މައްކާއާއި މަދީނާ އަށް ގެންލުންދިނުމަށް ކުރާ މަސައްކަތްތައް ބަލައިނުގަންނާނެ ކަމަށް ވިދާޅުވެ މޮރޮކޯގެ ރަސްގެފާނު ހަވަނަ މުޙައްމަދު ވަރުގަދަ މެސެޖެއް ޙޫޘީ ޖަމާޢަތަށް ދެއްވައިފިއެވެ.

ސައުދީ ރަސްގެފާނު ސަލްމާނާއި ވަލީ ޢަހުދު އަދި ބޮޑުވަޒީރު މުޙައްމަދު ބިން ސަލްމާނަށް ފޮނުއްވި ދެ ސިޓީފުޅެއްގައި މޮރޮކޯގެ ރަސްގެފާނު ވަނީ ސައުދީ އަރަބިއްޔާގެ ސިޔާދަތާއި ސަލާމަތާއި ހަމަޖެހުން ދެމެހެއްޓުމުގައި މޮރޮކޯ ސާބިތުކަމާ އެކު ދެމިއޮންނާނެ ކަމުގެ ޔަޤީންކަން ދެއްވައިފައެވެ. ސައުދީގެ މީހުން ދިރިއުޅޭ ސަރަޙައްދުތަކާއި ސިޓީތަކާއި މުހިންމު އިންފްރާސްޓްރަކްޗާ އަދި އިޤުތިޞާދީ ވަސީލަތްތަކަށް އަމާޒުކޮށްގެން ދޭ ހަމަލާތައް ރަސްގެފާނު މުހައްމަދު ހަވަނަ ކުށްވެރިކުރެއްވީ ޚާއްޞަކޮށް މައްކާއާއި މަދީނާ ޓާގެޓް ކުރުމުން ކަމަށް ވިދާޅުވި އެވެ.

Advertisement

މި ނާޒުކު ދަނޑިވަޅުގައި ތާރީޚީ ޒިންމާއާއި ދީނީ އަގުތަކާއި ސްޓްރެޓީޖިކް މަސްލަޙަތުތައް ލާޒިމުކުރަނީ ޙައްޤުތަކާއި ސިޔާދަތާއި ސަލާމަތާއި މުސްލިމު އުންމަތުގެ މުޤައްދަސް ތަންތަން ދިފާޢުކުރުމުގައި އެންމެން އެކަތިގަނޑެއްގެ ގޮތުގައި ތެދުވުމަށް ކަމަށް މޮރޮކޯ ރަސްގެފާނު ވިދާޅުވިއެވެ. އޭނާ ވިދާޅުވި ގޮތުގައި މައްކާއާ މަދީނާއަށް ހަމަލާ ދިނުމަކީ ދުނިޔޭގެ 1.8 ބިލިއަން މުސްލިމުންނަށް ހަމަލާ ދިނުން ކަމަށެވެ.

މި ޢަމަލުތަކަކީ "ޖިނާޢީ ޢަމަލުތައް" ކަމަށް ސިފަކުރައްވައި ޙޫޘީ ޖަމާޢަތާއި އެ ޖަމާޢަތަށް ތާއީދުކޮށް ފައިސާ ދީ ހަތިޔާރު ފޯރުކޮށްދޭ ފަރާތްތައް ޒިންމާ ނަގަންޖެހޭނެ ކަމަށް ވިދާޅުވެފައެވެ.

ހަތިޔާރު އެޅި ޖަމާޢަތްތަކާއި އެ ޖަމާޢަތްތަކަށް ވާގިވެރިވާ ސަރަޙައްދީ ބާރުތަކުގެ ނުރައްކާތަކާ ކުރިމަތިލުމުގައި ސައުދީ އަރަބިއްޔާއަށް ދެމެހެއްޓެނިވި ގޮތެއްގައި ތާއީދުކުރާނެ ކަމުގެ ޔަޤީންކަން ރަސްގެފާނު ދެއްވިއެވެ. މި ފަދަ ޢަމަލުތަކުން ސަރަޙައްދުގެ ސަލާމަތަށާއި ދުނިޔޭގެ އިޤުތިޞާދަށާއި ބައިނަލްއަޤުވާމީ ކަނޑު ދަތުރުފަތުރަށް ބޭނުންވާ މުހިންމު ކަނޑުމަގުތަކަށް ނުރައްކާވާ ކަމަށް ވެސް އެ މަނިކުފާނު އިންޒާރު ދެއްވިއެވެ.

މީގެ އިތުރުން މި ހަމަލާތަކަކީ ބައިނަލްއަޤުވާމީ ޤާނޫނާއި 2015 ވަނަ އަހަރުގެ އދ. ގެ ސަލާމަތީ މަޖިލީހުގެ ޤަރާރު 2216 އާއި 2024 ވަނަ އަހަރުގެ ޤަރާރު 2722 އާ ޚިލާފު ޢަމަލުތައް ކަމަށް ވިދާޅުވެ ޖަވާބުދާރީ ކުރުވަންޖެހޭ ކަމަށް ގޮވާލައްވައިފައެވެ.

މޮރޮކޯގެ ރަސްގެފާނުގެ މި ބަޔާންފުޅުން ހާމަވެގެންދަނީ ސައުދީ އަރަބިއްޔާ އާއި ގަލްފް ކޯޕަރޭޝަން ކައުންސިލް (ޖީސީސީ) ގެ ޤައުމުތަކުގެ ސަލާމަތާއި ހަމަޖެހުމަކީ މޮރޮކޯގެ އަމިއްލަ ސަލާމަތާ ވަކިނުކުރެވޭނެ ކަމެއް ކަމަށް އެ ޤައުމުން ދެކޭ ދެކުމެވެ.