެއެވެ.

އެކްސް ގައި ކުރެއްވި ޕޯސްޓެއްގައި ޝާހިދު ވިދާޅުވީ، ދެމެހެއްޓެނިވި ގޮތެއްގައި އިގްތިސާދު ކުރިއެރުވުމަށްޓަކައި ވާނުވާ އެނގޭ ފަދަ އުސޫލުތަކަކާއި ގަވާއިދުތަކެއް އޮންނަންޖެހޭ ކަމަށެވެ. ނަމަވެސް، މިހާރު ރާއްޖޭގެ އިގްތިސާދީ މާހައުލުން ފެންނަނީ އެފަދަ ހަމަޖެހުމެއް ނެތް ތަން ކަމަށް އޭނާ ފާހަގަކުރެއްވިއެވެ.

ސަރުކާރުން އެންމެ ފަހުން ނިންމާފައިވާ ނިންމުންތަކަކީ ހަމައެއް ނެތް، ދޯދިޔާ ސިޔާސަތުތަކެއްގެ ނަތީޖާ ކަމަށް ސިފަކުރައްވަމުން ޝާހިދު ވިދާޅުވީ، ސިޔާސަތު އެކުލަވާލުމުގައި އެކަންކަމާ ގުޅުންހުރި ފަރާތްތަކާ އެކަށީގެންވާ މަޝްވަރާއެއް ކުރުމެއް ނެތް ކަމަށެވެ. އެގޮތުން، ކުއްލި ގޮތަކަށް ބޭރު ފައިސާގެ 40 އިންސައްތަ މާރުކުރަން މަޖުބޫރުކުރި ގަވާއިދާއި، އެއާޕޯޓް ޓެކްސްއާއި ގްރީން ޓެކްސް ކުއްލިއަކަށް ބޮޑުކުރުމުގެ އިތުރުން، އެކަށީގެންވާ ރައްކާތެރިކަމުގެ ނިޒާމެއް ނެތި ސަބްސިޑީތައް އުވާލަން ރާވަމުންދާ ކަން އޭނާ ފާހަގަކުރެއްވިއެވެ.

މިފަދަ ފިޔަވަޅުތަކުގެ ސަބަބުން ކަޅު ބާޒާރުގައި ޑޮލަރުގެ އަގު އުފުލި، ގައުމުގެ ބޭނުންކުރެވޭ ބޭރު ފައިސާގެ ރިޒާވް ދެ ހަފުތާއަށްވުރެ ކުރު މުއްދަތެއްގެ އިމްޕޯޓަށް ފުދޭ މިންވަރަށް ދަށްވެގެން ގޮސްފައިވާ ކަމަށް ޝާހިދު ވިދާޅުވިއެވެ. އަދި އިންވެސްޓަރުން ކުރިން އެއްބަސްވެފައިނުވާ ފަދަ އުނދަގޫ ޝަރުތުތަކެއްގެ ދަށުން މަސައްކަތްކުރަން މަޖުބޫރުވެފައިވާ ކަމަށްވެސް އޭނާ ވިދާޅުވިއެވެ.

މިފަދަ އިގްތިސާދީ ހަމަޖެހުމެއް ނެތް މާހައުލެއްގައި އިންވެސްޓަރުންގެ އިއްތިބާރު ދެމެހެއްޓުމަކީ މުސްތަހީލު ކަމެއް ކަމަށް ޝާހިދު ފާހަގަކުރެއްވިއެވެ. ސަރުކާރުން ވަގުތީ ގޮތުން ނެރޭ ސިޔާސަތުތަކުގެ ބަދަލުގައި، އެންމެންގެ މަޝްވަރާއާއެކު އެކުލަވާލެވޭ ހަރުދަނާ ސިޔާސަތުތަކެއް ގާއިމުކުރަންޖެހޭ ކަމަށާއި، މި ހުރިހާ ކަމެއްގައި މި ސަރުކާރު ސީދާ ފެއިލްވެފައިވާ ކަމަށް ވިދާޅުވެ ޝާހިދު ސަރުކާރަށް ފާޑުވިދާޅުވިއެވެ.