ސޭވިން އެކައުންޓެއް ހުޅުވާނީ ކޮން ބޭންކަކުންތޯ؟ ލޯނެއް ނަގަންވީ ކޮން ތަނަކުންތޯ؟ އިންޝުއަރެންސް ނެގުން މުހިންމުތޯ؟ މިއީ ގިނަ ދިވެހިންގެ ހިތުގައި އުފެދޭ ސުވާލުތަކެވެ. އެކަމަކު ވަކިވަކި ބޭންކުތަކަށާއި މާލީ އިދާރާތަކަށް ހިނގައި، ޚިދުމަތްތައް އަޅާކިޔުމަކީ ވަގުތު ހޭދަވާ ކަމެކެވެ. މޯލްޑިވްސް ފައިނޭންޝަލް އެކްސްޕޯ 2026 ފަރުމާކޮށްފައި ވަނީ އެ ހުރިހާ ސުވާލަކަށް އެއް ފުރާޅެއްގެ ދަށުން ޖަވާބު ލިބޭ ގޮތަށެވެ.

މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އިންތިޒާމުކުރާ މި އެކްސްޕޯ އޮންނާނީ ޖުލައި 2 އިން 4 އަށް ހުޅުމާލެ ސެންޓްރަލް ޕާކުގައެވެ. ކޮންމެ ދުވަހަކު ހަވީރު 3:00 އިން ރޭގަނޑު 10:00 އަށް ކުރިއަށްދާ މި ހަރަކާތަށް ވަނުމަކީ މުޅިން ހިލޭ ކަމެކެވެ.

Advertisement

ވިޔަފާރި ބޭންކުތަކާއި އިންޝުއަރެންސް ކުންފުނިތަކާއި ފައިނޭންސިން އިދާރާތަކާއި ރެގިއުލޭޓަރީ އިދާރާތަކާއި މަތީ ތައުލީމު ފޯރުކޮށްދޭ ފަރާތްތަކާއި ސަރުކާރުގެ މުއައްސަސާތައް، ހުރިހާ ފަރާތެއް ވެސް އެއް ތަނެއްގައެވެ. ބައެއް އިދާރާތަކުން އަލަށް ތައާރަފުކުރާ ޑިޖިޓަލް ޚިދުމަތްތައް ވެސް މި އެކްސްޕޯގައި އިފުތިތާހުކުރާނެއެވެ.

ވިޔަފާރިވެރިންނާއި ކުދި އަދި މެދު ފަންތީގެ ވިޔަފާރިތަކަށް ވެސް މިއީ މުހިންމު ހަރަކާތެކެވެ. ފައިސާ ދޫކުރާ ފަރާތްތަކާ ސީދާ ބައްދަލުކޮށް، މާލީ އެހީތެރިކަން ހޯދޭނެ ގޮތްތައް ބަލައިލެވޭނެއެވެ.

މިއީ ހަމައެކަނި މާލީ މައުލޫމާތުގެ ހަރަކާތެއް ނޫނެވެ. ތިން ރޭ ވެސް ލައިވް މިއުޒިކާއި ނަސީބު ގުރުއަތާއި ކާބޯތަކެތީގެ ސްޓޯލްތައް ހުންނާނެއެވެ. ޖުލައި 3 ވަނަ ދުވަހުގެ ހަވީރު 4:00 އިން 6:00 އަށް ކުޑަކުދިންނަށް ޚާއްޞަ ހަވީރެއް ބާއްވާއިރު، ކުޅިވަރުގެ ތެރެއިން މާލީ ކަންކަމުގެ އަސާސީ މައުލޫމާތު ކުދިންނަށް ދަސްކޮށްދޭނެއެވެ. އެ ރޭ 10:00 ގައި ބައިވެރިވާ މާލީ އިދާރާއެއްގެ ފަރާތުން ހަވާ އެރުވުމުގެ ހަރަކާތެއް ވެސް ކުރިއަށް ގެންދާނެއެވެ.

މީގެ އިތުރުން ރާއްޖޭގެ މާލީ ދާއިރާގެ މުސްތަގުބަލާ ގުޅޭ ޕެނަލް ޑިސްކަޝަންތައް ޖުލައި 2 އަދި 4 ގައި ކުރިއަށްދާނެއެވެ.

އެކްސްޕޯއަކީ ރައްޔިތުން މާލީ ނިޒާމުގެ ތެރޭގައި ޝާމިލުކުރުވައި މާލީ ހޭލުންތެރިކަން އިތުރުކުރުމަށް އެމްއެމްއޭ އިން ކުރާ މަސައްކަތުގެ ބައެކެވެ.