މަގުމަތީގެ އުސޫލުތަކާއި ޓްރެފިކް ޤާނޫނާއި ޤަވާއިދުތަކަށް ތަކުރާރުކޮށް ޚިލާފުވާ ފަރާތްތަކާ މެދު ޚާއްޞަ ފިޔަވަޅުތަކެއް އަޅާނެ ކަމަށް ކޮމިޝަނަރ އޮފް ޕޮލިސް އަޙްމަދު މުޙައްމަދު ވިދާޅުވެއްޖެއެވެ.

ސީޕީ މިހެން ވިދާޅުވީ މަގުމަތީގެ ސަލާމަތާއި ރައްކާތެރިކަން ކަށަވަރުކުރުމާ ގުޅޭ ގޮތުން ދެއްވި މެސެޖެއްގައެވެ. އެ މެސެޖުގައި ޓްރެފިކްގެ ޢާންމު އުސޫލުތަކަށާއި އަދަބުތަކަށް ބޯނުލަނބާ މަދު ބައެއްގެ ސަބަބުން ގިނަ ބައެއްގެ ޙައްޤުތައް ގެއްލި، ނުރައްކާތެރި އެކި ހާދިސާތައް ހިނގަމުންދާ ކަން ސީޕީ ފާހަގަކުރެއްވިއެވެ.

Advertisement

އެފަދަ ޢަމަލުތައް ހިންގާ ފަރާތްތަކާ މެދު ހަރުކަށި ފިޔަވަޅު އަޅާނެ ކަމަށާއި، އެފަދަ ފަރާތްތަކަށް ފިޔަވަޅު އެޅުމަށް ކަމާ ގުޅުން ހުރި އިދާރާތަކަށް އަންގަވާފައިވާނެ ކަމަށް ސީޕީ ވިދާޅުވިއެވެ. މި ފިޔަވަޅުތައް އެޅުމުގެ މަޤުޞަދަކީ މަގުތަކަކީ އެންމެންނަށް ރައްކާތެރި ތަނަކަށް ހެދުމާއި ނުރައްކާތެރި ހާދިސާތައް ހުއްޓުވުން ކަމަށް ވެސް ވިދާޅުވިއެވެ.

މި ފިޔަވަޅުތައް އަޅާނީ ކަމާ ގުޅުން ހުރި އިދާރާތައް ގުޅިގެން ކަމަށާއި، މާލެ ސަރަޙައްދުގެ އިތުރުން އަތޮޅުތެރޭގައި ވެސް މިފަދައިން ފިޔަވަޅު އަޅާނެ ކަމަށް ސީޕީ ވިދާޅުވިއެވެ. އަދި ފުލުހުން ކުރާ މިފަދަ މަސައްކަތްތަކަށް އެންމެހާ ފަރާތްތަކުން އެއްބާރުލުން ދެއްވުމަށް ވެސް ކޮމިޝަނަރ އޮފް ޕޮލިސް ވަނީ އިލްތިމާސްކުރައްވައިފައެވެ.

ސީޕީ މި އިޢުލާނު ކުރައްވާފައި ވަނީ މިފަހުން މާލެ ސަރަޙައްދުގައި ހިނގި އެކްސިޑެންޓުތަކެއްގައި އެކި ފަރާތްތަކަށް އަނިޔާލިބި، ބައެއް ފަރާތްތަކުގެ ފުރާނައަށް ގެއްލުންވި ހާދިސާތަކެއް ހިނގާފައިވާ ދަނޑިވަޅެއްގައެވެ.