ޕާކިސްތާނުން، ސައުދީ އަރަބިއްޔާގެ ޖިއްދާގައި ކްރިކެޓު ސްޓޭޑީއަމެއް އަޅައިދޭން ނިންމައިފި އެވެ.

މި އެއްބަސްވުމުގައި ސައުދީގެ ފަރާތުން ސޮއި ކުރެއްްވީ ކްރިކެޓް ފެޑަރޭޝަންގެ ޗެއާމަން ޕްރިންސް ސައުދް ބިން މިޝާލް ބިން މުހައްމަދެވެ. ޕާކިސްތާނުގެ ފަރާތުން ސޮއި ކުރެއްވީ އެ ގައުމުގެ އިންޓީރިއާ މިނިސްޓަރު މުހްސިން ނަގްވީ އެވެ.

Advertisement

އޭނާ މިހާރު ގެންދަވަނީ ސައުދީއަށް ރަސްމީ ދަތުރުފުޅެއް ކުރައްވަމުންނެވެ.

މި އެއްބަސްވުމުގެ ފަށުން ޖިއްދާގައި ޕާކިސްތާނުން އަޅައިދޭނީ ބައިނަލްއަގުވާމީ ފެންވަރުގެ ޒަމާނީ ސްޓޭޑިއަމްއެކެވެ. މި ސްޓޭޑިއަމްގައި ތަމްރީންތަކާއި އޮފީސް ބަޔާއި އެނޫންވެސް ކްރިކެޓް ކުރިއެރުވުމަށް ސްޓޭޑިއަމެއްގައި ހުންނަން ޖެހޭ ހުރިހާ ވަސީލަތްތަކެއް ގާއިމްކޮށްދޭނެ ކަމަށް ޕާކިސްތާނުގެ މިނިސްޓަރު ވިދާޅުވި އެވެ.

ސައުދީން މިފަދަ އެއްބަސްވުމެއް ހަދައި ކްރިކެޓް ސްޓޭޑިއަމެއް އަޅަން ބޭނުންވަނީ އެ ގައުމުގައި އެ ކުޅިވަރު އިތުރަށް ކުރި އެރުވުމަށެވެ. ސައުދީ ރައްޔިތުންނަށް ބައިނަލްއަގުވާމީ ފެންވަރުގައި ކްރިކެޓުގައި ވާދަ ކުރުމަށް ބޭނުންވާ ފުރުސަތު ތަކާއި ތަމްރީންތައް މަގުފަހި ކުރުމަކީ ބޭނުންވާ ކަމަށް ޕްރިންސް މިޝާލް ވިދާޅުވި އެވެ.

މިފަދަ ސްޓޭޑިއަމެއް އޮތުމުން ބައިނަލްއަގުވާމީ ފެންވަރުގެ މެޗުތައް އެ ގައުމުގައި ބޭއްވުމުގެ ފުރުސަތުވެސް ފަހިވެގެން ދާނެ ކަމަށް ވިދާޅުވި އެވެ.

މި އެއްބަސްވުމުގެ ދަށުން ޕާކިސްތާނުން ސްޓޭޑިއަމް އަޅައިދެނީ ސައުދީން ފަންޑު ކުރާގޮތަށެވެ. 

މިފަދަ ކުޅީވަރު ފެސިލިޓީތައް ސައުދީގައި ގާއިމް ކުރުމުގެ މަޝްރޫއުތައް އެ ގައުމުގެ ސަރުކާރުން ހިންގަނީ 2030 ވަނަ އަހަރާއި ހަމައަށް ހާސިލް ކުރަން ބޭނުންވާ ކުޅިވަރުގެ ލަނޑުދަނޑިއަށް ވާސިލްވުމަށެވެ.