ވެލާނާ އިންޓަނެޝަނަލް އެއާޕޯޓު (ވީއޭއައި) ގައި ބޮމެއް ގެންގުޅުނު ކަމަށް ބުނެގެން ހައްޔަރުކޮށްފައި ހުރި މިޞްރުގެ ޑޮކްޓަރު ޕީޓާ ސަމާން މަރްޒޫކް ނަމަކަށް ކިޔާ މީހާ އެ ޤައުމުގެ ޚާރިޖީ ވުޒާރާގެ މަސައްކަތުން މިނިވަންވެ މިޞްރަށް އެނބުރި ގޮސްފިއެވެ.

މިޞްރުގެ ފޮރިން މިނިސްޓަރު ބަދުރު ޢަބްދުލްޢައްޠީ ވަނީ ސްރީލަންކާގައި ހުންނަ މިޞްރު އެމްބަސީ މެދުވެރިކޮށް ރާއްޖޭގެ ކަމާ ގުޅޭ ފަރާތްތަކާ މުޢާމަލާތްކޮށް ޑރ. މަރުޒޫކަށް ކޮންސިއުލާ އެހީތެރިކަން ފޯރުކޮށްދިންކަން މިސްރު މީޑިއާގައި ކަށަވަރުކޮށްދީފައި އެވެ. ސްރީލަންކާގައި ހުންނަ މިޞްރު އެމްބަސީއަކީ ރާއްޖޭގައި ވެސް މިޞްރު ތަމްސީލުކުރާ އެމްބަސީއެވެ.

Advertisement

ރިޕޯޓުތައް ބުނާގޮތުގައި މިނިސްޓަރު ވަނީ ޑޮކްޓަރުގެ ޢާއިލާއަށް ކަންކަން ހިނގާ ގޮތް އަންގައި އޭނާ އެނބުރި ޤައުމަށް ގެންދިޔުމުގެ އިންތިޒާމުތައް ހަމަޖެއްސާ ގޮތުގެ މައުލޫމާތު ހިއްސާކޮށްފައި އެވެ.

މިސްރު ފޮރިން މިނިސްޓްރީން ބުނީ އެ މިނިސްޓްރީން ރާއްޖޭގެ ފޮރިން މިނިސްޓްރީގެ އޮފިޝަލުންނާއި މަޝްވަރާކޮށް މަރުޒޫކާއި މެދު ކަން ހިނގަމުންދާ ގޮތް އޮޅުންފިލުވައި މައްސަލަ ވީހާވެސް އަވަހަކަށް ހައްލުވާނެ ގޮތާއި ގުޅޭގޮތުން މަޝްވަރާ ކުރި ކަމަށެވެ. އޭނާ އެނބުރި ގައުމަށް ގެންގޮސް މިނިސްޓަރު ވަނީ އެ އާއިލާ އާއި މިނިސްޓްރީގައި ބައްދަލުކޮށްފައި އެވެ.

މި މައްސަލައިގަ މިސްރު ފޮރިން މިނިސްޓްރީން ވަނީ ބޭރު ޤައުމުތަކަށް ދަތުރުކުރާ މިޞްރު ރައްޔިތުން އެ ޤައުމެއްގެ ޤާނޫނުތަކާއި އެއާޕޯޓް ސެކިއުރިޓީގެ އިރުޝާދުތަކަށް ތަބާވުމަށް އިލްތިމާސްކޮށްފައި އެވެ. އަދި ޤާނޫނީ މައްސަލައެއް ދިމާވެއްޖެ ނަމަ ވީ އެންމެ އަވަހަކަށް އެންމެ ގާތް މިޞްރު އެމްބަސީ ނުވަތަ ކޮންސިއުލޭޓާ ގުޅުމަށް އެދިފައިވެ އެވެ.

މިސްރުގެ ޑޮކްޓަރު ވީއައިއޭއިން ހައްޔަރު ކުރީ އޭނާ އާއި އެކު ހުރި މީހެއްގެ ފޮށި ބަލަން އުޅުމުން އޭގައި ބޮމެއް އޮތް ކަމަށް ބުނުމުންނެވެ. ނަމަވެސް ހައްޔަރުކޮށް މުއްދަތު ޖަހަން ކޯޓަށް ހާޒިރު ކުރުމުން އެމީހާ ވަނީ އެއީ މަޖަލަކަށް ބުނި އެއްޗެއް ކަމަށާއި އެކަމަށް މައާފަށް އެދޭ ކަމަށް ބުނެފައި އެވެ.

ވައިގެ ދަތުރުފަތުރާއި ބެހޭ ގާނޫނު ބުނާގޮތުން މަޖަލަކަށްވެސް އެއާޕޯޓާއި އެއާޕޯޓު ހިމެނޭ ސަރަހައްދުގައި އެފަދަ ނުރައްކާތެރި ކަން ދޭހަވާފަދަ ބަހެއް ބުނުމަކީ ގާނޫނީ ކުށެކެވެ.