މަރުކަޒީ ބޭންކުން ބޭންކުތަކަށް ފޯރުކޮށްދޭ ބޭރު ފައިސާގެ ޢަދަދު ތިން ހަފުތާއަށް އިތުރުކުރުމާ ގުޅިގެން ބޭންކް އޮފް މޯލްޑިވްސް (ބީއެމްއެލް) އިން ކަސްޓަމަރުންގެ ޓެލެގްރެފިކް ޓްރާންސްފާ (ޓީޓީ) ތަކަށް ވިއްކާ ޑޮލަރުގެ މިންވަރުވެސް އިތުރުކުރަން ނިންމައިފިއެވެ.

ބީއެމްއެލްއިން ހާމަކުރި ގޮތުގައި މި ނިންމުން ބިނާކޮށްފައި ވަނީ އެ ބޭންކަށް ލިބޭ ޑޮލަރުގެ ޢަދަދާއި ކަސްޓަމަރުން ހުށަހަޅާ ޓީޓީތަކުގެ ޢަދަދަށް ރިޢާޔަތްކޮށެވެ. މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ތިން ހަފުތާގެ މުއްދަތަކަށް ބޭންކިން ނިޒާމަށް އިތުރު ބޭރު ފައިސާ ދޫކުރަން ފެށުމަކީ މި ބަދަލު ގެންނަން މެދުވެރިވި ސީދާ ސަބަބު ކަމަށް އެ ބޭންކުން ބުނެފައިވެއެވެ.

Advertisement

އެމްއެމްއޭއިން ފާހަގަކޮށްފައިވާ ގޮތުގައި ބޭންކިން ނިޒާމުގެ ޒަރީޢާއިން ބޭރު ފައިސާ ހޯދުން ފަސޭހަކޮށްދިނުމާ އެކު ބޭރު ފައިސާގެ ބާޒާރަށް ލުޔެއް ހޯދައިދިނުމަކީ މި ފިޔަވަޅުގެ މަޤުޞަދެއް ކަމަށެވެ.

ޖެނުއަރީ މަހުން ފެށިގެން ޖުލައި މަހުގެ ނިޔަލަށް ބީއެމްއެލްއިން ވަނީ ޓީޓީ ފޮނުވުމަށް 186 މިލިއަނަށްވުރެ ގިނަ ޑޮލަރު ކަސްޓަމަރުންނަށް ވިއްކައިފައެވެ. މަހެއްގެ މައްޗަށް ބަލާއިރު މި ޢަދަދު އެވްރެޖްކޮށް 27 މިލިއަން ޑޮލަރަށް އަރާ ކަމަށާއި މިދިޔަ އަހަރާ އަޅައިބަލާއިރު މިއީ މަހެއްގެ އެވްރެޖުން 12 މިލިއަން ޑޮލަރުގެ ކުރިއެރުމެއް ކަމަށް އެ ބޭންކުން ބުނެފައިވެއެވެ.

ހަމައެއާ އެކު ފާއިތުވި ހަތް މަހުގެ ތެރޭގައި ކަސްޓަމަރުންގެ ތަފާތު ބޭނުންތަކަށް ގާތްގަނޑަކަށް 570 މިލިއަން ޑޮލަރު ދޫކޮށްފައިވާ ކަމަށާއި ދުވާލެއްގެ މައްޗަށް އެވްރެޖްކޮށް 2.7 މިލިއަން ޑޮލަރު އެއީ ކަމަށް ބީއެމްއެލްއިން ހާމަކޮށްފައިވެއެވެ.

ބީއެމްއެލްއިން ބުނީ "އާންމު ފަރުދުންނަށާއި ވިޔަފާރިތަކުގެ އެކި ބޭނުންތަކަށް ބޭނުންވާ ބޭރު ފައިސާ ފޯރުކޮށްދިނުމުގައި ބޭންކު ދެމިއޮންނާނެކަމުގެ ޔަގީންކަން އަރުވަމެވެ" ކަމަށާއި ކަސްޓަމަރުންގެ ބޭނުންތަކާއި ބޭރު ފައިސާގެ ޙާލަތު ދެމެހެއްޓެނިވި ގޮތެއްގައި ބެލެންސްކުރުމަކީ ބޭންކުގެ އެންމެ މުހިންމު އެއް މަސްއޫލިއްޔަތު ކަމަށެވެ.

ކުރިއަށް އޮތް ތިން ހަފުތާގެ ތެރޭގައި ޓީޓީތަކަށް ޑޮލަރު ދޫކުރާ މިންވަރަށް މި ބަދަލު ގެންނާނެއެވެ.