އެސްޓީއޯއިން ހިންގަމުން އައި ބޭސްފިހާރަތައް ސްޓޭޓް ފާމަސޫޓިކަލް އެންޑް މެޑިކަލް ސަޕްލައިސް ކޯޕަރޭޝަނަށް ބަދަލުކުރުމަށްޓަކައި މާދަމާއިން ފެށިގެން ތިން ދުވަހަށް އެ ފާމަސީތައް ބަންދުވާނެ ކަމަށް އެ ކުންފުނިން ބުނެފިއެވެ.

އެސްޓީއޯއިން ބުނީ މި މަހުގެ 24 25 އަދި 26 ވަނަ ދުވަހު ފާމަސީތައް ބަންދުކުރަނީ އެ ތަންތަނުގައި ހުރި އިންވެންޓްރީ ކައުންޓް ކުރުމަށް ކަމަށެވެ. ނަމަވެސް އެމަޖެންސީ ހާލަތުގައި ބޭސް ލިބޭނެ އިންތިޒާމު ހަމަޖެހިފައިވާނެ ކަމަށް އެ ކުންފުނިން ބުންޏެވެ. މި މަސައްކަތް ނިމުމުން ފާމަސީތަކުގެ ޚިދުމަތާއި ރާއްޖެއަށް ބޭނުންވާ ބޭސް އެތެރެކޮށް ފޯރުކޮށްދިނުމުގެ ޚިދުމަތް ދޭނީ ސްޓޭޓް ފާމަސޫޓިކަލް އެންޑް މެޑިކަލް ސަޕްލައިސް ކޯޕަރޭޝަނުން ކަމަށް އެސްޓީއޯއިން ބުންޏެވެ.

Advertisement

މި ބަދަލާ އެކު ފާމަސީތަކުގެ އޮޕަރޭޝަންތަކުގައި ހަރަކާތްތެރިވާ 500 އަށްވުރެ ގިނަ މުވައްޒަފުން ވެސް އާ ކުންފުންޏަށް ބަދަލުވެގެންދާނެއެވެ. ބޭސް ސިޓީއަށް ބޭސް ނުލިބޭ ކަމުގެ ޝަކުވާތައް ގިނަވެ އެ މައްސަލަ ހައްލުކުރުމުގެ ނަމުގައި ސަރުކާރުން ބޭހަށް ޚާއްޞަ ކުންފުންޏެއް އުފެއްދި ނަމަވެސް އެ ކުންފުނިން ބޭސް އެތެރެކުރަން ފެށިކަން އިއުލާނުކުރީ ކުންފުނި އުފެއްދިތާ ހަ މަސް ފަހުން މިދިޔަ އެޕްރީލް މަހުގެ ތެރޭގައެވެ.