ނުރައްކާތެރި ގޮތްގޮތަށް އުޅަނދު ދުއްވާ މީހުންގެ ތެރޭގައި ދައުލަތުގެ އިދާރާތަކާއި ކުންފުނިތަކުގެ މުވައްޒަފުން ހިމެނޭކަން ފާހަގަކުރެވިފައިވާ ކަމަށާއި އެ ފަރާތްތަކާ މެދު އިދާރީ ފިޔަވަޅު އެޅުމަށް ކަމާ ގުޅޭ މުއައްސަސާތަކަށް މައުލޫމާތު ހިއްސާކުރާނެ ކަމަށް ފުލުހުން މިއަދު ބުނެފިއެވެ.

ފުލުހުން ނެރުނު ބަޔާނެއްގައި ބުނެފައިވާ ގޮތުގައި ނުރައްކާތެރިކޮށް ދުއްވާ މީހުން ދެނެގަނެ އެ ފަރާތްތަކުގެ މައުލޫމާތު ޕްރޮފައިލްކުރުމުގެ މަސައްކަތް މިހާރު ކުރިއަށް ގެންދާ ކަމަށެވެ. އެގޮތުން ފުރަތަމަ ފިޔަވަޅެއްގެ ގޮތުން ފުލުހަށް ހާޒިރުކޮށް ނަސޭހަތް ދިނުމަށްފަހު ތަކުރާރުކޮށް އެ އަމަލުތައް ހިންގާ ފަރާތްތައް ޖޫރިމަނާކުރުމުގެ އިތުރުން އިތުރު އިންޒާރެއް ނެތި ޖިނާއީ ތަހުގީގު ހިންގާނެ ކަމަށް އެ ބަޔާނުގައި ފާހަގަކޮށްފައިވެއެވެ.

Advertisement

ފިޔަވަޅު އެޅުމަށް ހަމަޖެހިފައިވާ އަމަލުތަކުގެ ތެރޭގައި ޒިގްޒެގްކޮށް ދުއްވުމާއި ސައިލެންސަރު އަޑުގަދަކޮށް ބަދަލުގެނެސް ދުއްވުމާއި ހަރު ބިންމަތީގައި ގާނަމުން ދުއްވުމާއި ސްޕީޑް ބަމްޕަރަށް މަޑުނުކޮށް ބާރު ސްޕީޑުގައި ދުއްވުން ހިމެނެއެވެ. އޭގެ އިތުރުން ހުއްދަ ނެތި ރޭސް ޖެހުމާއި ހުނަރު ދެއްކުމާއި ނުރައްކާތެރިކޮށް އޯވާޓޭކްކުރުމާއި މަސްތުގެ ހާލަތުގައި ދުއްވުމާއި ފުލުހުން މަޑުކުރުމަށް އެންގުމުން ނުހުއްޓި ފިލަން މަސައްކަތްކުރާ މީހުންނާ މެދުގައި ވެސް ފިޔަވަޅު އެޅޭނެ ކަމަށް އެ ބަޔާނުގައިވެއެވެ. ދުއްވި މީހާގެ އިތުރުން އުޅަނދުގެ ވެރިފަރާތާ މެދު ވެސް ފިޔަވަޅު އެޅޭނެ ކަމަށް ފުލުހުން ހަނދާންކޮށްދީފައިވެއެވެ.

ފުލުހުން މި ބަޔާން ނެރެފައި މިވަނީ ސޯސަން މަގުގައި ދާދި ފަހުން ހިނގި ނުރައްކާތެރި އެކްސިޑެންޓެއްގައި ޒުވާން އަންހެނަކު ނިޔާވެފައިވަނިކޮށެވެ. އެ ހާދިސާގައި ޒިގްޒެގްކޮށް ދުއްވަމުން އައި ސައިކަލެއް ޖެހިގެން ނިޔާވި މީހާގެ ގައިގައި ޖެހުނީ ލައިސެންސް ނެތި ދުއްވަމުންދިޔަ ސައިކަލެއް ކަމަށާއި އެ ސައިކަލް ދުއްވި މީހާ މި އަހަރު ހަތަރު ފަހަރު ހުއްޓުވައި ޖޫރިމަނާ ކޮށްފައިވާ ކަމަށް ފުލުހުން ބުނެފައިވެއެވެ. އެ މައްސަލައާ ގުޅިގެން އެ މީހާ ހައްޔަރުކޮށް ބަންދުކޮށްފައިވެއެވެ.