ބޮޑުތަކުރުފާނު މަގު ޒަމާނީ ފެންވަރަށް ތަރައްޤީކުރުމުގެ މަޝްރޫޢުގެ ދަށުން ސުނާމީ ބިނާއިން ފެށިގެން އެމްޕީއެލްއާ ދެމެދު ހުރި އުޅަނދުތަކާއި ތަކެތި ނަގަން ހައުސިން މިނިސްޓްރީން އަންގައިފި އެވެ.

އެ މިނިސްޓްރީން ބުނީ އެ ސަރަޙައްދުގައި މަގު ހެދުމުގެ ޢަމަލީ މަސައްކަތް ފެށުމަށް ވަނީ ތައްޔާރުވެފައެވެ. އެހެންވެ އަންނަ ހޮނިހިރު ދުވަހުގެ ކުރިން އުޅަނދުތައް ނެގުމަށް ވަނީ އަންގާފައި އެވެ.

Advertisement

އެ މިނިސްޓްރީން ނެރުނު އިޢުލާނުގައި ބުނެފައިވާ ގޮތުން ކަނޑައަޅާފައިވާ ތާރީޚުގެ ފަހުން ނުނަގައި ހުންނަ އުޅަނދުފަހަރާއި ތަކެތި ހައުސިން މިނިސްޓްރީން ނަގާނެ އެވެ.

މީގެ އިތުރުން ބޮޑުތަކުރުފާނު މަގު ތަރައްގީ ކުރުމުގެ ތިންވަނަ ފިޔަވަހީގެ މަސައްކަތް ފެށުމަށްޓަކައި ވެސްޓް ޕާކު ސަރަޙައްދު މިހާރު ވަނީ ބަންދުކޮށްފައެވެ. ނޯތު ހާބަރުން ފެށިގެން އެމްޕީއެލްއާ ދެމެދު ބާކީ އޮތް ބައި ތަރައްޤީކުރުމުގެ މަސައްކަތް ފެށުމަށް ހަމަޖެހިފައި ވަނީ ވިޔަފާރި ބަނދަރު ތިލަފުއްޓަށް ބަދަލުކުރެވުމުންނެވެ.

މިދިޔަ އަހަރުގެ އޮގަސްޓް މަހު ފެށި މި މަޝްރޫޢުގެ ފުރަތަމަ ފިޔަވަހީގައި މަސް މާރުކޭޓު ކައިރިން ޖުމްހޫރީ މައިދާނުގެ މެދަކާ ހަމައަށް އެއްގަމު ތޮށި ބޭރަށް ޖައްސައި މަގު ހަތަރު ލޭނަށް ފުޅާކޮށް ތާރު އަޅާފައިވެއެވެ. ދެވަނަ ފިޔަވަހީގައި ޖުމްހޫރީ މައިދާނުން ހެންވޭރު ފެރީ ޓާމިނަލާ ހަމައަށް ވެސް މަގު ވަނީ ފުޅާކޮށްފައެވެ.