ފަލަސްތީނުގެ ހުޅަނގު އައްސޭރީގެ އެކި ސަރަޙައްދުތަކުގައި ޒައިތޫނި ކަނޑަމުން ދިޔަ ފަލަސްޠީނު ދަނޑުވެރީންނަށް އިސްތިއުމާރީ އިޒްރޭލުން ދިން ހަމަލާތަކުގައި 16 މީހަކަށް އަނިޔާވެ 40 އަހަރަށް ވުރެ ދުވަސްވީ 55 ޒައިތޫނި ގަސް އަންދައިލައިފިއެވެ.

ފަލަސްޠީނު ރެޑް ކްރެސެންޓުން ބުނި ގޮތުގައި ނާބުލުސްގެ އުތުރުގައި އޮންނަ ސެބާސްޓިއާގެ ދަނޑެއްގައި ޒައިތޫނި ބިންނަމުން ދިޔަ ފަސް ފަލަސްޠީނު ރައްޔިތަކަށް އިސްތިއުމާރީ ބާރުތަކުން ތެޅުމުގެ ސަބަބުން އަނިޔާ ލިބިފައިވާ ކަމަށެވެ. އޭގެ އިތުރުން ނާބުލުސްގެ ދެކުނުގައި އޮންނަ ޢަސީރާ އަލްޤިބްލިއްޔާގައި ތިން މީހަކަށް އަނިޔާވި އިރު ކައިރީގައި އޮންނަ ބައިތު އިމްރީންގައި ޕެޕާ ސްޕްރޭ ޖެހުމުގެ ސަބަބުން ދެ މީހަކަށް އަނިޔާ ލިބުނު ކަމަށް އެ ޖަމިއްޔާއިން ބުނެފައިވެއެވެ.

ޖެނީންގެ އިރުމަތީގައި އޮންނަ ޢައްރާބޫނާގައި ދަނޑުވެރިއަކަށް ވެސް ހަމަލާދީ ޒަޚަމްކޮށްލާފައިވާ ކަމަށް ހަމަ އެ މަސްދަރުން ހާމަކޮށްފައިވެއެވެ.

ފަލަސްޠީނުގެ ރަސްމީ ޚަބަރު ފަތުރާ އިދާރާ ވަފާއިން ރިޕޯޓުކޮށްފައިވާ ގޮތުގައި ރާމަﷲގެ ހުޅަނގު އުތުރުގައި އޮންނަ ރަންތީސް އަވަށުގެ ތީން އައްޝާމީ ސަރަޙައްދުގައި ފިރިހެނަކާއި އޭނާގެ އަންހެނުންނާއި ދަރީންނަށް ލަޓިބުރިންނާއި ހަތިޔާރުންނާއި ޕެޕާ ސްޕްރޭ ޖަހައި ހަމަލާ ދީ ޢާއިލާގެ ފަސް މެންބަރުން ޒަހަމް ކޮށްލާފައިވާ ކަމަށެވެ. އެ ހަމަލާގެ ތެރޭގައި އެ ޢާއިލާގެ އަންހެން މީހާގެ ގައި މައްޗަށް އުޅަނދެއް ވެސް އެރި ކަމަށް ވަފާއިން ރިޕޯޓުކޮށްފައިވެ އެވެ.

ޤުދުސްގެ ދެކުނު އިރުމައްޗަށް އޮންނަ އަބޫ ދީސްގެ ފަލަސްޠީނު ބިމެއްގައި 40 އަހަރަށް ވުރެ ގިނަ ދުވަސްވީ 55 ޒައިތޫނި ގަސް އިސްތިއުމާރީ ބާރުތަކުން އަންދައިލީ ދަނޑުވެރިއަކު އޭނާގެ ޢާއިލާއާ އެކު ޒައިތޫނި ކަނޑަމުން ދިޔަ ވަގުތު ކަމަށް ވަފާއިން ރިޕޯޓުކޮށްފައިވެއެވެ. 

ރިޕޯޓުތައް ބުނާގޮތުގައި މި ހަމަނުޖެހުން ފެށުނީ އިޒްރޭލުން ގަދަކަމުން ހުޅަނގު އައްސޭރީގައި ވަޒަންވެރިކުރުވަމުންދާ މީހުން މޫނު ނިވާކޮށްގެން ގޮސް ޒައިތޫނި ގަސްތަކަށާއި ޒައިތޫނި ބިންނަން ތިބި މީހުންނަށް ހަމަލާ ދިނުމުންނެވެ. އިޒްރޭލު ސިފައިން ހަމަލާދޭން ފެށީ އެމީހުންނަށް އެއްބާރުލުން ދިނުމުގެ ގޮތުން ކަމަށް ބުނެފައިވެ އެވެ.

ކޮންމެ އަހަރެއްގެ އޮކްޓޫބަރު ކުރީކޮޅުން ފެށިގެން ނޮވެމްބަރު ފަހުކޮޅާ ހަމައަށް ދެމިގެންދާ ޒައިތޫނި ކެނޑުމުގެ މޫސުމަކީ ފަލަސްޠީނުގެ އެންމެ މުހިންމު އެއް ދަނޑުވެރިކަމުގެ އަދި އިޤުތިޞާދީ މޫސުމެވެ. މި މޫސުމާ ދިމާކޮށް ދަނޑުވެރީންނަށް ހަމަލާ ދިނުމާއި ދަނޑުބިންތަކަށް ވަނުން ހުއްޓުވުމާއި ގަސް ކޮނެ ނެގުމާއި ނައްތައިލުން ފަދަ ކަންކަން ކޮންމެ އަހަރަކު ވެސް އިތުރުވެއެވެ.

ފަލަސްޠީނުގެ ކޮލޮނައިޒޭޝަން އެންޑް ވޯލް ރެޒިސްޓެންސް ކޮމިޝަނުން ހާމަކޮށްފައިވާ ގޮތުގައި 2026 ވަނަ އަހަރުގެ ފުރަތަމަ ހަ މަސް ދުވަހުގެ ތެރޭގައި ހުޅަނގު އައްސޭރީގައި 45000 އަށް ވުރެ ގިނަ ގަސް ކަނޑައި ހަލާކުކޮށްލާފައިވާ އިރު އެ ތެރެއިން 26000 އަށް ވުރެ ގިނައީ ޒައިތޫނި ގަހެވެ.

އެ ކޮމިޝަނުން ހުކުރު ދުވަހު ޢާންމުކުރި ތަފާސް ހިސާބުތައް ދައްކާ ގޮތުން ސެޕްޓެމްބަރު މަހު ހުޅަނގު އައްސޭރީގެ އެކި ހިސާބުތަކުގައި 647 ހަމަލާ ދީ ތިން ފަލަސްޠީނު ރައްޔިތަކު ޝަހީދުކޮށްލާފައިވެއެވެ.

ރަސްމީ ފަލަސްޠީނު ތަފާސް ހިސާބުތައް ދައްކާ ގޮތުން އިރުމަތީ ޤުދުސް ހިމެނޭހެން ހުޅަނގު އައްސޭރީގައި ޣައިރު ޤާނޫނީ 194 އާބާދީއާއި 400 އައުޓްޕޯސްޓުގައި ގާތްގަނޑަކަށް 750000 އިސްތިއުމާރީ އިޒްރޭލު މީހުން ދިރިއުޅެއެވެ.