ޔުނައިޓެޑް އެރެބް އެމިރޭޓްސް (ޔޫއޭއީ) ގެ ދުބާއީން އިސްތިއުމާރީ އިޒްރޭލަށް ދަތުރުކުރި ފްލައިޑުބާއީގެ ފްލައިޓެއް ކުއްލި ހާލަތުގައި ސައޫދީ ޢަރަބިއްޔާގެ ތަބޫކު އެއާޕޯޓަށް ޖައްސައިފިއެވެ.

ޢާންމުކޮށް ބެލެން ހުރި ފްލައިޓް ޓްރެކިން ޑޭޓާ ދައްކާ ގޮތުން ބުދަ ދުވަހު ދުބާއީން ފުރިތާ ކުޑައިރުކޮޅެއް ތެރޭ އެ ބޯޓުން ކުއްލި ހާލަތުގެ ސިގުނަލެއް ފޮނުވާފައިވެއެވެ. ފްލައިޓްރޭޑާ24 ވެބްސައިޓުގެ މަޢުލޫމާތަށް ބަލާއިރު ގާތްގަނޑަކަށް 34,000 ފޫޓުގައި އޮތް ބޯޓު އެންމެ މިނެޓެއް ތެރޭ 17,000 ފޫޓަށްވުރެ ތިރިއަށް ވެއްޓުނެވެ.

Advertisement

ފްލައިޑުބާއީން ބުނީ "ދަތުރުމަތީގައި ހާދިސާއެއް ދިމާވި" ކަމަށާއި ސައޫދީގެ އަސްކަރީ އަދި މަދަނީ ބޭނުންތަކަށް ހިންގާ ތަބޫކު އެއާޕޯޓަށް ރައްކާތެރިކަމާ އެކު ޖެއްސި ކަމަށެވެ. އަދި އެއްވެސް ފަސިންޖަރަކަށް ގެއްލުމެއް ނުލިބޭކަމަށް ބުނެފައިވެ އެވެ.

އެ އެއާލައިނުން ހާދިސާގެ ތަފްސީލް އަދި ހާމައެއް ނުކުރެ އެވެ.

އިޒްރޭލުގެ މީޑީއާ ރިޕޯޓުތައް ބުނާގޮތުގައި ބޯޓުން ކުއްލި ހާލަތުގެ އެލާޓު ފޮނުވައި އެމަޖެންސީގައި ސައުދީއަށް ޖެއްސީ ޕައިލެޓުންގެ މެދުގައި ހިނގި ކުރިމަތިލުމުމަކަށް ފަހު އެވެ. ބޯޓުގައި ތިބި ފަސިންޖަރުން އިސްރާއީލުގެ ޗެނަލް 12 އާ ފޯނުން ވާހަކަދައްކަމުން ބުނެފައިވާގޮތުގައި ބޯޓުގެ ކުރީ ބައިން ހަޅޭކުގެ އަޑު އިވުނު ކަމަށެވެ.

ދެ ޕައިލެޓުންގެ މާރާމާރީ ހުއްޓުވި ކަމަށްވަނީ ފަސިންޖަރުންނެވެ. ބައެއް މީޑީއާ ރިޕޯޓުތައް ބުނާގޮތުގައި އެއް ޕައިލެޓަކު މަސައްކަތް ކުރީ ފްލައިޓު ވައްޓާލައިގެން އަމިއްލައަށް މަރުވާށެވެ. މާރާމާރީ ހިނގީ އަނެއް ޕައިލެޓު އެކަން ހުއްޓުވަން އުޅުމުގެ ތެރޭގައި ކަމަށާއި ފަސިންޖަރުންގެ ޓީޝާޓުގައި ލޭ އުނގުޅުނީ އެ ދެމީހުން ވަޅިން ހަމަލާދީ ޒަހަމްވެފައި ވަނިކޮށް ހުއްޓުވަން އުޅުމުގެ ތެރޭގައި ކަމަށްވެ އެވެ.

ދެ ޕައިލެޓުންނަކީ ރަޝިއާ އާއި ޔޫކްރެއިންގެ ޕައިލެޓުންނެވެ.

އިސްރާއީލުން ބުނީ ސައޫދީ ޢަރަބިއްޔާގައި ތިބި އިސްރާއީލު ފަސިންޖަރުން ރައްކާތެރިކަމާ އެކު އަނބުރާ ގެނައުމުގެ މަސައްކަތް ރާވަމުންދާ ކަމަށެވެ. މި ހާދިސާގައި މުއާމަލާތް ކުރުމަށް އުނދަގޫތަކެއް ދިމާވަމުންދާ ކަމަށް ރިޕޯޓުތައް ބުނެ އެވެ. އެއީ ސައުދީ އާއި އިޒްރޭލަކީ ސިޔާސީ ގުޅުން ގާއިމްކޮށްފައިވާ ދެ ގައުމަށް ނުވާތީ އެވެ.

2020 ވަނަ އަހަރު ޔޫއޭއީ އާއި އިސްރާއީލުގެ ގުޅުން ރަސްމީކޮށް ޤާއިމުކުރި ފަހުން ޔޫއޭއީ ވެފައިވަނީ އިސްރާއީލު ފަތުރުވެރީންގެ މެދުގައި މަޤުބޫލު މަންޒިލަކަށެވެ. މި ދަތުރު ފެށި ދުބާއީ އިންޓަނޭޝަނަލް އެއާޕޯޓަކީ މެދުއިރުމަތީގެ އެންމެ ބާރުބޮޑު ދުނިޔޭގެ ބައިނަލްއަޤުވާމީ ދަތުރުގެ ގޮތުން އެންމެ ބޮޑު ވައިގެ ބަނދަރެވެ.