އެމެރިކާގެ ފިލަޑެލްފިއާގައި ރޭ ބޭއްވި ސޯލޯ ކޮންސެޓެއް ފައްޓަމުން ގައްޒާގެ ހާލަތާ މެދު ދެކޭ ގޮތް ފުރަތަމަ ފަހަރަށް ހާމަކޮށް އެއީ "ބަލައިގަނެވޭނެ ކަމެއް ނޫން" ކަމަށް މަޝްހޫރު ލަވަކިޔުންތެރިޔާ އެޑް ޝީރަން ބުނެފިއެވެ.

މި ބަޔާން އައީ ފަލަސްތީނަށް ތާއީދުކޮށް ސެޕްޓެމްބަރު ފަހެއްގައި ނިއު ޖާޒީގައި ސްޓޭޖުމަތީ ވާހަކަ ދެއްކުމާ ގުޅިގެން ޝީރަންގެ ޓުއާގެ އޯޕެނާއެއް ކަމުގައިވާ މެކެލްމޯ ބޭރުކުރި ހިސާބުން ބޮޑު ބަހުސެއް ފެށިފައިވާ ދަނޑިވަޅެއްގައެވެ.

Advertisement

ޝީރަން ބުނީ 2023 ވަނަ އަހަރު އޮކްޓޫބަރު ހަތެއްގައި އިސްރާއީލުގައި ދިން ހަމަލާތައް ބިރުވެރި ކަމަށާއި ނަމަވެސް މިހާރު ގައްޒާގައި ހިނގަމުންދާ ކަންކަން ބަލައިނުގަނެވޭނެ ކަމަށެވެ. "ފެންނަ ގެއްލުމުގެ ބޮޑުކަމާއި އާންމު ރައްޔިތުންނާއި ކުޑަކުދިންގެ ފުރާނަ ގެއްލެމުންދާ މިންވަރުން އަހަރެންގެ ހިތް ހަލާކުވެއްޖެ" ކަމަށް ލިންކަން ފައިނޭންޝަލް ފީލްޑުގައި ހުރެ ބެލުންތެރިންނާ މުހާތަބުކޮށް ޝީރަން ބުންޏެވެ.

ޝީރަންގެ ލޫޕް ޓުއާ އަކީ ދުނިޔޭގެ އެންމެ ބޮޑު އާމްދަނީ ލިބުނު ޓުއާ ކަމަށް ޕޯލްސްޓާ އިން މެއި މަހު ބުނެފައިވެއެވެ. ކޮންމެ ސިޓީއަކުން އެވެރެޖް ގޮތެއްގައި ހަތް މިލިއަން ޑޮލަރަށް ވުރެ ބޮޑު އާމްދަނީއެއް ބޮކްސް އޮފީހަށް ލިބިފައިވާ އިރު 2021 ވަނަ އަހަރުން ފެށިގެން 2025 ގެ ނިޔަލަށް ކޮންސެޓް ފަންނާނުންގެ ތެރެއިން ތިންވަނައަށް އެންމެ ބޮޑު އާމްދަނީ ލިބުނު ފަންނާނަކީ ޝީރަނެވެ.