މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އިންތިޒާމުކުރާ "މޯލްޑިވްސް ފައިނޭންޝަލް އެކްސްޕޯ 2026" ގެ ޕާޓްނަރެއްގެ ގޮތުގައި އުރީދޫ މޯލްޑިވްސް ބައިވެރިވާ ކަމަށް އެ ކުންފުނިން ބުނެފިއެވެ.

މި އެކްސްޕޯ ބާއްވަނީ ޖުލައި 2 އިން 4 އަށް، ހުޅުމާލެ ސެންޓްރަލް ޕާކުގައި، ކޮންމެ ދުވަހަކު ހަވީރު 3:00 އިން ރޭގަނޑު 10:00 އަށެވެ.

Advertisement

އުރީދޫން ބުނީ އެ ކުންފުނީގެ ފިންޓެކް ޑިވިޝަނުގެ ފަރާތުން، ދާދިފަހުން ތައާރަފުކުރި އެމް-ފައިސާއާ ޕޭޕަލް ގުޅާލުމުގެ ޚިދުމަތް އެކްސްޕޯގައި ދައްކާލާނެ ކަމަށެވެ. މި ޚިދުމަތް މެދުވެރިކޮށް، ޕޭޕަލް އެކައުންޓަށް ލިބޭ ޑޮލަރުގެ ފައިސާ ސީދާ އެމް-ފައިސާ ވޮލެޓަށް ޖަމާކުރެވެއެވެ.

އުރީދޫން ބުނި ގޮތުގައި މިއީ ފްރީލާންސަރުންނާއި، އަމިއްލަ މަސައްކަތްކުރާ ފަރާތްތަކާއި، ކުދި އަދި މެދު ފަންތީގެ ވިޔަފާރިތަކާއި، އުފެއްދުންތެރިންނަށް ދުނިޔޭގެ ޑިޖިޓަލް އިޤްތިޞާދުގައި ބައިވެރިވުމަށް ލިބޭ ބޮޑު ފުރުޞަތެކެވެ.

މީގެ އިތުރުން، އެ ކުންފުނީގެ ހެޑް އޮފް ފިންޓެކް އަޙްމަދު ނޫމާން، ޑިޖިޓަލް ޕޭމަންޓްތަކާއި މާލީ އީޖާދުތަކުގެ މުސްތަޤްބަލާ ބެހޭ ގޮތުން ބާއްވާ ޕެނަލް މަޝްވަރާއެއްގައި ބައިވެރިވެވަޑައިގަންނަވާނެއެވެ.

ތިން ދުވަހުގެ މުއްދަތަށް ކުރިއަށްދާ މި އެކްސްޕޯއަކީ މާލީ ދާއިރާގެ މުހިންމު ފަރާތްތައް އެއްތަނަކުން ބައްދަލުވެ، މާލީ ހޭލުންތެރިކަމާއި އީޖާދީ ކަންކަމާ ގުޅޭ ގޮތުން މަޝްވަރާކުރުމަށް ބާއްވާ ޙަރަކާތެކެވެ.