ސިއްހީ ކުއްލި ނުރައްކަލުގެ ހާލަތުގެ މުއްދަތު ނުވަ ވަނަ ފަހަރަށް އިތުރުކޮށްފި

ރާއްޖޭގައި އިއުލާނުކޮށްފައިވާ އާންމު ސިއްހަތުގެ ކުއްލި ނުރައްކަލުގެ ހާލަތު ނުވަ ވަނަ ފަހަރަށް އިތުރުކޮށްފި އެވެ.

ސިއްހީ ކުއްލި ނުރައްކަލުގެ ހާލަތު މާޗް 12 ވަނަ ދުވަހު އިއުލާނު ކުރީ ކޯވިޑް-19 އާއި ގުޅިގެންނެވެ. އެ މުއްދަތުއިތުރު ކުރަމުން ގޮސް އޮކްޓޯބަރު ފަސް ވަނަ ދުވަހު އިތުރު ކުރި އެއް މަސްދުވަހުގެ މުއްދަތު ހަމަވެފައިވަނީ މިއަދުގެ ނިޔަލަށެވެ.

ހެލްތް މިނިސްޓަރަކަށް އައްޔަން ކުރައްވާފައިވާ އަހުމަދު ނަސީމް ސޮއި ކުރައްވާ މިއަދު ނެރުއްވާފައިވާ ބަޔާނުގައި ބުނެފައިވަނީ ރާއްޖޭގައި ފުޅާ ދާއިރާއެއްގައި ކޯވިޑް-19 ފެތުރުމުގެ ނުރައްކާ އަދިވެސް އެބައޮތް ކަމަށެވެ. ކޯވިޑް-19ގެ ނުރައްކާ ކުޑަކޮށް، އާއްމުންގެ ސިއްހަތާއި ރައްކާތެރިކަން ކަށަވަރުކުރަން ހާއްސަ ފިޔަވަޅުތަކެއް އަޅަންޖެހޭ ކަމަށް ޑިރެކްޓަ ޖެނެރަލް އޮފް ޕަބްލިކް ހެލްތު މައިމޫނާ އަބޫބަކުރު ލަފާދެއްވާފައިވާ ކަމަށެވެ.

އެހެންވެ ސިއްހީ ކުއްލި ނުރައްކަލުގެ ހާލަތުގެ މުއްދަތު އަންނަ ޑިސެމްބަރު މަހުގެ ފަސް ވަނަ ދުވަހުގެ ނިޔަލަށް އިތުރު ކުރަން ނިންމާފައިވާ ކަމަށެވެ.

ރާއްޖެއިން އެންމެ ފުރަތަމަ ކޯވިޑަށް މީހަކު ޕޮސިޓިވްވީ ހަތެއް މާޗްގައި އެވެ. އޭގެ ފަހުން ޕޮސިޓިވްވެފައިވަނީ ރިސޯޓުތަކުގައި ތިބި ޓޫރިސްޓުންނާއި ރާއްޖެެއިން ބޭރުން އައިސް ކަރަންޓީންގައި ތިބި ދިވެހިންތަކެކެވެ.

މާލޭގައި ބަލި ފެތުރެމުންދާކަން އެނގުނީ އޭޕްރިލް 15 ގައި އެވެ. އޭގެ ފަހުން އަތޮޅު ތެރެއިންވެސް ބަލި ފެނިފައިވެ އެވެ.

ރާއްޖެއިން މިހާތަނަށް ކޯވިޑް-19 އަށް 11،822 މީހަކު ޕޮސިޓިވްވެފައިވެ އެވެ. އަދި މި ބަލީގައި 38 މީހަކު މަރުވެފައިވެ އެވެ.