އައްޑޫ ސިޓީގެ ކަރަންޓުގެ ހިދުމަތާއި ސްޓެލްކޯއިން ރަސްމީކޮށް ހަވާލުވެއްޖެ އެވެ.

މިހާތަނަށް އެ ސިޓީގައި ކަރަންޓުގެ ހިދުމަތް ދެމުން އައީ ފެނަކަ ކުންފުނިންނެވެ. ނަމަވެސް ރައީސް ޑރ. މުހައްމަދު މުއިއްޒު ވަނީ ސަރުކާރު ކުންފުނިތަކުގެ ހިންގުމަށް ގެންވަމުންދާ ބަދަލުގެ ތެރެއިން ފެނަކަ އުވާލައި އެ ކުންފުނީގެ ދަށުން އަތޮޅު ތެރޭގައި ހިންގި ހުރިހާ އިންޖީނުގެތަކެއް ސްޓެލްކޯގެ ދަށަށް ބަދަލު ކުރަން ނިންމަވާފައި އެވެ.

Advertisement

ސްޓެލްކޯއިން މިއަދު ބުނީ އެ ސިޓީގެ ކަރަންޓު ހިދުމަތާއި އެ ކުންފުނިން ރަސްމީކޮށް ހަވާލުވި މެނޭޖިން ޑިރެކްޓަރު ޑރ. އަލީ އަޒުވަރާއި އިސްވެރިން އެ ސިޓީއަށް ކުރެއްވި ރަސްމީ ދަތުރުގެ ތެރެއިން ކަމަށެވެ. މި ދަތުރުގައި އެ ޓީމް ވަނީ އައްޑޫ ސިޓީގެ ހުރިހާ އަވަށެއްގެ އިންޖީނުގެ ގެތަކަށް ޒިޔާރަތްކޮށް މުވައްޒަފުންނާއި ބައްދަލުކޮށް، ސްޓެލްކޯގެ ދިދަ އިންޖީނު ގެތަކުގައި ނަގާފައި އެވެ.

އެ ޒިޔާރަތުގެ ތެރެއިން ހިތަދޫގައި ބޭއްވި ރަސްމިއްޔާތުގައި ވާހަކަ ދައްކަވަމުން ޑރ. އަޒުވަރު ވަނީ މީގެ 17 އަހަރު ކުރިން ސްޓެލްކޯއިން އައްޑޫ ސިޓީގައި ކަރަންޓުގެ ޚިދުމަތް ދެމުން އައިކަން ފާހަގަކުރައްވާފައި އެވެ. އޭނާ ވިދާޅުވީ އެ ސިޓީގެ ކަރަންޓުގެ ޚިދުމަތް އަލުން އަނބުރާ ސްޓެލްކޯއާ ޙަވާލުކުރެއްވުމަށް ރައީސް ނިންމެވި ނިންމެވުމަކީ އައްޑޫގެ ރައްޔިތުންނަށް އިތުބާރުހުރި، ދެމެހެއްޓެނިވި ޚިދުމަތެއް ކަށަވަރުކޮށްދެއްވުމަށް އެޅުއްވި މުހިންމު ފިޔަވަޅެއްކަމަށެވެ.

އޭނާ ވިދާޅުވީ ޒަމާނީ ވަސީލަތްތަކާއި އެކު ދެމެހެއްޓެވނިވި ފެންވަރުގެ ހިދުމަތެއް ރައްޔިތުންނަށް ފޯރުކޮށްދޭން ސްޓެލްކޯއިން މަސައްކަތް ކުރާނެ ކަމަށެވެ.

ޑރ. އަޒުވަދުގެ ޒިޔާރަތުގައި އެ ސިޓީގެ އަވަށްތަކުގެ އިންޖީނު ގޭގެ ހާލަތާއި ކަރަންޓު އުފެއްދުމުގެ ނިޒާމު ހުރިގޮތް ބައްލަވާފައިވެ އެވެ.