ގައުމީ ބޭންކް ބޭންކް އޮފޮ މޯލްޑިވްސް (ބީއެމްއެލް) އިން "އިންވެސްޓްމަންޓްސް ބައި ބީއެމްއެލް" ގެ ނަމުގައި އާ ހިދުމަތެއް ތައާރަފު ކޮށްފި އެވެ.

މި ހިދުމަތް ތައާރަފުކޮށް މިއަދު ވަނީ އާންމުންނަށް އެ ބޭންކުގައި ޑޮލަރު އިންވެސްޓްކޮށް 25 ޕަސެންޓުގެ ފައިދާ ހޯދޭނެ ގޮތް ހަދާފައި އެވެ.

Advertisement

މި ހިދުމަތް ތައާރަފުކޮށްދެއްވީ ބީއެމްއެލްގެ ސީއީއޯ މުހައްމަދު ޝަރީފެވެ. ޝަރީފް ވިދާޅުވީ މި ހިދުމަތް ތައާރަފުކުރީ ބޭންކުން ކުރާ މުއާމަލާތްތަކަށް ބޭނުންވާ މިންވަރަށް ޑޮލަރު ހޯދުމަށްޓަކައި އިތުރު އިންވެސްޓަރުން ހޯދުމުގެ މަގުސަދުގައި ކަމަށެވެ.

ބީއެމްއެލް އިންޓަނެޓް ބޭންކިން ނުވަތަ މޯބައިލް އެޕްލިކޭޝަން މެދުވެރިކޮށް ހާއްސަ ޕޯޓަލެއް މެދުވެރިކޮށް ކޮންމެ މީހަކަށް ވެސް ޑޮލަރު އިންވެސްޓް ކުރެވޭނެއެވެ. އިންވެސްޓްކުރާ ޑޮލަރަށް ވާ ދިވެހި ރުފިޔާ 15.42ރ. ގެ ރޭޓުން ވަގުތުން އެ މީހެއްގެ އެކައުންޓަށް ޖަމާވާނެއެވެ. އަދި 25 ޕަސެންޓުގެ ފައިދާ އަނެއް ދުވަހު ޖަމާކޮށްދޭނެއެވެ.

މިސާލަކަށް 1000 ޑޮލަރު އިންވެސްޓްކޮށްފި ނަމަ ފައިދާއާ އެކު 19275ރ. ލިބޭނެ ކަމަށް އެ ބޭންކުން ބުނެފައިވެއެވެ.

ޝަރީފް ވިދާޅުވީ މި ޕްލެޓްފޯމާ އެކު ބޭންކަށް ލިބޭ ޑޮލަރު އިތުރުވުމުން ކާޑުތަކަށް މިހާރު ކަނޑައަޅާފައިވާ ޑެއިލީ ލިމިޓްތަކަށް ވެސް ލުއިތަކެއް ލިބޭނެ ކަމަށެވެ.