ވާރޭގެ ސަބަބުން ބެންކޮކާއި ކައިރި ތިން ޕްރޮވިންސެއްގެ ސިވިލް ސާވިސް މުވައްޒަފުންނަށް ދެ ދުވަހުގެ ހާއްސަ ޗުއްޓީއެއް ދިނުމަށް ތައިލެންޑުގެ ކެބިނެޓުން އާދީއްތަ ދުވަހު ނިންމައިފިއެވެ.

ސެޕްޓެމްބަރު 28 އަދި 29 ވަނަ ދުވަހަށް ކަނޑައެޅި މި ޗުއްޓީގެ ބޭނުމަކީ ދަތުރުފަތުރު މަދުކޮށް ޓެރެފިކް ތޮއްޖެހުމުން އާންމުންނަށް ލުޔެއް ހޯދައިދިނުން ކަމަށް ސަރުކާރުން ބުނެފައިވެއެވެ. އެހެންނަމަވެސް ޗުއްޓީ ތެރޭގައި ކޮންމެހެން ކުރަންޖެހޭ ރަސްމީ މަސައްކަތްތައް އެ އިދާރާތަކުގެ ވެރީން ނިންމާ ގޮތެއްގެ މަތީން ކުރިއަށް ގެންދެވިދާނެ ކަމަށް ވެސް ސަރުކާރުން ބުނެފައިވެއެވެ.

Advertisement

މި ޗުއްޓީގެ ނިންމުމާ ގުޅިގެން ތައިލެންޑުގެ ގާނޫނުއަސާސީގެ ކޯޓުން ހޯމަ ދުވަހަށް ތާވަލުކޮށްފައި އޮތް ހުކުމް ކިޔެވުމަށް ހުރަސް އެޅިދާނެ ކަމަށް ބެލެވުނެވެ. ތައިލެންޑުގެ ރަސްމީ އޮމްބަޑްސްމަން ހުށަހެޅި އެ މައްސަލައަކީ ފެބްރުއަރީ މަހުގެ އިންތިހާބުގައި ބޭނުންކުރި ވޯޓު ކަރުދާހާ ގުޅޭ މައްސަލައެކެވެ. އެ މައްސަލައިގެ ނަތީޖާއިން އިންތިހާބުގެ ނަތީޖާއާ މެދު ސުވާލު އުފެދުމުގެ ފުރުސަތު އޮތެވެ. ނަމަވެސް ހުކުމް ކިޔެވުން ރޭވިފައިވާ ގޮތަށް ހޯމަ ދުވަހު ކުރިއަށްދާނެ ކަމަށް ކޯޓުން ބުނެފައިވެއެވެ.

ހޮނިހިރު ދުވަހު ބެންކޮކް މެޓްރޮޕޮލިޓަން އެޑްމިނިސްޓްރޭޝަނުން ވަނީ ވެރިރަށް ކާރިސާ ސަރަހައްދެއްގެ ގޮތުގައި ކަނޑައަޅައިފައެވެ. 48 ގަޑިއިރުގެ ތެރޭގައި ގާތްގަނޑަކަށް 300 މިލިމީޓަރުގެ ވާރޭ ވެހި ބެންކޮކުގެ ބޮޑެތި މަގުތަކުގައި ފެންބޮޑުވެ ބައެއް ކާރުތައް ފެނު އަޑީގައި ވެސް ބެހެއްޓުނެވެ. އާދީއްތަ ދުވަހު ވާރޭ ތުނިވުމާ އެކު ފެންގަނޑު ހިނދެން ފެށި ނަމަވެސް ބައެއް ރައްޔިތުންނަށް ގެތަކުން ނުނިކުމެވި ތާށިވެފައި ތިބެން ޖެހުނެވެ.