އިންޑިއާގެ ޓެމިލް ނާޑޫގެ ނާގެރްކޮއިލްގައި ދިރިއުޅޭ ސޯޝަލް މީޑިއާ އިންފުލުއެންސަރެއް ކަމަށްވާ މަދުމީތާ އާއި އޭނާގެ ފިރިމީހާ ވިނޯތް ކުމާރުގެ ގެއިން ގާތްގަނޑަކަށް އެއް ކްރޯޑް ރުޕީސްގެ ރަނާއި ޖަވާހިރާއި ފައިސާ ވަގަށް ނަގައިފިއެވެ.

އެ ދެމަފިރިންނަކީ ސޯޝަލް މީޑިއާގައި ބިޒްނަސް އެކައުންޓު ހަދައިގެން ކޮންޓެންޓު ކްރިއޭޓަރުންގެ ގޮތުުގައި ވީޑިއޯ ހަދައި އާންމު ކުރާ ބައެކެވެ. އެމީހުންގެ ގިނަ ވީޑީއޯގައި ފެންނަނީ އެމީހުން ގަންނަ އަގުބޮޑެތި ތަކެއްޗާއި ލިބިފައިވާ މުއްސަނދިކަމާއި މިލްކިއްޔާތުގައި ހުރި ތަކެތި ކަމަށްވެ އެވެ.

Advertisement

ރިޕޯޓުތައް ބުނާ ގޮތުގައި އެންމެ ފަހުން އެމީހުން މިހަފްތާ ތެރޭގައި އާންމު ކުރި ވީޑިއޯގައި ފެންނަނީ ބަރު ބޮޑެތި ގަހަނާތަށް އަތަށް ނަގައިގެން ދައްކައި ފައިސާތައް ގޭތެރޭގައި އުކާތަނެވެ. އަދި ދެމީހުން ލިބިފައިވާ ތަނަވަސްކަން ދައްކައި މީހުންގެ ސަމާލުކަން ހޯދަން  މުޅި ގޭތެރޭގައި ދުވެ މަޖާނަގާތަން ފެނެ އެވެ.

ރިޕޯޓުތައް ބުނާގޮތުގައި އެ ވީޑިއޯ އާންމު ކުރިތާ އެއް ދުވަސް ފަހުން އެ އާއިލާއިން ވަނީ ގެއިން ވައްކަން ކުރި ކަމުގެ ރިޕޯޓުކޮށްފައި އެވެ. ވަގުން ގެއަށް ވަތްކަމަށް ވަނީ ދެމަފިރިންނާއި ކުދިން ގޭގައި ނެތް ވަގުތު ވަރަށް ބޮޑަށް ބަލައި ދިރާސާ ކުރުމަށް ފަހު އެވެ.

ފުލުހުންނާއި ހަވާލާދީ މީޑިއާގައި ރިޕޯޓުކޮށްފައިވާ ގޮތުގައި ރަނާއި އަލިމަހުގެ ގަހަނާތަކާއި އެތައް ލައްކަ ނަގުދު ފައިސާ ވަނީ ފޭރިގެންފައެވެ. މަދޫމިތާ މީޑީއާގައި ބުނީ ގެއިން ވަގަށް ނެގި ތަކެތީގެ އަގު އެއް ކްރޯޑް އިންޑިއަން ރުޕީސްއަށްވުރެ ގިނަ ވާނެ ކަމަށެވެ.

ފުލުހުން މިހާރު ދަނީ ސީސީޓީވީ ފުޓޭޖުގެ އިތުރުން އެ ދެމަފިރިންގެ ސޯޝަލް މީޑިއާ ޙަރަކާތްތައް ބަލައި ތަޙުޤީޤުކުރަމުންނެވެ. ފުލުހުން ބަލަމުން ދަނީ އެ ދެމަފިރިން ޕޯސްޓުކުރި ކޮންޓެންޓުގެ ޒަރީޢާއިން ވަގުންނަށް އެ ގޭގައި ހުރި އަގު ބޮޑު ތަކެއްޗާއި ދެމަފިރިންގެ ހެލިފެލިވެ އުޅުން ދެނެގަނެވިފައިވޭތޯ ކަމަށްވެ އެވެ.

ސޯޝަލް މީޑިއާގައި ތިމާގެ މުދަލާއި ހުންނަ ތަނާއި ދިރިއުޅުމުގެ ތާވަލު ޢާންމުކޮށް ހިއްސާ ކުރުމުން ވެރިފަރާތަށް ނޭނގި މީހުންނަށް ގިނަ މަޢުލޫމާތު ލިބިދާނެކަން މިކަމުން އެނގޭ ކަމަށް ބުނެ ސަމާލުވުމަށް އިންޑިއާ ފުލުހުން އިލްތިމާސްކޮށްފައިވެ އެވެ.