ދިރާގުގެ މެނޭޖިން ޑައިރެކްޓަރު އަދި ޗީފް އެގްޒެކެޓިވް އޮފިސަރު އިސްމާއީލް ރަޝީދު ފަހު ރިޓަޔާކުރައްވަން ނިންމަވައިފި އެވެ.

އޭނާ މަގާމުން ވަކިވެވަޑައިގެންނަވަން ނިންމަވާފައި މިވަނީ ދިރާގުގައި 40 އަށްވުރެ ގިނަ ދުވަހު މަސައްކަތް ކުރެއްވުމަށް ފަހު އެވެ. އޭނާ ރިޓަޔާ ކުރައްވާތީ އެ މަޤާމަށް ވެލްޑެމާ (ވެލްޑެ) ފެރަޑާޒް ސީއީއޯ ޑެޒިގްނޭޓުގެ ގޮތުގައި މިއަދު އައްޔަން ކުރައްވާފައިވެ އެވެ.

Advertisement

ދިރާގުން ބުނީ މި ބަދަލު ގެންނަނީ ރޭވިގެން ހިންގާ ސަކްސެޝަން ޕްލޭނެއްގެ ދަށުން ކަމަށާއި ވެލްޑެ ސީއީއޯ ޑެޒިގްނޭޓުގެ މަޤާމާ ހަވާލުވެވަޑައިގެންފައިވަނީ މިއަދުން ފެށިގެން ކަމަށެވެ. މި ސަކްސެޝަން ޕްރޮސެސް ކުރިއަށް ގެންގޮސްފައިވަނީ ބިޔޯންގެ ބެލުމުގެ ދަށުން ކަމަށާއި ބޯޑުގެ ރެމިއުނަރޭޝަން ނޮމިނޭޝަން އެންޑް ގަވަނެންސް ކޮމިޓީން އެ މަސައްކަތް އޯވަސީ ކޮށްފައިވާ ކަމަށެވެ.

އިސްމާއިލް ރިޓަޔާ ކުރައްވާތީ ދިރާގު ބޯޑުގެ ޗެއާޕާސަން އިސްމާއީލް ވަޙީދު ވިދާޅުވީ ގާތްގަނޑަކަށް ސާޅީސް އަހަރު ވަންދެން އޭނާ ރާއްޖޭގެ ޓެލެކޮމިއުނިކޭޝަންސް ދާއިރާ ބައްޓަން ކުރެއްވުމަށާއި ދިރާގު ކުރިއެރުވުމަށް އެހީތެރިވެދެއްވާފައިވާ ކަމަށެވެ. އަދި ބޯޑުގެ ފަރާތުން އޭނާގެ ޚާއްޞަ ޚިދުމަތާއި ލީޑަޝިޕަށް އިޚްލާޞްތެރި ޝުކުރު ދަންނަވާ ކަމަށެވެ.

ވެލްޑެއާ ބެހޭ ގޮތުން ޗެއާޕާސަން ވިދާޅުވީ ބައިނަލްއަޤުވާމީ ކެރިއަރުގައި ވެލްޑެ ވަނީ ކަސްޓަމާ ސެންޓްރިކް ޖަމާޢަތްތައް ބިނާކޮށް ކާމިޔާބީގެ ދައުރުތަކުގައި ވިޔަފާރިތައް ލީޑު ކުރައްވައިފައި ކަމަށެވެ.

އަލަށް ސީއީއޯ ކަމަށް އައްޔަން ކުރާ ވެލްޑެ ފެރަޑާޒް ވިދާޅުވީ ޓެކްނޮލޮޖީ ބަދަލުވި ނަމަވެސް ކޮންމެ ވިޔަފާރިއެއްގެ ކާމިޔާބީ ނިންމަނީ ކަސްޓަމަރުންނަށް ޚިދުމަތް ކުރުމުގައި އެ ކުންފުންޏެއްގެ މީހުންނާއި ލީޑަޝިޕާއި އެ މީހުންގެ ޢަމަލުތައް ކަމަށެވެ. ދިރާގާ ގުޅިވަޑައިގަތުމަކީ ދިވެހި ރައްޔިތުންނަށާއި އިޤުތިޞާދަށް ޚިދުމަތް ކުރެއްވުމުގެ ފުރުޞަތެއް ކަމަށް ދެކެވަޑައިގަންނަވާ ކަމަށް ވެސް އޭނާ ވިދާޅުވިއެވެ.

ދިރާގުން ބުނީ ވެލްޑެ ދިރާގަށް ގެންނަވަނީ 30 އަހަރަށް ވުރެ ދިގު ބައިނަލްއަޤުވާމީ ޓެލެކޮމިއުނިކޭޝަންސް ތަޖުރިބާއެއް ކަމަށެވެ. އެފްރިކާ ޔޫރަޕް އޭޝިއާ އަދި ކެރީބިއަންގައި ވޮޑަފޯން ޑިޖިސެލް ސެލް ސީ ޓެލްކޮމް މޯބައިލް ފަދަ ކުންފުނިތަކުގައި އިސް މަޤާމުތައް ފުރުއްވާފައިވާ ކަމަށެވެ. 

އިސްމާއީލް ރަޝީދު ޓެލެކޮމިއުނިކޭޝަންސް ދާއިރާގެ ކެރިއަރު ފައްޓަވާފައިވަނީ ކޭބަލް އެންޑް ވަޔަރލެސް (ސީއެންޑަބްލިއު) ގެ ދަށުން ހިންގި ދިރާގުގެ ކުރީގެ ކުންފުނީގައި އެވެ. 1988 ވަނަ އަހަރު ދިރާގު އުފެއްދި އިރު އެ ކުންފުނީގެ ފައުންޑިން ޓީމުގައި ހިމެނިވަޑައިގެންނެވި ކަމަށް ދިރާގުން ބުނެފައިވެއެވެ.