ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމްގެ މައްޗަށް ކްރިމިނަލް ކޯޓުގައި ހިނގަމުންދާ ޖިނާއީ މައްސަލަތަކުގެ އަޑުއެހުންތައް ގާތްގަނޑަކަށް އަހަރެއް ވަންދެން މެދުކެނޑިފައި އޮތުމަށްފަހު މިއަދު އަލުން ފަށައިފިއެވެ.

މިއަދު ކުރިއަށް ގެންދިޔައީ އެމްއެމްޕީއާރުސީ މެދުވެރިކޮށް ވ. އާރަށް ކުއްޔަށް ދިނުމުގެ މުޢާމަލާތާ ގުޅިގެން ޔާމީނާއި ކުރީގެ ރައްޔިތުންގެ މަޖިލީހުގެ މެންބަރު ޔޫސުފް ނައީމްގެ މައްޗަށް ކުރާ ރިޝްވަތާއި މަނީ ލޯންޑަރިންގެ ދައުވާގެ ޝަރީޢަތެވެ. އެ އަޑުއެހުމުގައި އެޖެންޑާ ކޮށްފައި އޮތީ ޝަރީޢަތް ފެށުމުގެ ކުރިން ދެ ފަރާތުން ހުށަހަޅާ ހުށަހެޅުންތަކާ މެދު ބަހުސް ކުރުމެވެ.

Advertisement

މި މައްސަލަ ކްރިމިނަލް ކޯޓުން ކުރިން މަޑުޖައްސައިލީ މައްސަލަ އަލުން ބެލުމުގެ މަރުޙަލާގައި ދައުލަތުން ހުށަހެޅި އައު ހެކިތަކެއް ބަލައިނުގަތުމަށް ހައި ކޯޓުން ކުރި ޙުކުމް ދައުލަތުން ސުޕްރީމް ކޯޓުގައި އިސްތިއުނާފު ކުރުމާ ގުޅިގެންނެވެ. ސުޕްރީމް ކޯޓުން މިދިޔަ ޖުލައި މަހު ނިންމީ ހައި ކޯޓުގެ ޙުކުމް ދެމެހެއްޓުމަށެވެ. އެހެންކަމުން އެ ހެކިތައް ބަލައިނުގަންނަ ގޮތަށް ވަނީ ކަނޑައެޅިފައެވެ. ބަލައިނުގަންނަ ގޮތަށް ނިންމި ހެކިތަކުގެ ތެރޭގައި ޔާމީންގެ ދިފާޢީ ހެކިވެރިއެއް ކަމަށްވާ އަޙްމަދު ނަރީޝްގެ އެމްއެންޑީއެފް ޙާޒިރީ ރެކޯޑާއި އިކޮނޮމިކް ޔޫތު ކައުންސިލްގެ ބައެއް ޖަލްސާތަކުގެ ޔައުމިއްޔާ ހިމެނެއެވެ.

ޔާމީންގެ މައްޗަށް ވަކިން ކުރާ އެހެން ދައުވާތަކެއް ކަމުގައިވާ ރ. ފުއްގިރި ކުއްޔަށް ދިނުމާ ގުޅޭ ރިޝްވަތާއި މަނީ ލޯންޑަރިންގެ މައްސަލައިގެ އަޑުއެހުމެއް ވެސް މިއަދަށް ތާވަލުކުރި ނަމަވެސް ދައުލަތުގެ ވަކީލުން ބަލިވުމުގެ ސަބަބުން އެ އަޑުއެހުން ވަނީ ކެންސަލްކޮށްފައެވެ. ޔާމީންގެ ދެ މައްސަލައިގެ ޝަރީޢަތް ވެސް ކުރިއަށް ގެންދަނީ ކްރިމިނަލް ކޯޓުގައެވެ.