އޮޑިޝާގެ ޕެރަދީޕް ބޭރުން ބެލެންސް ގެއްލިފައި އޮތް ކެމިކަލް ޓޭންކަރެއް 23 ފަޅުވެރިންނާ އެކު އިންޑިއާ ކޯސްޓް ގާޑު (އައިސީޖީ) އިން މިއަދު ސަލާމަތްކޮށްފިއެވެ.

އިންޑިއާ ކޯސްޓުގާޑުން މީޑިއާގައި ބުނީ 9,000 މެޓްރިކް ޓަނުގެ ޕާމް އޮއިލް ބަރުކޮށްގެން ދަތުރުކުރި ބޭރުގެ އެ އުޅަނދަށް އެހީތެރިކަން ފޯރުކޮށްދިނީ ނުރައްކަލުގެ ސިގުނަލް ދިނުމުން ކަމަށެވެ.

Advertisement

ޑެމޭޖް ކޮންޓްރޯލް ޓީމެއް އުޅަނދަށް އެރުމަށް ފަހު ފެން ބޭރުކުރުމަށް ސަބްމާސިބަލް ޕަންޕު ބޭނުންކޮށް ހަލާކުވެފައި ހުރި ކަނޑު ހޮޅިތައް މަރާމާތުކޮށް އެ އުޅަނދު ހަމައަކަށް އެޅުވީ ކަމަށް އައިސީޖީން ބުނެފައިވެއެވެ. އެ އުޅަނދުގައި ތިބި މީހުންނަށް އެހީތެރިކަން ފޯރުކޮށްދޭން ޖެހިފައި ނުވާކަމަށް ބުނެފައިވެ އެވެ.

ތެޔޮ ލީކުވެ ތިމާވެށި ތަޣައްޔަރުވުމުގެ ފުރުޞަތު އޮތުމުން ޕޮލިއުޝަން ކޮންޓްރޯލް އުޅަނދަކާއި އޮފްޝޯ ޕެޓްރޯލް އުޅަނދެއް ވެސް އެ ސަރަޙައްދަށް ފޮނުވާފައިވެއެވެ. ޑޯނިއާ މަރުކާގެ މަތިންދާ ބޯޓަކުން ކުރި ދަތުރުތަކުން ސާބިތުވީ ކަނޑުގައި ފެތުރުނު ޕާމް އޮއިލް ފަށަލަ މުޅިން ނެތި ގޮސްފައިވާ ކަމެވެ.

މީގެ ކުރިން މިމަހުގެ 11 ވަނަ ދުވަހު ގުޖަރާތުގެ ކަންދުލާ ބޭރުން ރާއްޖޭގެ ދެ އުޅަނދު ކަމަށްވާ އެމްވީ ކޭމެކްސް އެމްޕެރާ އާއި އެމްވީ ޓުރޫ މެރީނާ ޖެހި ހިނގި ހާދިސާއެއްގައި ވެސް އިންޑިއާ ކޯސްޓުގާޑުން އެހީތެރިވެ 21 ފަޅުވެރިން ރައްކާތެރިކަމާ އެކު ސަލާމަތްކޮށްގެން އިންޑިއާއަށް ގެންގޮސްފައި އެވެ.