އެމެރިކާއަށް ގަވާއިދާ ޚިލާފަށް ދަތުރުކުރަމުން ދިޔަ އިންޑިއާގެ ގުޖުރާތަށް ނިސްބަތްވާ ޢާއިލާއެއްގެ ތިން މެންބަރަކު ވީތަނެއް ނޭނގި ގެއްލިފައި ވަނިކޮށް އެ މީހުން ރަހީނުކޮށްފައިވާ ކަމަށް ބުނެ ފައިސާ ދިނުމަށް ނުދަންނަ ބަޔަކު ޑިމާންޑް ކޮށްފިއެވެ.

ގެއްލިފައިވަނީ ގުޖުރާތުގެ މެހެސާނާ ޑިސްޓްރިކްޓަށް ނިސްބަތްވާ ޢުމުރުން 30 އަހަރުގެ މަމްތާ ޗާވްދާ އާއި އޭނާގެ ދެބެއިންގެ ދެދަރި ޢުމުރުން 23 އަހަރުގެ ރުތްވިކް ޖަންސާރީ އަދި 27 އަހަރުގެ މަޔޫރީ ސޮލާންކީ އެވެ.

Advertisement

އޭގެ ތެރެއިން މަމްތާގެ ފިރިމީހާ ތިން އަހަރު ކުރިން ސްޓޫޑެންޓް ވިސާގައި އެމެރިކާއަށް ބަދަލުވެފައިވާއިރު ފިރިމީހާގެ ކައިރިއަށް ދިއުމަށް ހަ ފަހަރު އެމެރިކާ ވިސާއަށް އެދުމުންވެސް ވަނީ ރިޖެކްޓު ވެފައި އެވެ. އެހެންކަމުން ޢާއިލާއިން ގަވާއިދާ ޚިލާފު ރޫޓެއް މެދުވެރިކޮށް އެމެރިކާއަށް ފޮނުވުމަށް ނިންމައި އަލްޕެޝް ޕަންޗާލް ކިޔާ އެޖެންޓެއް މެދުވެރިކޮށް ދަތުރު ރޭވީ ކަމަށް އާެއިލާއިން ފުލުހުންނަށް މައުލޫމާތު ދީފައިވެ އެވެ.

ޕަންޗާލް ވަނީ މި ޢާއިލާ އެހެން އެޖެންޓަކާއި ގުޅުވައިދީފައެވެ. ކޮންމެ މީހެއް ގެންގޮސްދިނުމަށް 75 ލައްކަ ރުޕީސް އެއްބަސްވެ ޢާއިލާއިން ގާތްގަނޑަކަށް 70 ލައްކަ ރުޕީސް ކުރީބައިގައި އެ އެޖެންޓަށް ދައްކާފައިވެއެވެ. ސެޕްޓެމްބަރު 20 ވަނަ ދުވަހު ގޮޖާރިޔާއިން ޖައިޕޫރަށް ގެންގޮސް އެތިހާދު އެއާލައިންގެ ފްލައިޓެއްގައި އަބޫ ދަބީއަށް އެއަށް ފަހު އެތިއޯޕިއާގެ ވެރިރަށް އެޑިސް އެބެބާއަށް ފޮނުވައިފައިވެއެވެ. އެތިއޯޕިއާގައި އެ ތިން މީހުން ސްވާޒިލެންޑް ސްޓްރީޓުގައި ހުންނަ ޖީއެސްއެފް ކޭމްޕެއްގައި އެއް މަހުގެ އީ ވިސާގައި ބައިތިއްބާފައިވެއެވެ.

ސެޕްޓެމްބަރު 22 ގައި މަމްތާ ޢާއިލާއަށް ގުޅައި ކެނެޑާއަށް ރައްކާތެރިކަމާ އެކު ދެވިއްޖެ ކަމަށް އެންގި ނަމަވެސް އެ ކޯލަށް ފަހު ތިން މީހުންގެ ވެސް ފޯނު ނިއްވާލެވި އެއްވެސް ގޮތަކުން ގުޅޭ ގޮތް ނުވެ ގުޅުން ކެނޑިގެން ގޮސްފައިވެއެވެ. ތިން ދުވަސް ފަހުން ޚާން ކިޔާ ނުދަންނަ މީހަކު ޢާއިލާއަށް ގުޅައި ތިން މީހުން ރަހީނުކޮށްފައިވާ ކަމަށް ބުނެ ދޫކޮށްލުމުގެ ބަދަލެއްގެ ގޮތުގައި އެއް ކުރޯޑު ރުޕީސް ދިނުމަށް ޑިމާންޑް ކޮށްފައިވެއެވެ.

އެޖެންޓުންނަށް ބައިލައްކައެއްހާ ރުޕީސް ދައްކައިގެން މާލީ ގޮތުން ބަލިކަށިވެފައިވާ ޢާއިލާގެ ފަރާތުން މަމްތާގެ ބައްޕަ ކިރީތުބާއީ ޗޯހާން ވަނީ ސަރުކާރުން ވެދެވައިދީ ދަރީން ސަލާމަތްކޮށް ދެއްވުމަށް ޢާންމުކޮށް އެދިފައެވެ. ޕަންޗާލް ބުނީ އެ ތިން މީހުން ޙަޤީޤަތުގައި ކެނެޑާއަށް ނުދާ ކަމަށާއި އެތިއޯޕިއާގައި ތިއްބާ ރަހީނުކޮށްފައިވާ ކަމަށެވެ.

އޭނާ ބުނާ ގޮތުން ބޭރުގެ މައި ކޮންޓެކްޓް ވެސް ގެއްލިފައިވާ ކަމަށާއި ރަހީނުކުރި ފަރާތްތަކަށް 60 ލައްކަ ރުޕީސް ދީ ނިމިފައިވީ ނަމަވެސް އިތުރު އެއް ކުރޯޑު ރުޕީސް ދިނުމަށް ރަހީނުކުރި ފަރާތުން ދަނީ ޑިމާންޑް ކުރަމުންނެވެ.

ލަންގނާޖް ފުލުހުންގެ ސްޓޭ ޝަނުން ވަނީ މި މައްސަލައިގެ ފުރިހަމަ ތަޙުޤީޤެއް ފަށާފައެވެ. ދަތުރު ރާވައިދިން އެޖެންޓުންގެ ދައުރު ބެލުމާއި ފިދުޔައަށް އެދި ގުޅި ކޯލު ޓްރޭ ސް ކުރުމާއި ގެއްލިފައިވާ ތިން މީހުންގެ ޙަޤީޤީ ތިބި ތަނާއި ރައްކާތެރިކަން ކަށަވަރު ކުރުމުގެ މަސައްކަތް ފުލުހުން ކުރިއަށް ގެންދާ ކަމަށް މީޑީއާ ރިޕޯޓުތައް ބުނެ އެވެ.