ހިނގާބިނގާވެ އުޅުމުގައި ނުކުޅެދުންތެރިކަން ހުންނަ ފަރާތްތަކަށް އެހީތެރިވުމަށް ބޭންކް އޮފް މޯލްޑިވްސް (ބީއެމްއެލް) އިން ހިންގަމުންދާ ޕްރޮގްރާމުގެ ދަށުން އިތުރު 30 ވީލްޗެއާ ހަދިޔާކޮށްފިއެވެ.

2017 ވަނަ އަހަރު ފެށި މި ޕްރޮގްރާމުގެ ދަށުން މިހާތަނަށް 105 އަށް ވުރެ ގިނަ ރަށެއްގައި ދިރިއުޅޭ ފަރާތްތަކަށް 360 އަށް ވުރެ ގިނަ ވީލްޗެއާ ވަނީ ފޯރުކޮށްދީފައެވެ. ބީއެމްއެލް އިން ބުނީ މިފަހަރު ޕްރޮގްރާމް އިތުރަށް ފުޅާކޮށް، އެކި ފަރާތްތަކުގެ ބޭނުންތަކަށް ރިޢާޔަތްކޮށްފައިވާ ކަމަށެވެ.

Advertisement

އެ ގޮތުން އަމިއްލައަށް ދުއްވޭ މޮޓޮރައިޒްޑް ވީލްޗެއާގެ އިތުރުން، ޚާއްޞަ މެނުއަލް ވީލްޗެއާ ވެސް މިފަހަރު ވަނީ ހަދިޔާކޮށްފައެވެ. މެނުއަލް ވީލްޗެއާތަކަކީ ހިނގާބިނގާވެ އުޅުމުގައި އާއިލާ ނުވަތަ އެހީތެރިންގެ އެހީ ބޭނުންވާ ކުޑަކުދިންނާއި ބޮޑެތި މީހުންނަށް ޚާއްޞަކޮށް ފަރުމާކޮށްފައިވާ ވީލްޗެއާތަކެކެވެ.

މި ޕްރޮގްރާމަކީ އިޖުތިމާޢީ ޒިންމާގެ ދަށުން މުޖުތަމަޢުގެ ދުޅަހެޔޮކަމަށް ބީއެމްއެލް އިން ހިންގަމުން އަންނަ ޕްރޮގްރާމެކެވެ. މީގެ މައިގަނޑު މަގުޞަދަކީ އެހީ ލިބޭ ފަރާތްތަކާއި އެ ފަރާތްތަކުގެ އާއިލާތަކުގެ ދިރިއުޅުމުގެ ފެންވަރު ރަނގަޅުކޮށް، މިނިވަންކަމާ އެކު އުޅެވޭނެ ފުރުޞަތު ފަހިކޮށްދިނުން ކަމަށް އެ ބޭންކުން ބުންޏެވެ.