ވޯލްޑްކަޕް ފުޓުބޯޅަ މުބާރާތުގައި ރޭ ފަތިހު ކްރޭޝީއާ އާއި ބައްދަލު ކުރި މެޗުގައި ޕޯޗުގަލަށް ލިބުނު ޕެނަލްޓީ ޖެހުމުގެ ކުރިން ކްރިސްޓިއާނޯ ރޮނާލްޑޯ "بِسْمِ اللّٰهِ" ކިޔުމުން ދުނިޔޭގެ ސަމާލަން އެކަމަށް ހުއްޓިއްޖެ އެވެ.

ކްރޭޝިއާއިން ކުރި ފައުލަކާއި ގުޅިގެން ޕޯޗުގަލަށް ލިބުނު ޕެނަލްޓީ ރޮނާލްޑޯ ޖެހީ މެޗުގެ 68 ވަނަ މިނެޓުގައި އެވެ. އެ ޕެނަލްޓީ ޖެހުމުގެ ކުރިން ރޮނާލްޑޯގެ މޫނު މަތީގެ ހަރަކާތްތައް ފެންނަގޮތަށް ދެ މިނެޓެއްހާއިރު ކެމެރާ އޭނާއަށް ފޯކަސް ކޮށްފައި ހުއްޓެވެ.

Advertisement

އެވަގުތު އެންމެ ބޮޑަށް ފާހަގަވީ ފުން ނޭވާތަކެއް ލުމަށް ފަހު ދެ ފަހަރު ބިސްމިއްލާހް ކިޔާކަމެވެ. އަދި އެއާއެކު ފޮނުވާލި ބޯޅި ވަރަށް ރީތިކޮށް ގޯލަށް ވަދެ އެވެ.

ރޮނާލްޑޯގެ މި އަމަލާއި އެކު މުޅި ދުނިޔޭގެ ސަމާލުކަން އޭނާއަށް ހުއްޓި ސޯޝަލް މީޑިއާ ވަނީ އެ ވާހަކައިން ފުރި ބަންޑުން ވެފައި އެވެ. މީގެ ކުރިންވެސް މެޗުތަކުގައި ޕެނަލްޓީ ޖެހުމުގެ ކުރިން އޭނާ ބިސްމިއްލާހް ކިޔާފައިވާ ވީޑިއޯތައް އާންމުވެފައިވެ އެވެ.

ސައުދީ އަރަބިއްޔާގެ އަލް ނަސްރައް ކުޅެމުން އަންނަ ރޮނާލްޑޯ އެޓީމާއި ގުޅުމަށް ފަހު ސައުދީއަށް ދިރިއުޅުން ބަދަލު ކުރި ފަހުން މިފަދަ ކަންކަން އޭނާގެ ފަރާތުން ފެންނަމުންދާ ކަމަށް މީގެ ކުރިންވެސް ރިޕޯޓު ކޮށްފައިވެ އެވެ.

އެގޮތުން ބައެއް ވާހަކަތައް ދެއްކުމަށް ފަހު "މާޝާﷲ" އަދި ކަމަކަށް އެދޭ ނަމަ މުސްލިމުން އަތް ނަގާގޮތަށް ދުއާއަށް އަތް ނަގާކަން ވަނީ ފާހަގަވެފައި އެވެ. ނަމަވެސް ރޮނާލްޑޯ އިސްލާމް ދީނާއި ގުޅޭ އިތުރު ކަންކަން ދަސްކުރާ ކަން ފާހަގަ ނުވާކަމަށް ރިޕޯޓުތައް ބުނެ އެވެ.

ރޮނާލްޑޯގެ މި އަމަލުތަކާއި ގުޅިގެން ދުނިޔޭގެ އެކި ކަންކޮޅުތަކުގައި ތިބި ރޮނާލްޑޯގެ މުސްލިމް ސަޕޯޓަރުން ދަނީ އޭނާއަށް އިސްލާމް ދީނުގެ ހިދާޔަތް ދެއްވުމަކީ އެދޭ ކަމެއް ކަމަށް ބުނަމުންނެވެ.

ޕޯޖުގަލް އާއި ކްރޭޝިއާ ބައްދަލު ކުރި މެޗުން މޮޅުވީ 2-1 ން ޕޯޗުގަލް އެވެ.