ދިވެހި ރުފިޔާގެ އަގު ހިފެހެއްޓުމުގެ ގޮތުން، އިގްތިސާދުގައި ބޭނުންވާ ވަރަށް ވުރެ އިތުރަށް ދައުރުވާ ރުފިޔާ މަދުކުރުމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ބޯޑުން ފިޔަވަޅުތަކެއް އެޅުމަށް ނިންމައިފިއެވެ.

މި ގޮތުން އެޅި އެންމެ މުހިންމު ފިޔަވަޅަކީ ބޭންކުތަކުން އެމްއެމްއޭގައި ރައްކާކޮށްފައި ބަހައްޓަންޖެހޭ ފައިސާގެ މިންވަރު މަތިކުރުމެވެ.

Advertisement

މިހާރު އެ ނިސްބަތް ހުރީ 10.5 އިންސައްތައިގައި ކަމަށް ވާއިރު، މި އަންނަ ސެޕްޓެމްބަރު މަހުން ފެށިގެން 11 އިންސައްތައަށް މަތިކުރުމަށް ވަނީ ނިންމާފައެވެ. އަދި 2027 ވަނަ އަހަރުގެ ތެރޭގައި ކޮންމެ ތިން މަހަކުން ރިވިއުކުރަމުން ގޮސް، އެ އަހަރުގެ ޑިސެމްބަރަށް 13 އިންސައްތައަށް މަތިކުރުމަށް ވެސް ވަނީ ރާވާފައެވެ.

މީގެ އިތުރުން ބާޒާރުގައި ދައުރުވާ ފައިސާ ނެގުމަށް އެމްއެމްއޭއިން ހިންގާ އޯޕަން މާކެޓް އޮޕަރޭޝަންސް (ބާޒާރުގައި ދައުރުވާ ފައިސާ ސީދާ ގޮތުން މަދުކުރާ ނިޒާމު) ގެ ރޭޓް 10 ބޭސިސް ޕޮއިންޓަށް އިތުރުކުރުމަށް ވެސް ވަނީ ނިންމާފައެވެ.

އެމްއެމްއޭއިން ބުނީ 2025 ވަނަ އަހަރުގެ ޖުލައި މަހު މި ނިޒާމު އަލުން ފެށި ފަހުން، ބާޒާރުން އެވެރެޖްކޮށް 2.7 ބިލިއަން ރުފިޔާ ނެގިފައިވާ ކަމަށެވެ. އެއާ އެކު ބޭންކިން ނިޒާމުގައި ބޭނުންވާ ވަރަށް ވުރެ އިތުރަށް ހުރި ފައިސާ 6.5 ބިލިއަން ރުފިޔާއިން 3.7 ބިލިއަން ރުފިޔާއަށް ދަށްވެފައިވާ ކަމަށް ވެސް އެމްއެމްއޭއިން ބުނެއެވެ.