ސައޫދީ އަރަބިއްޔާގެ 96 ވަނަ ގައުމީ ދުވަހުގެ މުނާސަބަތުގައި ނީވާ ކުރުނބާ މޯލްޑިވްސްގައި މިރޭ ބޭއްވި ހަފްލާގައި ވާހަކަފުޅުދައްކަވަމުން ދެ ގައުމުގެ ގުޅުމުގެ އައު ބާބެއް ފެށެމުންދާ ކަމަށާއި ވުނަކުރުމާއި ތަރައްގީގެ ދާއިރާއިން ފުރުސަތުތައް ތަނަވަސްވަމުންދާ ކަމަށް ރައީސުލްޖުމްހޫރިއްޔާ ޑޮކްޓަރ މުހައްމަދު މުއިއްޒު ވިދާޅުވެއްޖެއެވެ.

މި ހަފްލާއަށް ރައީސުލްޖުމްހޫރިއްޔާއާއި އެމަނިކުފާނުގެ އަނބިކަނބަލުން ސާޖިދާ މުހައްމަދު ވަޑައިގެންނެވުމުން މަރުހަބާ ދެންނެވީ ސައޫދީ އަރަބިއްޔާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ޔަހްޔާ ހަސަން އަލް-ގަހްތާނީއެވެ.

Advertisement

ރައީސުލްޖުމްހޫރިއްޔާގެ ވާހަކަފުޅުގައި ދެ ގައުމުގެ ގުޅުމުގެ ބިންގަލެއް ކަމުގައި ފާހަގަކުރެއްވީ އެއް އަގީދާއާއި އެއްގޮތް އުސޫލުތަކާއި ދެ ފަރާތުގެ މެދުގައި އޮތް އިހްތިރާމާއި އިސްލާމީ އުހުއްވަތްތެރިކަމެވެ. ދިވެހިރާއްޖޭގެ ތަރައްގީގައި ސައޫދީން ވެދެއްވާ ދީލަތި އެހީތެރިކަމަށް ހާއްސަކޮށް 2004 ގެ ސުނާމީ ކާރިސާގައި ފޯރުކޮށްދެއްވި އެއްބާރުލެއްވުމަށް ޝުކުރު އަދާކުރެއްވިއެވެ. އަދި ރަސްގެފާނު ސަލްމާން ބިން އަބްދުލްއަޒީޒް އާލް ސުއޫދާއި ވަލީއަހުދު އަމީރު މުހައްމަދު ބިން ސަލްމާންގެ ގިޔާދަތުގެ ދަށުން ސައޫދީ އަރަބިއްޔާ އިގްތިސާދީ ގޮތުން ސިންދަފާތުކުރުމާއި އުމްރާނީ ތަރައްގީއާއި ދެމެހެއްޓެނިވި ތަރައްގީގެ ރޮނގުން ހާސިލުކުރަމުން އަންނަ ކާމިޔާބީތައް ރައީސުލްޖުމްހޫރިއްޔާ ފާހަގަކުރެއްވިއެވެ.

ފަތުރުވެރިކަމާއި ބޯހިޔާވަހިކަމާއި ސިއްހީ ދާއިރާއާއި މަސްވެރިކަމާއި އިއާދަކުރަނިވި ހަކަތައާއި ދަތުރުފަތުރު ފަދަ ދާއިރާތަކުން ސައޫދީ ވުނޭރުންނަށް ރާއްޖޭގައި ވުނަކުރެވޭނެ ފުރުސަތު އެބައޮތް ކަމަށް ރައީސުލްޖުމްހޫރިއްޔާ ވިދާޅުވިއެވެ. ރާއްޖޭގެ އިގްތިސާދަށް ގެންނަވާ ބަދަލުތަކުގައި ސައޫދީ ވިޔަފާރިވެރިންނަށް ފުޅާ ދާއިރާއެއްގައި ބައިވެރިވެވޭނެ މަގު ފަހިކޮށްދެއްވާނެ ކަމުގެ ޔަގީންކަން ވެސް އެމަނިކުފާނު ދެއްވިއެވެ. ހަމައެހެންމެ ދެ ގައުމުގެ ގުޅުމުން ހާސިލުކުރެވުނު މުހިންމު ކާމިޔާބީއެއްގެ ގޮތުގައި "ޗާޓަރ އޮފް ދަ މަލްޓިނޭޝަނަލް މެރިޓައިމް ޑިފެންސް" ގައި ސޮއިކޮށްފައިވާ ކަން ފާހަގަކުރައްވައި 2030 ވަނަ އަހަރު ރިޔާޒުގައި ބާއްވާ އެކްސްޕޯގައި ރާއްޖެއިން ބައިވެރިވުމުން ދެ ގައުމުގެ ރައްޔިތުންގެ ގުޅުން އިތުރަށް ބަދަހިވާނެ ކަމަށް ވިދާޅުވިއެވެ.

ބައިނަލްއަގުވާމީ މައިދާނުގައި ވެސް ސައޫދީއާ ގާތުން މަސައްކަތްކުރައްވާނެ ކަމާއި އިސްލާމީ އުންމަތަށް ކުރިމަތިވެފައިވާ ގޮންޖެހުންތަކުން އަރައިގަތުމަށް ދެ ގައުމު ގުޅިގެން މެދުނުކެނޑި މަސައްކަތް ކުރައްވާނެ ކަމުގެ ޔަގީންކަން ރައީސުލްޖުމްހޫރިއްޔާ ދެއްވިއެވެ.

ރައީސުލްޖުމްހޫރިއްޔާގެ ވާހަކަފުޅަށް ފަހު ސަފީރު ޔަހްޔާ ހަސަން އަލް-ގަހްތާނީ ވަނީ ރައީސުލްޖުމްހޫރިއްޔާއަށް ހަނދާނީ ފިލައެއް އަރުވައިފައެވެ. މި ހަފްލާގައި ދެ ގައުމުގެ ގުޅުން ދައްކުވައިދޭ ވީޑިއޯއާއި ސައޫދީގެ ތަރައްގީގެ ތަސައްވުރު ހާމަކޮށްދޭ ވީޑިއޯތަކެއް ވެސް ދައްކާފައިވެއެވެ. ސައޫދީ އަރަބިއްޔާގެ 96 ވަނަ ގައުމީ ދުވަސް ފާހަގަކުރަމުން ދަނީ "އަވަރ ޕްރައިޑް އިޒް އިން އަވަރ ނޭޗަރ" މި ޝިއާރުގެ ދަށުންނެވެ.