ކާރެއްގެ ތެރެއަށް ތުއްތު ކުއްޖަކު ހޮނޑުލެވުނު ހާދިސާއާ ގުޅުވައިގެން ޑްރައިވަރު ރުފިޔާއަށް ޑިމާންޑްކޮށް، އަމަލުކޮށްފައިވާ ގޮތްކަމަށް ބުނެ ސޯޝަލް މީޑިއާގައި ފަތުރަމުންދާ ވާހަކައިގެ ހަގީގަތް ނަލަ ޓެކްސީ ސެންޓަރުން ހާމަކޮށްފި އެވެ.

ސޯޝަލް މީޑިއާގައި އަންހެނަކު ޖަހާފައިވާ ޕޯސްޓެއްގައި ބުނެފައިވަނީ އޭނާ ޓެކްސީ ނެގީ ހުޅުމާލޭ ފޭސް ދޭކުން ޖެޓީ ނަމްބަރު 7 އަށް ދާށެވެ. ތިން ކުދިން ގޮވައިގެން ކުރި އެ ދަތުރުގެ ތެރެއިން ހޮޑުލެވުނީ އެއް އަހަރުގެ ކުއްޖާއަށް ކަމަށާއި ހޮޑުލެވުމުން ޑްރައިވަރު ޝީޓު ސާފު ކުރަން 1500 ރުފިޔާއަށް ޑިމާންޑު ކުރި ކަމަށް ބުނެފައިވެ އެވެ.

Advertisement

މިކަމާއި ގުޅިގެން އެ ސެންޓަރުން މިއަދު ބުނީ އިއްޔެ ހަވީރު ކުރި އެ ދަތުރު ނަގާފައިވަނީ ނަލަ ޓެކްސީ އެޕްލިކޭޝަން މެދުވެރިކޮށް ކަމަށެވެ. އެ ކުއްޖާއަށް ކާރު ތެރެއަށް ހޮޑުލެވިއްޖެ ކަމަށް ކަސްޓަމަރު ބުނީ ބްރިޖް ޓްރެފިކް ލައިޓާއި ހިސާބުން ކަމަށާއި ކޮތަޅު ހުރިތޯ އޭގެ ފަހުން ސުވާލު ކުރި ކަމަށެވެ.

ޑްރައިވަރު ކޮތަޅު ހުންނާނެ ކަމަށް ބުނުމަށް ފަހު އާންމުކޮށް ޝީޓު ސާފު ކުރަން 1500 ރުފިޔާ ވަރު ތަންތަނުން ނަގާ ކަމަށް ކަސްޓަމަރު ކައިރީ ބުނި ކަމަށް ޑްރައިވަރާ ހަވާލާދީ ސެންޓަރުން މައުލޫމާތުދެ އެވެ. އެހެން ބުނުމާއި އެކު ކަސްޓަމަރު މީހަކަށް ގުޅައި އެމީހާ އާއި ޑްރައިވަރާއި ވާހަކަ ދެއްކުމުން އެމީހާ އެދުނީ ކަސްޓަމަރު ބޭނުންވި ތަނަށް ގެންދިއުމަށް ފހު ގުޅި މީހާ ބުނާ ތަނަކަށް ކާރު ސާފު ކުރަން ދިއުމަށެވެ.

ޑްރައިވަރު ކަންތައް ކުރީ އެގޮތަށްކަން ފާހަގަ ކުރަމުން ޓެކްސީ ސެންޓަރު ބުނީ ގުޅި މީހާ ބުނެގެން ދިޔަ ތަނުން އެވަގުތު ކާރު ސާފުކޮށްދެވެން ނެތް ކަމަށް ބުނި ކަމަށެވެ. އެހެންވެ ޖެހިގެން ހުރިތަނާ ވާހަކަ ދެއްކުމުން ކާރު ސާފުކޮށްދޭން އެއްބަސްވީ 1600 އަށް ނަމަވެސް އެ އަގު 1000 ރުފިޔާއަށް ކުޑަކޮށްދިން ކަމަށެވެ. 

ސެންޓަރުން ބުނީ އެހުރިހާ ކަމެއް ހިނގިއިރުވެސް ޑްރައިވަރު ދިޔައީ ދަތުރުގެ ތެރެއިން ކަސްޓަމަރު ގުޅި ފަރާތާ ފޯނުން ގުޅައިގެން ވާހަކަ ދައްކަމުންކަމަށް ބުންޏެވެ. އަދި ކާރު ޝީޓް ސާފުކުރުމަށް 1000 ރުފިޔާ ނަގާފައިވަނީ ފޯނުުން ގުޅައިގެން ވާހަކަ ދައްކަމުންދިޔަ ފަރާތާއި ޑްރައިވަރާ ވާހަކަ ދެެކެވި އެއަގަށް އެއްބަސްވެގެންކަމަށް ބުނެފައިވެ އެވެ.

ހަމައެއާއެކު، ސާފުކުރުމުގެ މަސައްކަތް ކުރަމުންދިޔަ ފޮޓޯވެސް ފޯނުން ވާހަކަ ދައްކަމުންދިޔަ ފަރާތާ ހިއްސާކޮށްފައިވާ ވާކަމަށް ބުނެފައިވެ އެވެ. އަދި ޝީޓް ސާފުކުރުމަށް ފައިސާ ލިބުނު ނަމަވެސް، ސާފުކުރުމަށް ދިޔަ ހަރަދު ފިޔަވައި ކަސްޓަމަރު ކުރި ދަތުރުގެ އަގުވެސް ޑްރައިވަރަށް ލިބިފައި ނުވާކަމަށް ނަލަ ޓެކްސީން ބުންޏެވެ.

މިކަމުގައި ދެފަރާތުންވެސް ވާހަކަ ދައްކައިގެން ގޮތަށްކަށް އެއްބެސްވެ، ކަންކަން ކުރުމަށްފަހު ޑްރައިވަރާއި ސެންޓަރުގެ އަގު ވެއްޓޭގޮތަށް ސޯޝަލް މީޑިއާގައި ހަގީގަތް އޮޅޭގޮތަށް ވާހަކަތައް ފެތުރުމަކީ އެ ސެންޓަރުން ކަންބޮޑުވާ ކަމެއް ކަމަށް ބުނެފައިވެ އެވެ.