މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން އަމިއްލަ އިސްނެގުމުގެ މަތިން އާންމުކުރަންޖެހޭ އެންމެހާ މައުލޫމާތު އެޗްޑީސީގެ ވެބްސައިޓުގައި އާންމުކޮށް ސަރުކާރު ހިއްސާވާ ކުންފުނިތަކުގެ ތެރެއިން މިކަން ކުރި ފުރަތަމަ ކުންފުންޏަށް އެޗްޑީސީ ވެއްޖެއެވެ.

އާރުޓީއައި ގާނޫނުގެ 37 ވަނަ މާއްދާގައިވާ ގޮތުން ދައުލަތުގެ މުއައްސަސާތަކުން އަމިއްލަ އިސްނެގުމުގެ މަތިން 13 ބާވަތެއްގެ މައުލޫމާތު ހާމަކުރަންޖެހެއެވެ. އެ ކުންފުނިން ބުނީ އޭގެ ތެރޭގައި އެ އިދާރާއެއްގެ މަސްއޫލިއްޔަތުތަކާއި އޮނިގަނޑާއި ވާޖިބުތަކާއި އަހަރީ ބަޖެޓާއި ކުރަން ރާވާފައިވާ ޚަރަދުތަކާއި މުވައްޒަފުންނަށް ވަކިވަކިން ދޭ އުޖޫރައިގެ އިތުރުން ނިންމުންތައް ނިންމުމަށް އޮންނަ މަރުހަލާ ރޭވިފައި އޮންނަ ގޮތް ހިމެނޭ ކަމަށެވެ.

Advertisement

އެޗްޑީސީން ހާމަކުރި ގޮތުގައި މިއީ ރައްޔިތުންގެ މަސްލަހަތަށްޓަކައި މަދުވެގެން އަހަރަކު އެއް ފަހަރު އާންމުކުރަންޖެހޭ މައުލޫމާތެވެ. އެ ކޯޕަރޭޝަނުގެ ރަސްމީ ވެބްސައިޓުގައި މިކަމަށް ޚާއްޞަ އިންފޮމޭޝަން ޑައިރެކްޓްރީއެއް ގާއިމުކޮށް ހުރިހާ މައުލޫމާތެއް އާންމުންނަށް ބެލޭނެ ގޮތަށް މިހާރު ވަނީ ހަމަޖައްސައިފައެވެ.

ގާނޫނުގައިވާ ގޮތުގެ މަތިން ދައުލަތުގެ އިދާރާތަކުން އިސްނަގައިގެން ހާމަކުރަންޖެހޭ މައުލޫމާތު ސަރުކާރުގެ ހުރިހާ ވުޒާރާތަކުން މިހާރު ވަނީ އާންމުކޮށްފައެވެ. އެޗްޑީސީން ބުނި ގޮތުގައި މައުލޫމާތު ހޯދައި ލިބިގަތުމުގެ ހައްގުގެ ގާނޫނަށް 2014 ވަނަ އަހަރު އަމަލުކުރަން ފެށި ފަހުން ދައުލަތުގެ އިދާރާތަކުން މިގޮތަށް މައުލޫމާތު ހާމަކުރި މިއީ ފުރަތަމަ ފަހަރެވެ.