މެލޭޝިއާގެ ކުރީގެ ބޮޑުވަޒީރު މަހާތީރު މުޙައްމަދުގެ އަނބިކަނބަލުން ސީތީ ހަސްމާ މުޙައްމަދު ޢަލީ ޢުމުރުފުޅުން 100 އަހަރުގައި މިއަދު އަވަހާރަވެއްޖެ އެވެ.

ރިޕޯޓުތައް ބުނާގޮތުގައި މެލޭޝިއާގެ ނެޝެނަލް ހާޓް އިންސްޓިޓިއުޓްގައި ހަސްމާ އަވަހާރަވީ ހެނދުނު 9:20 ހާއިރުއެވެ. ހަސްމާ އަވަހާރަވިކަން އާއިލާގެ ފަރާތުން ދައުލަގެ މީޑިއާއަށް ކަށަވަރުކޮށްދެއްވީ ދަރިކަލުން މޮޚުޒާނީ މަހާތީރުއެވެ.

Advertisement

ޑޮކްޓަރެއްގެ ގޮތުގައި މަސައްކަތް ކުރެއްވި ހަސްމާ ވަނީ ބޮޑުވަޒީރުގެ އަނބިކަނބަލުންގެ ހައިސިއްޔަތު ބޭނުންކުރައްވައިގެން ގިނަ ދާއިރާތަކެއްގައި ވަކާލާތު ކުރައްވައިފައެވެ. އެ ގޮތުން މައިންގެ ޞިއްޙަތާއި ޢާއިލާ ރޭވުމާއި ލިޔަން ކިޔަން ދަސްކޮށްދިނުމާއި މަސްތުވާތަކެތިން ރައްކާތެރިވުމާއި ނަފްސާނީ ދުޅަހެޔޮކަން ކުރިއެރުވުމުގެ މަސައްކަތް ފާހަގަކޮށްލެވެއެވެ.

ހަސްމާއަށް 100 އަހަރު ފުރުން ފާހަގަކުރެއްވީ ޖުލައި 12 ވަނަ ދުވަހުއެވެ. އޭގެ އެއްމަސް ފަހުން އޮގަސްޓު މަހު ކުރީގެ ބޮޑުވަޒީރެއްގެ ދިރިހުންނެވި އެންމެ ޢުމުރުފުޅުން ދޮށީ ބައިވެރިޔާގެ ގޮތުގައި އާސިއާން ރެކޯޑްސް އިން ހަސްމާ ފާހަގަކޮށްފައިވެއެވެ.

ޢުމުރުފުޅުން 101 އަހަރުގެ މަހާތީރު ވަނީ ސޯޝަލް މީޑިއާގައި އަނބިކަނބަލުންގެ ފޮޓޯފުޅަކާ އެކު ތަޢުޒިޔާގެ ޕޯސްޓެއް ޝާއިޢުކުރައްވައިފައެވެ. އެ ޕޯސްޓުގައި ދުޢާގެ ގޮތުގައި ލިޔުއްވައިފައިވަނީ "މާތް ﷲ އެކަމަނާއަށް ފާފަ ފުއްސަވައި ރަޙްމަތް ލައްވައި ސުވަރުގޭގެ ނިޢުމަތް ދެއްވާށި" މިހެންނެވެ.

ހަސްމާއަކީ މެލޭޝިއާގެ ތާރީޚުގައި ޞިއްޙީ އަދި އިޖުތިމާޢީ ދާއިރާއިން ފާހަގަކޮށްލެވޭ ޚިދުމަތްތަކެއް ކޮށްދެއްވި ޝަޚުޞިއްޔަތެކެވެ.