އެމްޓީސީސީން ތަޢާރަފުކުރި "މާލެ ޓެކްސީ ލައިން" ގެ ޚިދުމަތް ވިލިމާލޭގައި އިއްޔެ ރަސްމީކޮށް ފަށައިފިއެވެ.

ވިލިމާލޭގައި ބޭއްވި ޚާއްޞަ ރަސްމިއްޔާތެއްގައި މި ޚިދުމަތް ރަސްމީކޮށް ފައްޓަވައިދެއްވީ އިކޮނޮމިކް ޑިވެލޮޕްމަންޓް، ޓްރާންސްޕޯޓް އެންޑް ޓްރޭޑް ވަޒީރު މުޙައްމަދު ސަޢީދެވެ. މި ރަސްމިއްޔާތުގައި ރައްޔިތުންގެ މަޖިލީހުގެ ވިލިމާލޭ ދާއިރާގެ މެންބަރު މުޙައްމަދު އިސްމާޢީލާއި އެމްޓީސީސީގެ މެނޭޖިން ޑައިރެކްޓަރު އަޙްމަދު ސަޢުދީ ބައިވެރިވެވަޑައިގެންނެވިއެވެ.

Advertisement

މި ޚިދުމަތުގައި ބޭނުންކުރަނީ ތިމާވެށްޓާ ރައްޓެހި އީވީ ވެހިކަލެވެ. މިވަގުތު ވިލިމާލޭގައި ޚިދުމަތަށް ނެރެފައި ވަނީ ހަތަރު ކާރެވެ. އެއީ ޗަންގަންގެ ލުމިން މޮޑެލްގެ ދެ ކާރާއި އެސް.ޒީރޯ 7 މޮޑެލްގެ ދެ ކާރެވެ. ޓެކްސީ ބުކް ކުރެވޭނީ މި ކަމަށް ޚާއްޞަކޮށް އުފައްދާފައިވާ "މާލެ ޓެކްސީ އެޕް" މެދުވެރިކޮށެވެ. މި ޚިދުމަތް 24 ގަޑިއިރު ލިބެން ހުންނާނެ ކަމަށާއި ދަތުރުކުރާނީ ޓްރާންސްޕޯޓް ވުޒާރާއިން ކަނޑައަޅާފައިވާ އަގުތަކަށް ކަމަށް އެމްޓީސީސީން ބުނެއެވެ.

އެމްޓީސީސީން ބުނީ މާލެ ޓެކްސީ ލައިންގެ މައިގަނޑު މަޤުޞަދަކީ ރައްޔިތުންނަށް އިތުބާރު ކުރެވޭ، ރައްކާތެރި އަދި ފެންވަރު ރަނގަޅު ޓެކްސީ ޚިދުމަތެއް ފޯރުކޮށްދިނުން ކަމަށެވެ. އެ ކުންފުނިން ބުނި ގޮތުގައި ޑްރައިވަރުންނަކީ އިންޓަވިއު ޕްރޮސެސްއެއްގެ ތެރެއިން ހޮވައި، ތަމްރީނު ދީފައިވާ ބައެކެވެ. ޚިދުމަތާ ގުޅޭ އެހީ ހޯދުމަށް 1655 ހޮޓްލައިނަށް ގުޅައިގެން ކުރިއަށް ގެންދެވޭނެއެވެ.